Georges Balandier
Georges Balandier (Aillevillers, egungo Aillevillers-et-Lyaumont, Frantzia, 1920ko abenduaren 21a - Paris, 2016ko urriaren 5a) frantses antropologo eta soziologoa izan zen.
Biografia
Filosofia eta Letretako ikasketak egin zituen, Bigarren Mundu Gerran erresistentzia-taldeetako kide izan aurretik. École Pratique des Hautes Études ikastetxean, Gizarte Zientzietako ikasketaburu izendatu zuten 1954an, eta Sorbonako irakasle, 1962an. Urte horietan ekin zien Afrikari buruzko ikerketei, eta orduan argitaratutakoak dira: "Afrika beltzaren egungo soziologia" (1955), "Afrika anbiguoa" (1957) eta "Eguneroko bizitza Kongoko Erresuman XVI. mendetik XVIII. mendera" (1965). Ikerlan horietan, gizarte-aldaketa bultzatzen duten eragile demografikoak, ekonomikoak eta kulturalak adierazi eta lotzen dira.
Europako gizarteak ere ikertu zituen "Sena eta boterea" (1971) liburuan, eta, ikerketa antropologikoari jarraituz, gizarte-antolaketarik ezak eragiten dituen gizataldeen erantzunak aztertzen ditu "Desordena" (1988) liburuan. Politika-ikuspegitik, etengabeko deskolonizazio hitzartua defendatu zuen Balandierrek. Baztertu egin zuen ikerketa-metodo estrukturalista "Antropo-logikoa" (1974) liburuan, haren iritziz ez baitu kontuan hartzen gizarteen mugimendu etengabea. Gaur egun, Paris V-Descartes unibertsitateko irakasle emeritua da, Gizarte Zientzietako Goi Ikasketen Eskolako ikasketa-zuzendaria eta Afrikar Ikasketen Zentroko kolaboratzailea.
Erreferentziak
 |
Wikimedia Commonsen badira fitxategi gehiago, gai hau dutenak: Georges Balandier  |
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.