Ekinokzio

Solstizio eta ekinokzioen UTC data eta ordua
urtea	Ekinokzioa Mar		Solstizioa Eka		Ekinokzioa Ira		Solstizioa Abe
	egun	ordu	egun	ordu	egun	ordu	egun	ordu
2002	20	19:16	21	13:24	23	04:55	22	01:14
2003	21	01:00	21	19:10	23	10:47	22	07:04
2004	20	06:49	21	00:57	22	16:30	21	12:42
2005	20	12:33	21	06:46	22	22:23	21	18:35
2006	20	18:26	21	12:26	23	04:03	22	00:22
2007	21	00:07	21	18:06	23	09:51	22	06:08
2008	20	05:48	20	23:59	22	15:44	21	12:04
2009	20	11:44	21	05:45	22	21:18	21	17:47
2010	20	17:32	21	11:28	23	03:09	21	23:38
2011	20	23:21	21	17:16	23	09:04	22	05:30
2012	20	05:14	20	23:09	22	14:49	21	11:11
2013	20	11:02	21	05:04	22	20:44	21	17:11
2014	20	16:57	21	10:51	23	02:29	21	23:03

Lurra Eguzkiak argiztatuta Martxoko ekinokzioan.

Lurrak Eguzkiaren inguruan orbitatzeagatik Eguzkiak zerua ekliptikaren gainetik zeharkatzen duela dirudi. Gorriz markatuta dagoen bide hori ez dator bat zuriz markatutako zeruko ekuatorearekin, Lurraren biraketa ardatza eta Lurra Eguzkiaren inguruan mugitzen den planoa elkarzutak ez izateagatik.

Lurraren urtaroen diagrama, iparraldetik ikusita. Eskumako muturrean: Abenduko solstizioa.

Lurraren urtaroen diagrama, hegoaldetik ikusita. Ezkerreko muturrean: Ekaineko Solstizioa.

Ekinokzioa urtean bitan gertatzen da, Lurraren ardatza eta Lurraren eta Eguzkiaren zentroak batzen dituen lerroa elkarzutak direnean; egoera horretan Eguzkiaren zentroa Lurraren ekuatoreko planoan kokatuta dago eta kokapen erlatibo hori mantenduko balitz, Lurraren toki guztietan egunaren eta gauaren luzerak berdinak lirateke. Ekinokzio berba zentzu apur bat lausoagoarekin ere erabiltzen da batzuetan, ekinokzioa gertatzen den data adierazteko.

"Ekinokzio" izena Latineko aequus (berdin) eta nox (gau) berbetatik dator, ekinokzioaren inguru hurbilean mundu guztietako tokietan eguna eta gauaren luzerak ia berdinak direlako.

Ekinokzioetan, Eguzkia zeruko esferaren aurkako puntu bitako batean kokatzen da, zeruko ekuatorea (0 graduko deklinazioarekin) eta ekliptika batzen diren guneetan. Puntu horiei ekinokzio puntuak deitu zaie. Hori dela eta, batzuetan ekinokzio hitza ekinokzio baten puntua adierazteko erabili izan da.

Ekinokzioak urte bakoitzean bi une zehatzetan gertatzen dira (ez egun batzuetan zehar), Lurraren ekuatoreko puntu batetik Eguzkiaren erdigunea puntu horren gain gainean (bere zenitean) ikus daitekeenean. Erabiltzen dugun egutegi gregoriarrean une horiek martxoaren 20 edo 21ean eta irailaren 22 edo 23an kokatu ohi dira.

Izenak

• Udaberriko ekinokzioa: Martxoaren 21a aldera gertatzen da Ipar Hemisferioan.
• Udazkeneko ekinokzioa: Irailaren 23a aldera gertatzen da Ipar Hemisferioan.

Hego Hemisferioan alderantziz gertatzen da.

Aurreko izenak izen klasikoak dira, ekinokzioak izendatzeko gehien erabili direnak, baina gaur egun idazle teknikoek gero eta gehiago erabiltzen dituzte Martxoko ekinokzioa eta Iraileko ekinokzioa izendapenak, berdin erabil ahal izateko Lurraren hemisferio bietan.

Ikus, gainera

• Solstizio

Lurraren eta Eguzkiaren arteko erlazioa ekinokzioan