Languedoc-Roussillon

Languedoc-Roussillon
— Frantziako eskualdea —
Prefektura	Montpellier
Departamenduak	Aude Gard Hérault Lozère Ekialdeko Pirinioak
Gobernua - Presidentea - Prefeta	Christian Bourquin (PS) Michel Thenault
Eremua - Guztira	27.376 km²
Biztanleria (2007) - Guztira - Dentsitatea	2.565.000 93.7 bizt/km²
Azpibanaketak - Barrutiak - Kantonamenduak - Udalerriak	14 186 1.545
Eskualdeko Kontseiluaren webgunea

Languedoc-Roussillon (okzitanieraz Lengadòc Rosselhon, katalanez Llenguadoc-Rosselló) Frantziako hegoaldeko eskualdea da. Okzitaniako lurraldea ere bada. Hegoaldean, Ipar Kataluniako lurraldea ere hartzen du.

Hiribura Montpellier da.

27.376 km² ditu eta 2.565.000 biztanle (2007).

Geografia

Mugakideak

Iparraldean, Auvergne eta Rhône-Alpes; ekialdean, Provence-Alpes-Côte d'Azur eta Mediterraneo itsasoa (Liongo golkoa); hegoaldean, Hego Katalunia, eta mendebalean, Midi-Pyrénées.

Departamenduak

Aude, Gard, Hérault, Lozère eta Ekialdeko Pirinioak dira Languedoc-Rousillon eskualdea osatzen duten bost departamenduak.

Hiri nagusiak

Montpellierrez gain, Carcasona, Narbona, Perpinyà, Nimes eta Mende dira hiri nagusiak.

Orografia eta klima

Lozèreko paisaia, Languedoc-Roussillon.

Lurralde guztiz desberdinak bereizten dira Languedoc-Roussillonen: Lozèren, iparraldean, zabaltzen dira Massif Centraleko mendiak (Lozère mendia, 1.702 m) eta Ekialdeko Pirinioak hegoaldean (Carlitte, 2.991 m; Canigu, 2.786 m). Itsasaldea laua da eta Languedoceko goi-eremuak (Corbières, 1.200 m; Espinouse, 1.100 m) mendebalean zabaltzen dira.

Klima mediterraneo aldekoa da, eguzkitsua eta idorra, uda aldean batez ere, eta eurialdi labur baina indartsuak ekartzen ditu, udazkenean bereziki. Mistralak eta tramontanak, lehorreko haizeek, tenperatura aldaketa handiak ekarri ohi dituzte eta, oro har, alde handiak daude neguko eta udako tenperaturen artean, barnealdean bereziki.

Ekonomia

Audeko paisaia, Languedoc-Roussillon.

Laborantza da ekonomia jarduera nagusia. Ardogintza nabarmentzen da jarduera guztien artetik (450.000 ha), baina gero eta garrantzi handiagoa hartzen ari da barazki eta fruituen ekoizpena, ureztatze sistema modernoei esker. Arrantza portuak txikiak dira, Sètekoa izan ezik (Frantziako zazpigarrena). Industria maila apalekoa da: ehungintzak tradizio handia du (artilea eta zeta) eta bizkortu egin da laborantzari loturiko industria (kontserbak). Kimika, elektromekanika eta elektronika industriak badu bere garrantzia Hérault aldean. Ekonomia atal garrantzitsu bat osatzen du turismoak, hala kostaldean (hondartzak 160 km-tan zehar) nola barnealdean (Pirinioak eta Lozère, Cèvennes eta Languedoceko parkeak).

Biztanleak

Hizkuntzak: okzitaniera, katalana eta frantsesa.

XX. mendeko lehen erdian, biztanleen % 8,5 galdu zuen Languedoc-Roussillon lurraldeak eta 1960. urtetik aurrera hasi ziren bertan finkatzen Aljeriatik zetozen familia frantsesak (140.000 lagun guztira). 1970etik aurrerako urteetan biziki handitu dira hirialdeak (biztanleen % 70 bizi da Montpellier eta Carcasona aldean) eta areagotu egin da herri txikietako emigrazio prozesua. Montpellier da lurralde honetako administrazio, kultura eta ekonomia hiri nagusia.

Pertsonaia ezagunak

• Georges Brassens (1921-1981), abeslaria.

Kanpo loturak

• Languedoc-Roussillon eskualdeko webgune ofiziala (Frantsesez)