Leitmotiv

Sigfridoren leitmotiva Wagnerren Sigfrido operan

Leitmotiva ezaugarri-balioa duen gaia da, musikaz kanpoko esanahi dramatikoa duena, eta obran zehar aldika errepikatzen dena (alemanez, gidalerroa esan nahi du: leiten gidatu, eta Motiv motiboa).

Pertsonaia, egoera edo ideia abstraktu bati antzemateko edo gogora ekartzeko erabil daiteke. Musikagile askok erabili izan dute: Mozartek Così fan tutte operan eta Weberrek Der Freischütz operan, adibidez; Berliozek Symphonie fantastique lanean erabili zuen, Mendelssohnek Elias oratorioan eta Richard Straussek operetan. Baina Wagnerrek aldatu eta eraman zuen leitmotiva maila gorenera, azken lanetan batez ere. Der Ring des Nibelungen (Nibelungoen eraztuna) opera sortan, adibidez, prozedura dramatikoaren egitura-elementua da eta batasuna ematen dio lanari.

Jatorria musikan badu ere, beste arlo askotara zabaldu da: pinturara (koloreak), arkitekturara (sinboloak), literaturara (esaldiak...)...