Arantxa Urretabizkaia
 |
||
| Datu pertsonalak | ||
|---|---|---|
| Izen osoa | Arantxa Urretabizkaia | |
| Jaio | 1947ko uztailaren 1a | |
| Donostia (Gipuzkoa) | ||
Arantxa Urretabizkaia Bejarano (Donostia, Gipuzkoa, 1947ko uztailaren 1a) euskal idazlea da. Eleberrigintzan jardun izan du batik bat, eta Zergatik panpox da haren lanik ezagunena. Halaber, itzulpenak, argitaletxeetarako lanak, zinemarako gidoiak, egunkarietarako zutabeak (El Diario Vasco) eta irrati (Euskadi Irratia) eta telebistarako (ETB-1) kolaborazioak egin izan ditu.
Donostiako Loiola auzoko Txomin Enean jaio zen. Hiru urte zituelatik, Egia auzora aldatu zen familiarekin. Historiako ikasketak egin zituen Bartzelonan. Lur argitaletxearen inguruko taldean hasi zen idazten, garaiko hainbat idazle gazterekin batera: Ramon Saizarbitoria, R. Arregi, etab. Ibon Sarasolarekin batera itzuli zuen Frantz Fanonen Afrika iraultzaren alde (1970) eta harekin eta R. Saizarbitoriarekin idatzi zuen Mendebaleko ekonomiaren historia (1970). 1977an Egin egunkarian hasi zen kazetari lanetan, eta geroztik, ETB-n eta Ere, El Diario Vasco, Deia eta El Mundo agerkarietan lan egin du. Zinemarako lanak ere egin ditu, gidoilari moduan: Albaniako konkista (1983) eta Lauaxeta (1987). Bi poema liburu idatzi ditu: San Pedro bezperaren ondokoak (1972), eta Maitasunaren magalean (1982). Baina batez ere, hitz lauzko kontalari gisa da ezaguna: Zergatik Panpox (1979), eleberri laburra; Aspaldian espero zaitudalako ez nago sekulan bakarrik (1983), ipuin liburua; Saturno (1987), eleberria; Aurten aldatuko da nire bizitza (1992), gazteentzako kontakizuna; Koaderno Gorria, eleberria (1998); eta orain arte bere azken narrazio lana den 3 Mariak eleberria (2010). Horrez gain, bere poesiagintza osoari buruzko antologia bat 2000. urtean kaleratu zen, XX. mendeko poesia kaierak bilduman. Ohiko lankidea izan da Euskadi Irratian, Euskal Telebistan eta El Diario Vasco egunkariko Zabalik astekarian.
Eduki-taula |
Lanak [aldatu]
Narrazioa [aldatu]
- Aspaldian espero zaitudalako ez nago sekula bakarrik (1983, Erein)
- Aurten aldatuko da nire bizitza (1992, Erein)
Nobela [aldatu]
- Zergatik panpox (1979, Hordago): Berrargitalpena Ereinekin 1985ean. Aditu batzuen ustez, idazlearen lanik hoberena da.
- Saturno (1987, Erein)
- Koaderno gorria (1998, Erein)
- 3 Mariak (2010, Erein)
Poesia [aldatu]
- Maitasunaren magalean (1982, Gipuzkoako Aurrezki Kutxa)
- XX. mendeko poesia kaierak - Arantxa Urretabizkaia (2000, Susa): Koldo Izagirreren edizioa
Ikus, gainera [aldatu]
Kanpo loturak [aldatu]
Erreferentziak [aldatu]
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek Creative Commons Aitortu 3.0 Espainia lizentziarekin argitaratu ditu, Open Data Euskadi webgunean.
