Donostia-Hondarribia aireportua

Donostia-Hondarribia
NAGE: EAS - NAZE: LESO
Informazioa
Aireportu mota	publikoa
Eragilea	Aena
Hiria	Donostia, Gipuzkoa (Espainia)
Garaiera	1 m
Koordenatuak	43°21′23″N 1°47′26″W
Pistak
Norabidea	Luzera (m)	Gainazala
05-23	1.754	Asfaltoa

Donostiako aireportua Hondarribiko udalerrian kokatuta dago, Donostiatik 22 kilometrora.

Historia

1910eko hamarkadaren hasieran, Gipuzkoak bi aireportu txiki zeuzkan, Ondarreta eta Lasartekoak. Horrez gain, Kontxako badia, ur-hegazkinek erabiltzeko modukoa zen. 1920. urtean Irungo pertsona talde batek probintziako aireportu nagusia bertan eraikitzea proposatu zion Espainiako Sustapen Ministerioari. Horretarako Plaiaundi izeneko gunea proposatu zuten Bidaso ibaiaren bokalean. Beste bi aireportu txikiek martxan jarraitu zuten Madril eta Teneriferako hegaldiak eskainiz.

1930eko hamarkadan zehar, Irunen aireportua eraikitzeko egitasmoa berreskuratu egin zen, baina zailtasun teknikoak zirela medio, bertan behera geratu zen 1934ean. Espainiako aireportuen trafikoa asko handitzen ari zela, 1950eko hamarkadan berriro ere Irunen aireportuaren idea berpiztu egin zen. Azkenik eraikuntza lanak hasi eta urte eta erdiren buruan eraiki zuten aireportua.

Inaugurazioa eta bilakaera gaur egun arte

Inaugurazio ekitaldiak 1955eko abuztuaren 22an egin ziren, eta lehen hegaldia abuztuaren 29an burutu zen, Aviacoren hegaldi baten bitartez. Dena den, hegaldiek aireportura gerturatzerakoan Frantzia gainetik hegan egin behar zutela eta, Frantziako gobernuaren kezka sortu zuten. Horrez gain, aireportuaren azpiegitura ezaren ondorioz, ondoko kontserba lantegi bat bidaiari terminal modura egokitzera behartu zuten.

Espainia eta Frantziak 1957an erabaki zuten aireportuaren ustiapen mugak zeintzuk izan behar ziren. Muga horien arabera dena den, erreakzio-hegazkinek aireportua erabiltzea debekatu zuen, egin beharreko maniobren desegokitasuna zela eta. 1961ean pistaren luzera 1500 metrora luzatu zen eta 1965. urtean kontrol dorrea eraiki zen. 1969ean pista berriro ere luzatu zen, gaur egun dituen 1.754 metroak lortu arte.

Gaur egun, aireportua zabaltzeko proiektuaren inguruko eztabaida handia dago. 2000ean Espainiako Sustapen Ministerioak proiektu bat aurkeztu zuen aireportuaren pista handitzeko, horrela hegazkin handiagoek pista erabiltzea posible izateko. Dena den, handitze proiektu hark etxebizitza eta lantegi batzuen eraisketa suposatzen zuela eta, Irun eta Hondarribiko hainbat bizilagunen haserrea eragin zuen eta hainbat manifestaldi egin ziren handitze horren aurka.

2004an Espainiako gobernuan aldaketa gertatu zenean bertan behera geratu zen proiektua, baina Sustapen Ministerioak, handitze proiektu hori zehazteko asmoa erakutsi du 2006. urtean zehar. Hiru urte beranduago, 2009an, Sustapen Ministerioak eta Eusko Jaurlaritzako Garraio Sailak, aireportuko pista 150 metrotan Mendelu aldera luzatzea eta itsasoaldera 50 metro luzatzea erabaki zuten, aireportuaren gaur egungo eragingarritasuna bermatzeko.

Estatistikak

Urtea	Bidaiariak	Urtea	Bidaiariak
2001	281.059	2006	368.002
2002	271.224	2007	466.457
2003	283.843	2008	403.191
2004	295.533	2009	315.294
2005	308.775	2010	286.077

Ezaugarriak

• Lurreratze pista (1.754 m luze)
• Bidaiari terminala
• Aparkalekua (584 ibilgailu)
• 3 Ontziratze ate

Hegaldiak

Hegaldiak
Iberia: Madril-Barajas Air Nostrum: Bartzelona-Prat, Madril-Barajas, Brusela, Palma Mallorcakoa, Erroma-Fiumicino Helitt: Bartzelona-Prat, Madril-Barajas Vueling: Bartzelona-Prat

Ikus, gainera

• Euskal Herriko aireportuak bidaiarien arabera

Kanpo loturak

• Donostiako aireportua AENAko webgunean. (Euskaraz) (Gaztelaniaz) (Ingelesez)