Jorge Edwards

Jorge Edwards Valdés (Santiago, Txile, 1931ko ekainaren 29a) txiletar idazle, kazetari, literatura kritikari eta diplomazialaria da. 1999an Cervantes saria eman zioten.

Biografia

1957an sartu zen karrera diplomatikoan. Salvador Allenderen garaian, Parisen egon zen enbaxadore. Haren aurkako estatu kolpearen ostean, kargu guztiak utzi eta Espainiara erbesteratu zen.

1952an argitaratu zuen lehen liburua, El patio, kontakizun laburren bilduma. Literatura-genero horretan, Las máscaras ere idatzi zuen (1967). Baina eleberrigintzan lortu du osperik handiena: Gente de la ciudad (1961), El peso de la noche (1964). Goi-mailako burgesiaren giroa islatzen du eleberri horietan. Persona non grata (1973) eta Los convidados de piedra (1978) eleberrietan, berriz, idazlea eta konpromisoaren gaia ditu hizpide, Txileko orduko egoera politikoaren ikuspuntutik. Beste lan batzuk, Fantasmas de carne y hueso (1993), El origen del mundo (1996), El sueño de la historia (2000), El inútil de la familia (2004), La casa de Dostoievsky (2008) eta La muerte de Montaigne (2011) dira.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Datuak: Q171672
Multimedia: Jorge Edwards / Q171672