Amílcar Cabral

Amílcar Cabral, Ginea Bissauko bandera atzean duela, Alemaniako Errepublika Demokratiko ohiko seilu batean

Amílcar Cabral (Cabo Verde, 1921 - Konakry, 1973) Ginea Bissauko politikaria izan zen, Afrikak XX. mendean eman duen iraultzaile nagusietakoa.

Biografia

Nekazaritzako ingeniaria zen, eta Ginea Bissaun eta Angolan egin zuen lan.

1956an, P.A.I.G.C. (Cabo Verde eta Guinea-Bisauren Independentziarako Alderdi Afrikarra) sortu zuen. Borroka armatuaren aldeko izan zen, portugaldarren eta kolonialismoaren aurkako auziari irtenbidea emateko.

1963tik aurrera lurralde askatuak antolatzen hasi zen, portugaldarren mendeko Ginean, eta 1973an Ginea Bissauren independentzia aldarrikatu zuen, Portugalen kolonialismoa irtenbiderik gabe utzirik horrela.

Teorialari eta politikari argia, Amilcar Cabralek Afrikako zapalduen ahotsa eraman zuen nazioarteko batzar nagusi guztietara (NBE, Habanako Trikontinentala). Ginea Errepublikako Konakry hirian hil zuten Portugalgo gobernuak ordainduriko pistolari batzuek, 1973an.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek lizentzia librearekin laga zituen, euskal Wikipedia osatzeko proiektu baterako.