Euskal Herria Bai
Euskal Herria Bai1 | |
---|---|
Sorrera | 2007 |
Ideologia politikoa | Subiranotasuna, independentismoa, sozialismoa, ezker abertzalea, antiinperialismoa, feminismoa, euskaltzaletasuna, demokrazia parte-hartzailea, aurrerakortasuna, sozialdemokrazia |
www.ehbai.eus | |
1Abertzaleen Batasuna, Batasuna eta Eusko Alkartasunaren arteko koalizioa. |
Euskal Herria Bai (laburtua EH Bai) Ipar Euskal Herriko alderdi politikoen koalizio abertzale eta ezkertiar bat da. Abertzaleen Batasunak (AB), Batasunak eta Eusko Alkartasunak (EA) osatzen dute.
Osaera eta programa
Koalizioa osatzeko, bere burua abertzale jotzen duten alderdiak bildu ziren : EAJ, Abertzaleen Batasuna, Batasuna eta EA. EAJ alderdiak ez ezik, beste eragileek Euskal Herria Bai koalizioa eraikitzen hasi ziren elkarrekin.
Euskal Herria Bairen programa politikoaren puntu nagusiak ondoko hauek dira:
- Euskal Herriaren onarpena eta errespetua. Bere etorkizuna erabakitzeko eskubidea.
- Helburu politikoak lortzeko bide demokratiko eta politikoen erabileraren aldeko jarrera.
- Ipar Euskal Herriarendako berezko marko instituzionala.
- Euskarak, frantsesarekin batera, Ipar Euskal Herriko hizkuntza koofizial estatusa eskuratzea.
- Jendarte alorreko politika aurrerakoiak bultzatzea.
Historia
2014ko abenduaren 5ean jakin zenez, barne antolaketan "salto kualitatibo bat" emango zuen EH Baik abenduaren 20an eta 2015eko kantonamendu hauteskundeetan kantonamendu guztietan ordezkaritza lortzea espero zuen[1].
Abenduaren 20an, EH Baik koalizio izatetik mugimendua izatera igarotzea erabaki zuen. Talde lokaletan eta ez alderdietan oinarritzea erabaki zuten biltzarrean[2].
Hauteskundeak
2007ko Hauteskunde Legegileak
2007ko ekaineko hauteskunde legislatiboetara aurkeztu zen, lehen itzulian (ekainaren 10ean) 10.600 bozkatik gora lortuz[3]. Emaitza onenak VI. barrutian lortu zituen (Lapurdi hegoaldea), botoen %9,09 eskuratuz. Halaber, abertzaleak sei herritan izan ziren lehen indar politikoa: Muskildin, Ozazen, Bunuzen, Gamarten, Izuran eta Lexantzün. Hala ere, Ipar Euskal Herriko hiru barrutietan ez zuen lortu bigarren itzulira igarotzeko boto nahikorik. Koalizioak herritarren esku utzi zuen hauteskundeetako bigarren itzulian zer egitearen erabakia[4].
2008ko Herriko Etxeetako eta Kantonamenduetako Hauteskundeak
Euskal Herria Baik martxoaren 9an eta 16an egin beharreko udal eta kantonamendu hauteskundeen aurrean, hautagaitzak kantonamendukoetara aurkeztu zituen, ez, aldiz, herriko etxekoetara. Kantonamenduko hauteskundeen bidez, Pirinio Atlantikoetako Kontseilu Nagusiko hautetsiak aukeratzen dira. Kantonamenduen erdietako hautetsiak hiru urtean behin berritzen dira, eta 2008ko hauteskundeetan EH Bai hamaika eremutan aurkeztu zen,[5] Abertzaleen Batasuneko Jean Michel Galantek Baigorriko Kantonamenduan zuen hautetsi postua mantentzeko xedearekin.[6] Alain Iriart, ABkoa eta Hiriburuko alkatea, EH Baitik kanpo aurkeztu zen.[7]
2011ko Kantonamenduetako Hauteskundeak
2011ko martxoaren 20 eta 27an Kantonamenduetako hauteskundeak egingo dira Ipar Euskal Herriko 10 kantoietan: Baiona Mendebaldea, Baiona Iparraldea, Baiona Ekialdea, Angelu Iparraldea, Miarritze Mendebaldea, Hazparne, Bastida, Iholdi, Garazi eta Atharratzen. Euskal Herria Baik 9 zerrenda aurkeztuko ditu, Angelu iparraldean Angelu zain talde abertzaleak zerrenda aurkeztuko duenez, ez baitu zerrenda propiorik prestatu. Hauek dira EHBAIren hautagaiak:
- Atharratze: Gilen Iriart da hautagaia, eta Aurore Martin da haren ordezkoa.
- Baiona Ekialde: Maite Etcheverry da hautagaia, eta J. Michel Harrosteguy da haren ordezkoa.
- Ipar Baiona: Pierre Noqueret Mo da hautagaia, eta Janine Foix da haren ordezkoa.
- Baiona Mendebale: Peio Menta da hauragaia, eta Stéphanie Marriacia da haren ordezkoa.
- Bastida: Xebax Christy da hautagaia, eta Martine Salla da haren ordezkoa.
- Donibane Garazi: Dominique Baxo da hautagaia, eta Maider Larrieu da haren ordezkoa.
- Hazparne: Juliette Bergouignan da hautagaia, eta Philippe Saint-Esteben ordezkoa.
- Iholdi-Oztibarre: Daniel Olzomendi da hautagaia, eta Anne Pagola ordezkoa.
- Miarritze mendebaldea: Maialen Etcheverry da hautagaia, eta Peio Abeberry ordezkoa.
2012ko Hauteskunde Legegileak
2012ko ekainaren 10ean egindako hauteskunde legegileetako lehen itzulian Euskal Herria Baiko hautagaiek Ipar Euskal Herriko hiru hauteskunde barrutietan, 11.518 bozka lortu zituzten. Ipar Euskal Herriko hirugarren indar bihurtu zen[8] Oraingo honetan Eusko Alkartasunak ez zuen koalizioan parte hartu, Europe Écologie Les Vertsekin batera Amalur koalizioa osatu zuelarik.
- Anita Lopepek 3.492 boto (%6,80) lortu zituen IV barrutian (Oloroe-Maule-Donibane Garazi) %13,8 euskal lurraldeetako emaitzak bakarrik kontuan hartutik.
- Laurence Hardouinek 2.626 boto (%5,28) V. barrutian (Baiona).
- Peio Etxeberri-Aintxartek 5.400 boto (%9,78) VI. barrutian (Miarritze-Hendaia).
2015eko Departamendu Hauteskundeak
2015eko martxoaren 22an eta 29an eginiko Departamendu Hauteskundeetan EH Baik Ipar Euskal Herriko kantonamenduetan boz guztien %16a eskuratu zuen lehen itzulian, hirugarren indarra izanik. Horrela, inoizko emaitzarik hoberenak lortu zituen.
Emaitzak
Kantonamenduetako hauteskundeak 2008-2011 | |
---|---|
Amikuze | 531 (%8.86) |
Angelu Hegoaldea | 765 (%8.53) |
Angelu Iparraldea | Ez da aurkezten |
Atharratze | 156 (%7,93) |
Baigorri | 1.300 (%31.8) |
Baiona Ekialdea | 218 (%7,90) |
Baiona Iparraldea | 136 (%2.76) |
Baiona mendebaldea | 315 (%6.41) |
Bastida | 438 (%15,35) |
Bidaxune | 260 (%8.08) |
Donibane Lohizune | 1.840 (%15.07) |
Ezpeleta | 1.728 (%22.23) |
Donibane Garazi | 672 (%18,93) |
Hazparne | 780 (%19,70) |
Hendaia | 1.693 (%12.17) |
Hiriburu | 547 (%6.81) |
Iholdi | 885 (%32.12) |
Maule | 638 (%9.58) |
Miarritze ekialdea | 644 (%9.73) |
Miarritze mendebaldea | 171 (%4,64) |
Uztaritze | 2.356 (%19.58) |
GUZTIRA | 16.073 |
Frantziako legebiltzarra 2007, herrialdeka | |
---|---|
Lapurdi | 7.546 (%7,21) |
Baxe-Nafarroa | 2.334 (%14,27) |
Zuberoa | 776 (%9,32) |
GUZTIRA | 10.656 (%8,52) |
Erreferentziak
- ↑ «Barne antolaketan "salto kualitatibo bat" emango du EH Baik abenduaren 20an», Berria, 2014-12-06
- ↑ Nora Arbelbide, «EH Bai: koaliziotik mugimendura», Berria, 2014-12-21
- ↑ Euskal Herria Baik emaitza onak lortu ditu, Berria, 2007ko ekainaren 11
- ↑ Abertzaleak bat, botoak asko, Berria, 2007ko ekainaren 14a
- ↑ 49 hautagaitza Iparraldeko kantonamendu hauteskundeetan, Eitb24, 2008ko otsailaren 23a
- ↑ Hautagaia lortzea, Euskal Herria Bairen xedea, Eitb24, 2008ko urtarrilaren 11
- ↑ Sólo EH Bai presenta candidaturas uniformes en todos los cantones, Gara, 2008ko otsailaren 23a
- ↑ EH Bai hirugarren indarra da, eta eskuan du bigarren itzulirako gakoa, Berria, 2012ko ekainaren 6a
Kanpo loturak
- (Frantsesez) Euskal Herria Bairen webgunea
- Euskal Herria bai. Alderdi abertzaleak elkarrekin behingoz? Erreportajea Argia astekarian (2007-03-11)