Europako Banku Zentrala

Europako Banku Zentralaren egoitza Frankfurten.

Europako Banku Zentralak euroaren barneko herrialdeen interes-tasak finkatzen dituen europar erakundea da. Guztira hamasei herrialderen interes-tasak ezartzen zituen 2009. urtean. Interes-tasak ezartzeaz gain, moneta-politika gauzatzea du helburu, horretarako diru kopurua handitu edo gutxituz.

Ezaugarriak

Europako Banku Zentralaren funtzio nagusia Ekonomia eta Diru Batasuneko diru politika ezartzea da (interes tasak ezarri eta diru eskaintza kontrolatu). Bestalde, dibisa eragiketak ere egiten ditu (euroaren eta munduko gainontzeko dibisen arteko truke tasa politika), herrialde kideen dibisa erreserba ofizialak bere esku baititu. Era berean, txanpon eta diru-papera jaulkitzeaz arduratzen da, eta baita diru batasunetik kanpora gelditu diren herrialdeen ekonomiekin koordinazio lana egiteaz ere. Europako Banku Zentralaren helburu nagusia prezioen egonkortasuna bermatzea da, eta ekonomia eta diru batasuna gauzatzeko ezinbesteko erakundea da. Sortu ahal izateko, lehenengo, diruaren batasunaren prozesuan parte hartu zuten herrialdeetan, autonomia eman zitzaien lekuan lekuko Banku Zentralei diru politikaren arloan, ondoren, banku zentral nazionalek Europako Banku Zentralari diru politikari buruzko subiranotasuna eman ziezaioten. Europako Banku Zentrala diru politika ezartzeko organo zentrala izan arren, herrialde bakoitzeko Banku Zentralekin harremana izango du, sakonago ezagutzen baitituzte lekuan lekuko ekonomien ezaugarriak. Europako Banku Zentralak eta Ekonomia eta Diru Batasunean parte hartzen duten herrialdeetako Banku Zentralek, Europako Banku Zentralen Sistema osatzen dute.

Historia

Erakundea 1998an sortu zuen Europar Batasunak, eta egoitza nagusia Frankfurten du. Bere lehen lehendakaria Wim Duisemberg izan zen. 1999ko urtarrilaren 1ean, euroaren ezarketaren batera, EBZa erakunde ofizial bihurtu zen, eta nahiz eta herrialdeetako txanpon ofizialak 2002. urterarte txanpon ofizialak izaten jarraitu, herrialde horietako banku-zentralek 1999an utzi zioten erakunde europarrari interes-tasen gaineko eskumen guztiak.

Bankuko presidenteak

• Wim Duisemberg (1998-2003)
• Jean-Claude Trichet (2003-2011)
• Mario Draghi (2011-)

Kanpo loturak

• (Ingelesez) Europako Banku Zentralaren webgunea.

Artikulu hau ekonomiari buruzko zirriborroa da. Wikipedia lagun dezakezu edukia osatuz.