Hezurdura

Balea urdin baten eskeletoa

Hezurdura edo eskeletoa (antzinako grezieraz σκελετος, skeletos = "gorputz lehortua", "momia"), biologian, animalien zati bigunak eta giharrak jasaten eta babesten dituen armazoi gogorra da. Hiru eskeleto mota daude:

• exoeskeleto edo kanpo-hezurdura , organismoaren kanpoaldean dagoena. Ornogabe askok daukate, hala nola intsektuek (kilkerrek, labezomorroek) , krustazeoek (karramarroek, otarrainek) eta moluskuek (barraskiloek, txirlek). Koralen kaltzio karbonatozko estalkia ere exoeskeletoa da.

• endoeskeleto edo barne-hezurdura, organismoaren barnealdean dagoena. Kordatuek eta ekinodermoek daukate horrelako eskeletoa. Ornodunetan bi ehun klasek osatzen dute: hezurrek eta kartilagoek.

• hidroeskeleto edo hezurdura hidrostatikoa, fluidoz beteriko barrunbe bat da, zelomatikoa edo pseudozelomatikoa, giharrez inguratua dagoena. Fluidoaren presioak eta giharren ekintzak gorputzaren forma aldatu eta mugimendua sortzen dute. Ekinodermo, anelido, nematodo eta beste ornogabe batzuen lokomozioan parte hartzen du.

Ikus, gainera

• Giza hezurdura