Karidadeko Benta

Karidadeko Benta
Datuak
Jatorria	Zumaia (Gipuzkoa)
Urteak	2003 - 2007
Produkzioa
Diskoetxea(k)	Gaztelupeko Hotsak, Baleike
Taldekideak
	Jon Maia; Aran Santamaria; Inaxio Tolosa; Jon Mantzisidor; Imanol Manterola; Domentx Uzin

Karidadeko Benta estilo eklektikodun Euskal Herriko musika taldea izan da, Jon Maia bertsolariaren inguruan 2003an sortutakoa. Lau urteko ibilbidearen ostean, 2007an desegin zuten.

Taldearen musika estiloa Balkanetan aski ezaguna den balkan brass generoan sailka daiteke.

Sorrera[aldatu | aldatu iturburu kodea]

ETB1eko Hitzetik hortzera bertsolaritza saioak egindako eskaera baten haritik sortu zen taldearen ideia. Bertso batzuk musikatzeko eskatu zieten hainbat bertsolariri, horien artean Jon Maiari, eta honek hiru perkusio jotzailerengana jo zuen. Emaitzarekin gustura geratu eta aurrera segitzea erabaki zuten, taldearen soinua instrumentu gehiagorekin aberastuz: gitarra, klarinetea, saxofoia...^[1]

Taldea[aldatu | aldatu iturburu kodea]

Bertsoak, koplak eta munduko hainbat erritmo eta doinu herrikoi uztartu zituen Karidadeko Benta taldeak. Zumaian (Gipuzkoa) sortu zen garai bateko orkestratxo ibiltarien filosofiarekin, eta ibilbide laburra baina emankorra izan zuen, lau urtean hiru disko grabatuz. Azken kontzertua 2007ko irailaren 5ean eman zuten azken kontzertua Getxoko Folk Jaialdian, taldea bere onenean zegoela eta partaideek horrela erabakita. Haren grabazioa DVD batean jaso zuen, Lehengo munduaren azkena. ^[2]

Hiru disko grabatu zituen Karidadeko Bentak lau urteko tartean. Lehena grabatu aurretik bi urte eman zituen kontzertuak eskaintzen, eta emanaldiotan pilatutako kantuak bildu zituen taldeak disko horretan. Bigarrenean, kantuak disko baterako intentzioarekin sortuak izan ziren eta taldeak argiago zuen nola jaso grabazioan. Hirugarrenak erritmo dantzagarriagoak eta elektrikoagoak ditu. Hiru diskoetan Maiak sortu zituen hitzak, eta Manzisidorrek doinuak. Halaber, bertsolari zaharren aleak musikatu zituzten lehen bi lanetan: Pello Errotarenak, Txirritarenak, Xenpelarrenak… Azken horren kasuan, “Ia gureak egin du” bertso sortari Leonard Cohenen “Take this Waltz” kantuaren doinua jarri zioten^[1].