Bernard Clavel

Bernard Clavel frantses idazlea izan zen (Lons-le-Saulnier, 1923 - La Motte-Servolex, 2010). Gozo-saltzaile, margolari eta kazetari gisa aritu zen lanean. Literaturan 1956an hasi zen L'Ouvrier de la nuit (Gaueko langilea) lanarekin eta ondoren egin zituen Vorgine (1957), Qui m'emporte (1958, Eramaten nauenak). Lehenengo lanak oso herrikoiak izan ziren, eta arrakasta handia izan zuten: L'Espagnol (1959, Espainiarra), Malataverne (1960), La Maison des autres (1962, Besteen etxea), Le Voyage du père (1965, Aitaren bidaia). 1968an Goncourt saria irabazi zuen Fruits de l'hiver (Neguko fruituak) lanarekin. Pertsona xume eta ilunei arreta berezia jartzen zien, eta, aldi berean, erakarmen izugarria erakutsi zuen naturarekiko: Célébration du bois (1962, Zuraren ospakizuna), L'arbre qui chante (1967, Abesten duen zuhaitza), Arbres (1981, Zuhaitzak). Urteen joanean bere eleberriak tradizioen eta printzipioen fideltasunari buruzko gogoeta bihurtu ziren, eta pertsonaiak alegoriara jo zuten: Les Roses de Verdun (1994, Verduneko arrosak), Le Soleil des morts (1998, Hildakoen eguzkia), Carcajou (1996). Horiez gainera, haurrentzako ipuinak idatzi zituen: La Maison du canard bleu (1972, Ahate urdinaren etxea), Le Voyage de la boule de neige (1975, Elur-malutaren bidaia), Le Mouton noir et le loup blanc (1984, Arkume beltza eta otso zuria), Le Roi des poissons (1984, Arrainen errege), Au cochon qui danse (1986, Dantza egiten duen zerria). 1971n Goncourt akademiako kide hautatu zuten, baina 1977an dimisioa aurkeztu zuen. 1998an ez zuen onartu Ohorezko Legioko domina.

Bibliografia hautatua

• Cargo pour l'enfer 1993
• Malataverne, 1993
• L'Arbre qui chante, 1967
• Les Roses de Verdun 1994

• La Grande Patience saila
  1. La Maison des autres, 1977
  2. Celui qui voulait voir la mer, 1963
  3. Le Cœur des vivants, 1964
  4. Les Fruits de l'hiver, 1968

• Les Colonnes du ciel saila
  1. La Saison des loups, 1976
  2. La Lumière du lac, 1977
  3. La Femme de guerre, 1978
  4. Marie Bon pain, 1980
  5. Compagnons du Nouveau Monde, 1981

• Le Royaume du nord saila
  1. Harricana 1983
  2. L’Or de la terre 1984
  3. Miséréré 1985
  4. Amarok 1987
  5. L’Angélus du soir 1988
  6. Maudits sauvages 1989

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Izan ere, egile-eskubideen jabeak, Eusko Jaurlaritzak, hiztegi horiek lizentzia librearekin laga zituen, euskal Wikipedia osatzeko proiektu baterako.