Gladys Greene
Gladys Greene (izengoitia: Jean Arthur) estatubatuar zinema-antzezlea izan zen (New York, 1900 - Carmel, Kalifornia, 1991). Argazkietarako modelo-lanak egin ondoren, zineman John Forden Cameo Kirby (1923) filmarekin egin zuen debuta. Columbia etxeak kontratatu zuen, eta film soinudunak egiten hasi zirenean, komediaren generoan espezializatu zen. Zuzendaririk handienekin lan egin zuen: John Fordekin The Whole Town´s Talking (1934), Cecil B. De Millerekin The Plainsman (1936), Frank Borzagerekin History is Made at Midnight (1937), Mitchell Leisenekin Easy Living (1937), eta Frank Caprarekin Mr. Deeds Goes To Town (1936), You Can´t Take it With You (1938) eta Mr. Smith Goes To Washington (1939). Azken film hauetan Gary Cooper eta James Stewartekin batera jardun zuen protagonista gisa. 1940ko hamarraldian film gutxiagotan parte hartu zuen: Billy Wilderren A Foreign Affair (1948), eta George Stevensen The Talk of Town (1942), The More the Merrier (1943) eta Shane (1953). Hori izan zen bere azken filma. Ondoren, telebistako zenbait programatan ere agertu zen.
Erreferentziak [aldatu]
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek Creative Commons Aitortu 3.0 Espainia lizentziarekin argitaratu ditu, Open Data Euskadi webgunean.
