Baiona-Euskal Herriko Merkataritza Ganbara

Baiona-Euskal Herriko Merkataritza Ganbara (frantsesez: Chambre de commerce et d'industrie de Bayonne Pays basque) zuzenbide publikoko eta kudeaketa pribatuko erakundea da. Halaber, Ipar Euskal Herriko ekonomiaren eta enpresen eskura dagoen organismoa da.

Merkataritza ganberaren xede nagusia enpresei laguntzea da, hainbat zerbitzu erabilgarri eskaintzen baitie bere kideak diren 13.000 Ipar Euskal Herriko enpresei, batik bat, aholkularitza eta prestakuntza arloan. Beste zazpi merkataritza ganberekin batera Akitaniako Eskualdeko Merkataritza Ganbara osatzen du.

Historia

1701ean, Luis XIV.a Frantziakoak bere erresumaren hiri nagusietan (Bordelen, Lyonen, Lillen, Rouenen, Montpellierren eta Baionan) Merkataritza Ganberak eratzeko eskubidea eman zuen. Baionakoa 1726an eratu zuten Baionako portuaren bizitasuna mantentzeko. Pirinio Atlantikoetan Ganbera bakarra izan zen 1947ra arte, noiz Pauen Biarnorako elkarte bat sortu zuten.

Helburuak

Ganbararen helburuak lau ardatzetan banatzen dira:

• Garapen ekonomikoa. Horretarako hainbat ekimen garatu ditu. Adibidez, 2008an esportazioak bultzatzeko cluster bat sortu zuen, Tribord, Quiksilver, Volcom edo Oxbow bezalako enpresei laguntza eman zuena.
• Aholkularitza enpresariala
• Prestakuntza. Ganberak eskola hauek sortu ditu:
  • Ecole Supérieure des Technologies Industrielles (ESTIA), ingeniarien eskola
  • Baionako Kudeaketa eta Merkataritza Eskola edo Ecole de Gestion et de Commerce (EGC)
  • Hizkuntz-eskola edo Centre d'Etude des Langues (CEL)
  • Zuzendarien Eskola edo Ecole des Managers
• Ekipamenduen kudeaketa:
  • Baionako portua
  • Donibane Lohizune-Ziburu arrantza portua.
• Kalitatea bere lanetan: horretarako kalitatearen ISO 9001, segurtasunaren OHSAS 18 001 eta ingurumenaren ISO 14001 arauak betetzea lortu du.

Kanpo estekak

• Webgune ofiziala

• Datuak: Q2948195