Erregu (Erretorika)

Erregu, latinez "Deprecatio", pentsamenduko figura erretoriko bat da. Berez antzinako epikan erregu akusatu batek egiten zuen aitorpena zen baina, errukia eskatzeko, erruak aitortzerakoan, aldi berean, haren merituak azaltzen zituen .

Museei inspirazioa eskatzeko testuak ere erregu figuraren bidez antola daitezke (Konstantin Makovskyren Poesiaren Musa)

Modu orokorrago ulertuta, baita beste gizaki bati egiten zaion erregu bezala uler daiteke ere edo otoitz bidez gaitz bat urruntzeko eskaera bezala ere. Errenazimendutik aurrera "poesian maiteari edo norbaiti, Jainkoari edo Ama Birjinari errukia, barkamendua edo zerbait eskatzeko erabili izan da".

Tradizioan ere museei inspirazioa eskatzeko erabiltzen zen figura hau. Denborarekin musen ordez Birijina izan zen horrelako eskaeren helburua. Aipatutako Literatura Hiztegian Orixeren adibide klasikoa aipatzen da; Euskaldunak (1950) liburuaren hasieran irakur daiteke:

Zatozkida goi-arnas

eizu nerekin lan

herri baten arnasa

mamitu dezadan.

Hona hemen Gabriel Arestiren beste adibide bat, "Mugak" poema. Bertan beste intelektualeei bere pekatuak erakusten dizkie gero guztiak zuritzeko, are gehiago, euskaldun jator baten ezaugarriak direla adierazteko.

Ene euskalduntasunak

bere mugak ditu:

Kontuan har ezazue,

zuek, Traukoko eta Oiartzungo Xabier biok,

Josepe Luis,

Serafin,

Juanito.

Ene euskalduntasunaren mugak hauk

dira: Ifarrean: Justizia.

Hegoan: Libertatea.

Oestean: Gizonak bizitze noble bat edukitzea (astean bi egunetan

jai eta urtean behin sabbotnik).

Lestean: Mutikoek (eta neskatxek) estudiatzeagatik alokairu sufizient bat

irabaztea.

Eta muga hauk ez dituen euskalduna

ez da euskaldun,

gizon ez delako.

Blasfemo hau

neure odolaz firmatzen dut

aurtengo lan jaian

Trapaga haranean.

Bibliografia

• Euskaltzaindia: Literatura terminoen hiztegia. Bilbo: 2008. 227-228.or. Xabier Altzibar eta Juan Kruz Igerabideren artikulua.
• Angelo Marchese eta Joaquín Forradellas: Diccionario de retórica, crítica y terminología literaria. Bartzelona: Ariel, 1982. 93.or.

Kanpo estekak

• Euskaltzaindiaren Literatura Terminoen Hiztegia.

• Datuak: Q8354899