Lizarrako merindadea
Lizarrako merindadea Nafarroako mendebaldean dagoen lurraldea da. Estellerria[1] edo Lizarrerria (gaztelaniaz Tierra Estella) izenez ere ezaguna.
Merindadeko herriburua Lizarra da. Lizarreriak guztira 2068,6 km2 ditu, 73 udalerri eta 39 partzuergo. Estellerriko biztanleak 66.082 ziren 2010ean (Espainiako Estatistika Erakundearen datua).
Honako haran edo ibarretan daude banatuta 73 udalerriak: Deierri, Goñibar eta Gesalatz, Mañeruibar, Iguzkitza ibarra, Ega ibarra, Lanaibar, Allin, Berrotza ibarra eta Ameskoa.
Geografia
Mugakideak
Mugakideak hauek ditu: iparralde eta ipar-ekialdean Iruñeko merindadea, hegoaldean Errioxa probintzia, mendebaldean Arabako Mendialdea, eta hego-ekialdean Erriberriko merindadea.
Udalerriak
Estellerriak dituen 73 udalerrietatik, hauek dira nagusiak (parentesi artean, udalerriak 2002an zituen biztanleak):
- Aiegi (1.132 biztanle 2002an)
- Allo (1.029)
- Armañantzas (86)
- Arronitz (1.140)
- Azagra (3.802)
- Azuelo (53)
- Carcar (1.247)
- Deierri (1.549)
- El Busto (99)
- Lizarra (13.150)
- Genevilla (124)
- Gesalatz (453)*
- Goñerri (204)*
- Jaitz (109)*
- Lana (213)
- Lapoblacion (196)
- Lerin (1.902)
- Los Arcos/Urantzia (1.311)
- Lukin (134)
- Marañon (67)
- Mendabia (3.741)
- Piedramillera (63)
- San Adrian (5.583)
- Santsol (120)
- Sorlada (51)
- Torres del Rio (168)
- Viana (3.563)
- Villatuerta (864)
- Zirauki (452)
* 2004ko datuak.
Orografia
Urbasa eta Andimendi mendilerroetatik Ebro eta Ega ibaien sakanetaraino zabaltzen da Lizarrako merindadea. Ega ibaiak mendebalde-ekialde noranzkoan zeharkatzen du merindadea Lizarraraino, eta iparralde-hegoalde noranzkoa hartzen du gero, San Adrianen ura Ebro ibaian isuri aurretik.
Lizarrako merindadean bi multzo geomorfologiko handi bereiz daitezke: Kantauri aldekoen modukoak diren haranak eta mendiak ipar eta ipar-mendebaldean (Urbasa-Andia natura parkea, Lokiz eta Kodes) eta Ebroko sakana, hegoaldean. Klimari eta landaretzari dagokienez ere bereizketa bera egin behar da. Merindadearen iparraldean klima ozeanikoa da, eta hegoaldean klima mediterraneo-kontinentala. Prezipitazioek 400-1.800 mm ur uzten dute urtean batez beste, eta 6-14 °C da tenperatura batez beste. Iparraldean hosto txikiko hariztiak eta pagadiak dira zuhaizti hedatuenak, eta hegoaldean arteak eta abaritzak.
Kultura
Ondarea
Merindadeak kultura ondare aberatsa dauka:
- San Pedro Ruakoaren auzoa, Alde Zaharra, Done Mikel eliza, San Pedro Ruakoa, Santa Mariakoa, Hilobi Santuarena, Nafarroako errege-erreginen jauregia eta Zalatanbor gaztelua (Lizarra).
- Irantzuko monasterioa (Abartzuza).
- Iratxeko monasterioa (Aiegi).
- Aramendiako gurutzea eta Kristo Santuaren baseliza (Allin).
- Andre Mariaren eliza (Deierri).
- San Andres eliza (Etaiu)
- Etxarrengo jauregia (Girgillao).
- Sartagudako dorrea (Lodosa).
- Andre Mariaren eliza (Los Arcos).
- Baigorri jauregia (Oteitza).
- Torralba del Ríoko harresia.
- Hilobi Santuaren eliza (Torres del Río).
- Alde Zaharra eta Andre Mariaren eliza (Viana).
- Deioko gaztelua (Villamayor de Monjardín).
- Ziraukiko erromatar zubia eta galtzada.
- Zuñigako harresiak.
Euskara
Administrazio antolakuntza
Administrazio aldetik ere bereizgarri nabarmenak dituzte iparraldeko eta hegoaldeko udalerriek. Iparraldekoak, gehienetan, hainbat kontzejuk osaturiko udalerriak dira; hegoaldeko herriek, berriz, herrigune bakarreko udalerriak osatzen dituzte.
Ekonomia
Lizarrako merindadeko biztanleen ekonomia jarduera nagusiak laborantza eta abere hazkuntza dira. Industria (kontserbak, ardogintza, zurgintza, eraikuntza) hiri nagusietan besterik ez dago.
Zerbitzuak
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
- ↑ Euskaltzaindia: Euskal Onomastikaren Datutegia.
Ikus, gainera
Kanpo loturak
- (Gaztelaniaz) Lizarrako merindadearen mapa