Errealaren historia

Errealaren historia 1909an hasten da, taldearen sorrera eta lehenengo tituluarekin.

1935ean lehen aldiz Bigarren Mailara. Ordutik, hainbat denboralditan beheko kategorian jokatu du, 1967an Lehen Mailara itzuli zen, 40 urtez jarraian bertan mantenduz.

1980ko hamarkada garai arrakastatsuena izan zen, bi liga txapelketa lortuz, besteak beste. Arconada, Zamora, Lopez Ufarte eta Satrustegui jokalariek osatu zuten tartean orduko taldea, Alberto Ormaetxea entrenatzailea zela.

Hamarkada haren bukaeran, beste urte on batzuk etorri ziren John Benjamin Toshacken eskutik, Jose Maria Bakero eta Aitor Begiristain jokalariak zirela.

Azkenik, 2002-03 azken urte distiratsua izan zuten, Raynald Denoueix entrenatzailea zela, eta Ligan txapeldunorde geldituz.

2007an tamalez Bigarren Mailara jaitsi zen berriro taldea, baina 2010ean Lehen Mailan bueltan egotea lortu zuten.

Sorrera eta lehen urteak

• 1909an, "Club Ciclista de San Sebastián" izenarekin, Espainiako Txapelketa lortu zuen, Español de Madrid taldeari 3 eta 1 irabazita. Irailaren 7an jaio zen ofizialki, Adolfo Saenz presidente zela.

• 1910eko otsailaren 11n, Alfonso XIII.a Espainiako erregeak Errege titulua eman zion taldeari, "Real Sociedad" bihurtuz.

• 1913ko urriaren 5ean Atotxa estadioa inauguratu zuten, 80 urtez Errealaren zelaia izango zena.

• 1918ko apirilaren 25ean Gipuzkoako Federazioa sortu zuten, presidentea Salvador Diaz Iraola zela (Benito Diaz ospetsuaren anaia zena).

• 1923an Lippo Hertzka hungariarra hasi zen taldea entrenatzaile, modu profesionalean aritu zen lehena. Urte bereko martxoaren 18an Realak 2 eta 1 irabazi zion Irungo Real Union-i San Mames-en, Gipuzkoako Txapelketa erdietsiz. 1924-25, 1926-27 eta 1928-29 denboraldietan ere nagusitu zen Reala txapelketa hartan.

• 1928an galdu zuen Espainiako Txapelketaren finala, Santander-ren, FC Barcelonaren aurka.

• 1929an amaitu zen lehenengo Espainiako Liga, Reala laugarren postuan gelditu zela. Liga hartako golegile nagusia ("pichichi"), Paco Bienzobas jokalari txuri-urdina izan zen.

• 1931ko ekainaren 27an, Espainiako Bigarren Errepublika garaian, "Donostia F.C." izena hartu zuen klubak. Erregearen koroaren ordez, Donostiako ezkutua paratu zuen.

Lehen jaitsiera

Erreala 1952an Atotxako zelaian.

• 1935ean lehenengo aldiz bigarren mailara jaitsi ziren.

• 1936an, Espainiako Gerra Zibila zela-eta, Liga bertan behera gelditu zen.

• 1941eko urtarrilaren 8an, Realak (ordurako "Real Sociedad" izena berreskuratuta) inoiz partida batean sartu duen gol kopuru handiena lortu zuen, Valladoliden kontra 14 eta 2 irabaziz. Urte hartatik 1948 arte jaitsi eta igo ibili zen Lehen eta Bigarren mailen artean.

• 1946-47 denboraldian Benito Diaz entrenatzaileak "WM" sistema ingelesa lehenengo aldiz erabili zuen, Espainiako Ligan ezagutu gabekoa zena.

• 1951ko maiatzaren 27an Kopako txapeldunorde gelditu ziren, finalean FC Barcelonaren aurka galduta (3 eta 0). Urte haietan Ligako Lehenengo Mailan sendotu zen taldea.

• 1957an San Sebastián C.F. taldea sortu zuten, aurrerantzean "Sanse" izenaz ezaguna izan dena, bigarren talde gisan. Helburua, lehenengo talderako jokalariak lantzea.

• 1961-62 denboraldian jaitsi zen berriro, eta azkeneko aldiz, Bigarren Mailara. Bost urte igaro zituzten bertan.

Azken igoera

• 1967ko apirilaren 23an lortu zuten, azkenean, Maila nagusirako igoera, Andoni Elizondo entrenatzailea zela. Handik aurrera taldea maila honetan sendotu zen, 2007an berriz bigarren mailara jaitsi arte.

• 1974ko azaroaren 18an Europako txapelketa batean lehenengo aldiz jokatu zuten, Atotxan eta Banik Ostrava talde txekiarraren kontra (0 eta 1 galdu zuten).

Urte arrakastatsuak

• 1979-80 denboraldian Errealak, Alberto Ormaetxea entrenatzaile zuela, partidarik galdu gabeko errekorra lortu zuen Ligan: 32 norgehiagokoa hain zuzen ere. Hala ere, hurrengo urte arte itxaron behar izan zuten lehenengo Liga txapelketa eskuratzeko. Urte hartan, aldiz, Europako lehendabiziko garaipena erdietsi zuten, Milango Inter-ren aurka (2 eta 0).

• 1981eko apirilaren 26an, Gijon-en, Ligako txapeldun izaten lortu zuten historian lehenengo aldiz, Sporting-en aurka berdindu ostean, Zamorak azken minutuetan lortutako gol mitikoari esker. Taldean historiako jokalaririk garrantzitsuenetarikoak zebiltzan urte haietan: Arconada, Zamora, Lopez Ufarte eta Satrustegui tartean.

• 1982an bigarren Liga txapelketa eskuratu zuen taldeak, aurreko urtean lortutako arrakasta berrituz.

• 1983an Superkopa irabazi zuen, Real Madrid finalean gainditu ondoren (4-1). Urte hartan ere, Europako Kopan, final-erdietara iritsi zen taldea, inoizko urrunen. Alemaniako Hanburg-en aurka galdu zuten final handira sartzeko aukera.

• 1987an Errege Kopa lortu zuten Zaragozan, Atlético de Madrid partida ondoko (2-2) penaltien bidez garaitu ondoren. John Benjamin Toshack-en urte arrakastatsuak ziren hau eta ondokoak, Jose Maria Bakero, Aitor Begiristain edo Luis Maria Lopez Rekarte jokalariak tartean zeudela.

• 1988an Errege Koparen finalera ailegatu ziren bigarren aldiz jarraian. Oraingo honetan FC Barcelonak (hirugarren aldiz txuri-urdinen historian) eragotzi zien trofeoa lortzea. Bestalde, Ligan ere azpitxapeldun gelditu ziren.

• 1989an UEFA-ko final-laurdenetaraino iritsi ziren, inoizko urrutien. Alemaniako beste talde batek, Stuttgart-ek oraingoan, blokeatu zieten aurrerako bidea.

Krisialdia

• 2003an, aurreko urteetan Bigarren Mailara ez jaisteko lanak eduki ondoren, denboraldi bikaina burutu zuten eta Liga txapeldunorde izan ziren azkenean, Real Madrid-en atzetik. Denoueix zen orduko entrenatzailea, eta aipatzeko jokalarien artean Xabi Alonso, Javier De Pedro, Darko Kovacevic eta Nihat Kahveci zeuden.

• 2004an, urte asko ondoren Champions Leaguean estreinatzen dira. Lehenengo fasea pasa ondoren(Olinpiacos,Galatasaray eta Juventus), hurrengo fasean Lyonen kontra galduko dute. Eta ligan gorriak pasako dituzte. Championseko alineazioa hauxe zen: Sander Westerveld; Agustin Aranzabal, Gabriel Schurrer, Bjorn Tore Kvarme, Aitor Lopez Rekarte; Javier De Pedro, Xabi Alonso, Bittor Alkiza (edo Mikel Aranburu), Valery Karpin; Nihat Kahveci eta Darko Kovacevic.

• 2006an, Errealak aldaketa ugari jasan ditu. Hasteko 5 fitxaje berri egon dira, Gerardo Garcia, Malagako lateral ezkerra, Claudio Bravo, Colo-Colo taldetik etorritako atezain gaztea, Diego Rivas, Getafeko erdilaria, Fabio Felicio erdilari portugaldarra eta Juanito, Deportivo Alaveseko atzelaria. Gainera Igor Gabilondo, Sergio Boris eta Jose Javier Barkero taldetik joan ziren.

• 2007ko ekainaren 17an, 40 urtez lehenengo mailan aritu ondoren, bigarren mailara jaitsi zen taldea.

• 2007ko azaroaren 14an, taldearen egoera ekonomiko eta kirolekoa txarra zirela-eta, dimisioa aurkeztu zuen Maria de la Peña presidenteak, 2008ko urtarrilaren 3rako hauteskundeak deituz.

Mendeurrena

2009. urtean, Realak bere sorreraren mendeurrena ospatu zuen. Urtean zehar hainbat ekintza antolatu ziren, baina, ekintzarik garrantzitsuena Mendeurrenaren Partida izan zen 2009ko abuztuaren 15ean Donostiako Anoetako estadioan. Realak Cristiano Ronaldo, Kaká eta Xabi Alonsoren taldearen aurka jokatu zuen, hau da Real Madrilen aurka.

2009-08-15 22:00	Real Sociedad	0 – 2	Real Madril	Anoetako estadioa, Donostia Ikusleak: 26.000 Epailea: Pérez Lasa
			48' Benzema  90' Sneijder