Jacques Maritain
Jacques Maritain (Paris, Frantzia, 1882ko azaroaren 18a - Tolosa Okzitania, Frantzia, 1973ko apirilaren 28a) filosofo katolikoa izan zen.
Bizitza
Filosofia-ikasketak bukatu ondoren, katoliko egin zen. Bergsonen filosofiaren eta materialismo ororen aurkari sutsua izan zen; Tomas Akinokoaren filosofiaren interpretazio berri bat eskaini zuen, humanismo kristau berri baten ildotik. 1936ko Espainiako Gerra Zibilaren garaian, Hego Euskal Herriko katoliko abertzaleen jokabidearen aldeko izan zen Frantzian, kristau integristen aurka, eta harreman estuak izan zituen gerraondoan erbestean ziren euskal herritar buruzagi batzuekin, Agirre lehendakariarekin, besteak beste. Filosofia, politika, estetika eta egunoroko arazoei buruz idatzi zuen.
Obra nagusiak
- De la philosophie chrétienne (1933, Kristau filosofiaz)
- Humanisme intégral (1936, Humanismo bete-betea)
- Principes d´une politique humaine (1944, Giza politika baterako oinarriak)
- Intuition créatrice en art et en poésie (1962, Sorkuntzarako sena artean eta poesian).
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.