Base nitrogenatu

Wikipedia(e)tik
Hona jo: nabigazioa, Bilatu

Base nitrogenatuak molekula organiko ziklikoak dira, oinarrizko bi eraztunetatik sortuak: purinatik eta pirimidinatik. Purinak bi eraztun ditu, eta pirimidinak bakarra. Purinatik eratorritako baseak adenina eta guanina dira (bi eraztun dituzte), eta pirimidinatik zitosina, timina eta urazilo (eraztun bakarra).

Aipaturiko bost base nitrogenatu horiek nukleotidoen eta azido nukleikoen osaketan parte hartzen dute. Timina azido desoxirribonukleikoan (ADNan) besterik ez dago, eta uraziloa ARNan bakarrik. Gainontzeko base nitrogenatuak ADNan zein ARNan daude.

Base nitrogenatuen arteko elkarrekintzek ADNaren egitura espaziala mantentzen dute. Zehazki, adenina eta timinaren arteko loturak alde batetik, eta zitosina eta guaninaren artekoak bestetik. Lotura horiek hidrogeno zubiaren motakoak dira.

Horretaz gain azido nukleikoen base nitrogenatuek kode genetikoaren funtsa osatzen dute. Izan ere, kode genetikoan ARNaren base nitrogenatuen hirukote batek (kodoiak) aminoazido bat kodetzen du. Base nitrogenaturik gabe proteinen sintesia ez litzateke burutuko, eta bizia -guk ulertzen dugun eran- ezinezko izango litzateke Lurraren gainean.

Aipaturiko bost base nitrogenatuak garrantzitsuenak baldin badira ere ez dira bakarrak. Flabina, hipoxantina, sasiuraziloa eta erribotimidina, besteak beste, funtzio biologikoa duten beste base nitrogenatu batzuk dira.


Ikus, gainera[aldatu | aldatu iturburu kodea]