Kaldereroak
Kaldereroak Euskal Herriko zenbait herrietako inauteri-zikloko jai bat da, kaleetan zehar mozorroturik eta kantuz konpartsa batzuek antzinako Europako ekialdeko ijito pertza-konpontzaileak eta euren familiak irudikatzen dituztela, pertzak eta zartaginak joaz eta maiz hartzarena egiten duen pertsonaia batekin batera. Zuberoako maskaradan ere kaldereroak irudikatzen dituzten pertsonaiak daude, kauterak izenekoak. Inauterien aurrekari moduan ospatzen da, inauteri nagusien aurreko asteburuan gehienetan eta otsaileko lehen larunbatean Donostian. Hain zuzen, Donostian ospatu zen lehen aldiz jaia 1884 urtean eta bertan dago jaia ospatzeko tradizio zaharrena, non konpartsak Raimundo Sarriegi eta Adolfo Combaren konposizioen doinuak abestuz ateratzen diren.
