Alonsotegi

Alonsotegi
Bizkaia
Alonsotegiren ikuspegia.
Izen ofiziala	Alonsotegi
Estatua Erkidegoa Lurralde Historikoa Eskualdea	Espainia Euskal Autonomia Erkidegoa Bizkaia Bilboaldea
Alkatea	Aitor Santisteban Aldama (EAJ)
Herritarra	alonsotegiar
Koordenatuak	43°14′42″N 02°59′19″W
Eremua	21,00 km2
Garaiera	28 m
Distantzia	5,1 km Bilbora
Posta kodea	48810
Biztanleria	2.845 bizt. (2012)
Dentsitatea	135,48 bizt./km²
http://www.alonsotegi.net/

Alonsotegi Bizkaiko udalerria da. Bilboaldean eta Enkarterrietan dago kokaturik eta 21 kilometro koadroko zabalera du. Alonsotegiko hiriguneaz gain, Arbuio eta Irauregi auzoak dira nabarmengarri.

Alonsotegiren goitiko ikuspegia.

Geografia

Inguru Naturala

Kadagua ibaiaren ondoan kokatuta dago Pagasarri eta Ganekogorta mendien pean.

Udalerri mugakideak

• Barakaldo iparraldean.
• Bilbo ipar-ekialdean.
• Arrigorriaga ekialdean.
• Gueñes hego-mendebaldean.
• Arrankudiaga hegoaldean.

Historia

Historian zehar, Arrigorriaga eta Barakaldo udalerrien zati izan da, bere independentzia 1991. urtean lortu zuen arte. Lau zatitan banatu daiteke bere historia:

1. XV. edo XVI. mende hasierararte, Alonsotegi Arrigorriaga udalerriaren barne zegoen.

2. XVI. mendean elizate independente moduan eratu zen, 1888. urterarte.

3. 1888. urteko azaroaren 13tik 1990ko abenduaren 31rarte Alonsotegi, Barakaldok zuen anexionatuta.

4. Azkenik, 1991ko urtarrilaren 1ean lortu zuen berriz desanexioa, ordura arte beti barakaldar izandako Irauregi eta Zamundi auzuneekin herri independentea eratuz.

Demografia

1991. urtera arte, Alonsotegi Barakaldoko udalerrian sartuta egon zen.

Biztanleriaren bilakaera

1991	2000	2010
3.075	2.662	2.828

Politika

2007ko hauteskundeak

Sei alderdi aurkeztu ziren hauteskundeetan udalerrian: EAJ-PNV, EA, PSE-EE, PP, EB-Aralar eta Alonsotegiko Ezkerra izeneko alderdi independente bat. Hauek izan ziren emaitzak:

• Euzko Alderdi Jeltzalea : 724 boto (6 zinegotzi)
• PSE-EE : 221 boto (2 zinegotzi)
• Eusko Alkartasuna : 219 boto (2 zinegotzi)
• Alonsotegiko Ezkerra : 218 boto (zinegotzi bat)
• Partido Popular : 70 boto (zinegotzirik ez)
• Ezker Batua-Berdeak-Aralar : 38 boto (zinegotzirik ez)

Emaitza horien ondoren, Gabino Martinez de Arenaza jeltzalea izendatu zuten berriro herriko alkate.

2003ko hauteskundeak

Gabino Martinez de Arenaza, (EAJ), izan zen 2003-2007 bitartean Alonsotegiko alkatea, 2003ko hauteskundeetan gehiengo osoa lortuta. Hauteskunde horietan, EAJk 7 zinegotzi lortu zituen, Alonsotegiko Ezkerra herri ekimenak 2, EAk 1 eta PSOEk 1.

Boto kopuruari dagokionez, EAJk 824 boto lortu zituen, AE herri ekimenak 316, EAk 232 eta PSOEk 154. Baliogabeko botoak 226 izan ziren eta zuri bozkatu zutenak 10. Aipagarria da baliogabeko botoek izan zuten gorakada, ezker abertzaleak hauteskundeetara aurkezturiko zerrendak Espainiako Auzitegi Nazionalak baliogabe utzi eta gero.

Alonsotegiar ezagunak

• Andoni Goikoetxea (1956-), futbolari ohia eta entrenatzailea.
• Iñigo Urkullu (1961-), Eusko Jaurlaritzako lehendakaria eta EAJko politikaria.
• Marcelino Bilbao (1920-), Mauthausen konzentrazio esparru nazitik bizirik ateratakoa

Ikus, gainera

• Bizkaiko udalerrien zerrenda

Kanpo loturak

• (Euskaraz) Alonsotegiko udalaren webgunea.