Edorta Jimenez

Edorta Jimenez 2007. urteko Durangoko Azokan

Edorta Jiménez Ormaetxea (Mundaka, Bizkaia, 1953ko azaroaren 8a) euskal idazlea da. Bai bere izenez baita Omar Nabarro ezizenez ere idatzi du bere obra bereziki oparoa. 1985etik ia urtero argitaratzen du libururen bat. Nobela eta poesia landu ditu, eta artikulugile ere ibiltzen da. Zalantza barik, Bizkaiko idazle oparoenetarikoa da gaur egun.

Irakasle ikasketak egin zituen. Idazketa ez ezik, itzulpena, irakasletza, kazetaritza, telebistako zein zinemako gidoilaritza izan ditu ogibide, bestek beste. Oso idazle oparoa da. Literaturan, ia genero guztiak landu ditu. 1980ko hamarkadan, bost poema liburu eman zituen argitara, Omar Nabarro ezizenarekin: Itxas txorien bindikapena (1985), Egutegi esperimentala (1986), Gizaueropa (1986), Gaua zulatzen duten ahausietan (1987), eta Odoleko eskifaia (1989). Hurrengoan, hainbat ipuin bilduma kaleratu zituen: Atoiuntzia (1990), Manhattan (1994), Hemen datzana da (1995), eta Laudanoa eta sutautsa (1996), besteak beste. Euskal kostaldea eta bertako literatura liburu-sail batean ezagutaraztea da bere egitasmoetako bat. Sail horretakoak dira Speed gauak (1993), Azken fusila (1993), eta Baleen berbaroa (1997) eleberriak, adibidez. Azken liburu horrekin Azkue literatura saria jaso zuen. 1995ean Julene Azpeitia ipuin-lehiaketa irabazi zuen Akitaniatik datorren berba berria lanarekin.

Azken urteotan eleberrigintza historikoa eta kronika landu ditu batez ere. Eleberrien artean aipagarriak dira Kilkerren hotsak (2003) eta Sukar ustelaren urtea (2004). Kronikari dagokionez, Europako mugetan barrena (2001) liburuan Europan zehar trenez eginiko ibilbidea kontatzen du, eta Hemingway eta euskaldunak zerbitzu sekretuetan (2002) liburuak, berriz, Estatu Batuetako idazleak Mundakara eginiko bisita baten aitzakiarekin, euskal zerbitzu sekretuen nondik norakoak azaltzen ditu. 2006an beste bidaia-kronika bat argitaratu zuen: Koiotearen arrastoa. 2007an gaztelaniara itzuli zioten Kilkerren hotsak eleberria, El canto de los grillos izenburupean.

Irati Jimenez idazlearen aita da.

Bibliografia

Poesia

• Itxastxorien bindikapena 1985, Susa
• Egutegi esperimentala 1986, Susa
• Gizaeuropa 1986, Susa
• Gaua zulatzen duten ahausietan 1987, Susa
• Odoleko eskifaia 1989, Elkar
• XX. mendeko poesia kaierak - Omar Nabarro 2001, Susa
• Haragizko amoreak 2010, Susa

Eleberriak

• Speed gauak 1991, Susa
• Azken fusila 1993, Susa
• Kilkerren hotsak 2003, Susa
• Piztien itsasoa izeneko trilogia:
  • Baleen berbaroa 1999, Txalaparta
  • Sukar ustelaren urtea 2004, Txalaparta
  • Azeria eta lehoia 2007, Txalaparta

Narrazioa

• Atoiuntzia 1990, Susa
• Manhattan 1994, Elkar
• Hemen datzana da 1995, Elkar
• Laudanoa eta sutautsa 1996, Txalaparta
• Urdaibaiko ipuin eta kondairak 1996, Alfaguara-Zubia

Beste batzuk

• Itzala itzuli zenekoa (haur eta gazte literatura) 1997, Elkar
• Europako mugetan barrena (kronika) 2001, Txalaparta
• Hemingway eta euskaldunak zerbitzu sekretuetan (saiakera) 2003, Susa
• George L. Steer, Gernikan izan zen kazetaria (biografia) 2004, Txalaparta
• Robert Capa (biografia) 2005, Elkar
• Koioteren arrastoa (kronika) 2006, Susa
• Stock 13 (erotikoa) 2009, Txalaparta

Kanpo loturak

• Literaturaren Zubitegian
• Elkarrizketa Edorta Jimenezi Argia aldizkarian.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Izan ere, egile-eskubideen jabeak, Eusko Jaurlaritzak, hiztegi horiek lizentzia librearekin laga zituen, euskal Wikipedia osatzeko proiektu baterako.