Maglić

Maglić

Маглић
Maglić ; ; Маглић
Datu orokorrak
Garaiera	2.386 m
Prominentzia	51 m
Mota	mendi
Geografia
Koordenatuak	43°16′52″N 18°43′59″E / 43.2811°N 18.7331°E
Mendikatea	Maglić massif (en)
Estatu burujabe	Bosnia-Herzegovina
Bosnia-Herzegovinaren banaketa administratiboa	Bosniako Serbiar Errepublika
Municipality of the Republika Srpska	Foča Municipality
Hiria	Foča
Mendizaletasuna
Ohiko bidea	Fočatik (BiH), Mratinjetik (CG)
Geologia
Material nagusia	kareharri

Maglić (serbokroazieraz latindar alfabetoan, Маглић alfabeto zirilikoan) Dinariar Alpeetan dagoen Montenegro eta Bosnia-Herzegovinako mendia da. Bere tontorretakoa den Bosanski Maglić ("Bosniar Maglić", 2.386 m) Bosnia-Herzegovinako altuena da baina Crnogorski Maglić ("Montenegroar Maglić", 2.388 m) apur bat garaiagoa da^[1].

Kokapena[aldatu | aldatu iturburu kodea]

Dinariar Alpeak deritzon mendikate luzearen barruan "Maglić / Bioč / Volujak / Trnovački Durmitor/ Vlasulja" izena ematen zaion azpimultzoan dago; bost izen hauek dituzten mendiek osatzen dute eta Maglić ez da altuena, Biočeko Veliki Vitaok (2397 m) gainditzen baitu.

Administratiboki bi estatutan banatuta dago. Montenegrori dagokionez Plužine opština edo udalerrian dago. Bosnia-Herzegovinaren barruan dauden bi entitateetatik Republika Srpska edo Bosniako Serbiar Errepublikan dago, Foča udalerrian eta izen bereko eskualdean^[2]; Bosniako gerran (1992-1995) serbiarren talde armatu batzuek izugarrizko sarraskiak egin zituzten eskualdean.

Mendiak Sutjeska ibaia du mendebaldean eta iparraldean, Volujak mendia hego-mendebaldean, Drina eta Piva ibaiak ipar-ekialde eta ekialdean eta Bioč mendia hegoaldean. Bosnia-Herzegovinako aldean mendia Sutjeska parke nazionalaren barruan dago.

Jakingarriak[aldatu | aldatu iturburu kodea]

Mendiaren hego-mendealdean, Montenegron, Trnovačko aintzira ikusgarria dago 1.517 metrotan.

Historia eta herrien aldetik oso korapilotsua izan den eskualde honetan, Maglić Bosnia-Herzegovina eta Montenegro estatu independenteetako lurretan geratu bada ere, paradoxikoki mendiaren bi aldeetan serbiarrak dira nagusi.

Igoera[aldatu | aldatu iturburu kodea]

Esperientzia eskatzen duen igoera da. Gerraren urteetan eremua ia erabat itxita egon zen, bereziki iparraldea eta gaur egun Bosniako Serbiar Errepublikan egoteak ere ez du laguntzen bisitariak jasotzeko orduan; hala ere mendian ez dago minaz jositako eremurik.

Fočatik 20 bat km hego-mendebaldera, hiri honetatik abiatzen dira hurbilketak; errepidez Sutjeska ibaia segituz eta Tjentištera heldu baino lehen ezkerretara jotzen duen errepidea hartu behar da; seinalerik ez dago. Lehen bi kilometroak asfaltozkoak dira eta gero ere autoz jarrai daiteke ordoki batera heldu arte. Eskuinaldean basobide eta hormarik gabeko babeslekua daude; pista honen hasieran autoa utzita, metro gutxitan pistak ezkerretara jotzen du baina zuzen segituta berehala "Maglić" seinalea topatzen da, mendira daraman ibilbidearen hastapena dena. Nahiko ondo markatuta dago eta 2 ordu eta 40 minuturen ostean mendiaren lerrora heltzen da.

Montenegrotik Mratinje herria da ohiko abiapuntua. Hortik mendebaldera doazen pista batzuek ere hurbil gaitzakete.