Jose Maria Setien

Jose Maria Setien
Irudi gehiago
Donostiako Gotzaina 1979ko otsailaren 16a - 2000ko urtarrilaren 13a ← Jacinto Argaia - Juan Maria Uriarte → Elizbarrutia: Donostiako elizbarrutia apezpiku tituludun 1972ko irailaren 18a - Elizbarrutia: Zama Minor (en) apezpiku laguntzaile 1972ko irailaren 18a - Elizbarrutia: Donostiako elizbarrutia
Bizitza
Jaiotza	Hernani, 1928ko martxoaren 19a
Herrialdea	Gipuzkoa, Euskal Herria
Heriotza	Donostia, 2018ko uztailaren 10a (90 urte)
Heriotza modua	: istripu zerebrobaskularra
Hezkuntza
Hizkuntzak	gaztelania euskara
Jarduerak
Jarduerak	apaiz katolikoa, apezpiku katolikoa eta apezpiku katoliko latindarra
Enplegatzailea(k)	Salamancako Unibertsitatea
Sinesmenak eta ideologia
Erlijioa	Erromatar Eliza Katolikoa

Jose Maria Setien Alberro (Hernani, Gipuzkoa, 1928ko martxoaren 18a – Donostia, 2018ko uztailaren 10a) Erromatar Eliza Katolikoko apezpikua izan zen, Donostiako elizbarrutiko apezpikua.

Bizitza

1944an, batxilergo ikasketak amaitu zituen Donostian, eta Gasteizko seminarioan sartu zen apaiz ikasketak egitera.

1951an presbitero ordenatu edo apaiztu zuten Donostiako Artzain Onaren katedralean.

Ondoren, Erromako Pontificia Università Gregorianan ere egon zen ikasketak osatzen. Bertan, Teologian lizentziatu eta Zuzenbide Kanonikoan doktoretza egin zuen.

1955ean, Teologia Moraleko irakasle eta arima zuzendari izan zen Gasteizko seminarioan. Halaber, Gasteizko Teologia fakultateko irakasle izendatua izan zen.

1960-1972. urteetan Salamancako unibertsitateko Teologia fakultatean katedradun eta dekano izan zen, zuzenbidea eta teologia irakatsiz. Garai berean, pastoraltzako bikario nagusi izendatua izan zen Santanderko elizbarrutian, eta helduen bokazioko El Salvador mintegiko erretore izan zen Salamancan. Aldi berean, Salamancako Colegio Hispanoamericanoko arima zuzendari izan zen.

1972ko irailean, Zama Minor-ko apezpiku tituludun izendatua izan zen, eta 1972ko urrian apezpiku egin zuten Donostiako Artzain Onaren katedralean. Apostolutza Sozialeko Apezpiku Batzarreko kide (1975-1978); Fede Dotrinarako Apezpiku Batzarreko kide (1975-1984) eta Apostolutza Sozialeko Apezpiku Batzarreko kide (1978-1984) izan da.

1979an, Donostiako apezpiku izendatua izan zen. Paulo VI.ak ordenatu zuen. Espainiako Apezpiku Batzarreko Batzorde Iraunkorreko eta Batzorde Betearazleko kide (1984-1989). Apostolutza Sozialeko Apezpiku Batzordeko lehendakaria eta Batzorde Iraunkorreko kide (1984-1989).

Hainbat liburu eta artikulu idatzi ditu moral politikoari eta sozialari buruzkoak eta zuzenbide kanonikoari buruzkoak, bereziki. Besteak beste, "Setien. Un obispo vasco ante ETA".

1979. urteaz geroztik Donostiako Elizbarrutiko Gotzain izan ondoren, 2000. urteko urtarrilean uko egin zion karguari, eta beraren ordez Juan Maria Uriarte izendatu zuten gotzain. Hain zuzen ere, urte hartan iktus bat jasan zuen.

Donostiako Elizbarrutiko buruzagitzan eman zituen urteetan kritika gogorrak jaso zituen sektore eta alderdi ez abertzaleen aldetik. Bere iritzi politiko asko eztabaidagarriak izan dira Espainiako hedabideetan.

Azkenik, 2018ko uztailaren hasieran beste iktus batek jo zuen, eta hilaren 10ean hil zen Donostia Ospitalean, Zainketa Intentsiboen Unitatean. 90 urte zituen.

Kanpo estekak

• Donostiako elizbarrutiaren fitxa
• Jose Maria Setien Inguma datu-basean
• (Ingelesez) www.catholic-hierarchy.org

• Datuak: Q206274
• Multimedia: José María Setién Alberro / Q206274