Bantu
Bantua Dualaren (Kamerun), Yuba ibaiaren ahoa (Somalia) eta Hegoafrika artean bizi diren 400 talde etniko beltz afrikarretako edozein kide da. Haien hizkuntzetan bantu hitzak (tokian tokiko aldaketak ditu) "gizakiak" esan nahi du. Ez dute arraza edo kultura talde uniformerik osatzen: ezaugarri komuna mintzaira dute. Niger-Kongo hizkuntzak dira bantuenak. Bantu taldeko hainbat hizkuntza hitz egiten dituzte. Animistak dira gehien bat, kristau edota musulman bihurtu diren talde batzuk izan ezik.
Bantuak bi talde nagusitan banatzen dira: Iparmendebalekoa eta Erdikoa (ekialde eta hegoaldekin). Iparraldetik hegoaldera, hauek dira bantu etnia nagusiak: fangak, bakubak, balubak, lingalak, bakongoak, hutuak, bagandak, ruandak, burundiak, kikuyuak, tongak, txewak, betxuanak, hereroak, swaziak, pediak, sothoak, vendak, swaziak, zuluak eta xhosak.
Nigeria eta Kamerundik hedatu ziren bantuak, nekazariak (eta gero metal erabiltzaileak) zirelako, pigmeoak ohianean eta khoisanak basamortuan baztertuta.