Joanes Lur Gabea

Joanes Lur Gabea

Joanes Lur Gabea (ingelesez Lackland, frantsesez Sans Terre) ezizenez ezaguna, (Oxford, 1166ko abenduaren 24a – Newark-on-Trent, 1216ko urriaren 19a) Ingalaterrako erregea izan zen 1199 eta 1216 bitartean.

Aita Henrike II.a Ingalaterrakoa eta ama Leonor Akitaniakoa zituen. Akitaniako dukea izan zen aurreko urteetan; haren agintaldian geratu zen Lapurdi Akitaniako dukerriaren barnean, eta bera errege zelarik hornitu zen Baiona hiri-gutun berri batez (1215).

Filipe Augusto Frantziako erregearen laguntzaz, aitaren eta bere anaia Rikardo I.aren aurkako saioak egin zituen, eta Ingalaterrako errege izendatu zuten azken hau oinordekorik gabe hil zenean, bere iloba Artur Bretainiako dukearen kaltetan. 1202. urtean, Filipe Augusto Frantziakoak Normandia, Anjou, Maine, Touraine eta Poitou gabe uztea deliberatu zuen, Elisabet Angulemakoa berekin eramateagatik (orduan hasi zitzaion Lur Gabea esaten Frantzia aldean). Filipe Augustok Normandia konkistatzeari ekin eta Arturren esku utzi zuen gainerako lurraldeak hartzeko kargua. 1203. urtean hil zuen Artur Joan Lur Gabeak berak, eta Bretainia gabe geratu zen, bertako matxinadari ezin eutsi izan ziolarik. Ondoko urteetan Normandia (1204) eta Touraine (1205) galdu zituen.

Ezkontza eta seme-alabak

1189an Elisabet Gloucesterkoa ezkondu zuen baina ez zuten seme-alabarik izan eta ezkontza indargabetu zuen.

1200an Elisabet Angulemakoa ezkondu eta bost seme-alaba izan zituzten:

• Henrike (1207-1272), oinordekoa.
• Rikardo (1209-1272), Cornwallgo dukea.
• Joana (1210-1238), Alexandro II.a Eskoziakoa ezkondu zuena.
• Elisabet (1214-1241), Federiko II.a Germaniako Erromatar Inperio Santukoa ezkondu zuena.
• Leonor (1215-1275), Gilen Marshal Pembrokekoa eta Simon Montfortekoa ezkondu zituena.

Artikulu hau Erresuma Batuko biografia bati buruzko zirriborroa da. Wikipedia lagun dezakezu edukia osatuz.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek lizentzia librearekin laga zituen, euskal Wikipedia osatzeko proiektu baterako.