Mark Di Suvero
Estatubatuar eskultorea (Shangai, 1933). Gurasoak italiarrak ditu. Txinan jaio zen, baina Estatu Batuetan eta Europako hainbat herrialdetan bizi eta lan egin du. Eskultura izugarri handiak egiten ditu. Hasieran, zura eta brontzea landu zituen. New Yorkeko Green Galeryn erakutsi zuen, 1960an, zurez, kateez eta sokaz egindako eskultura-multzo bat: Hankchampion, Manhattanen suntsitutako hainbat eraikuntzatatik berreskuratutako materialak erabilita; New Yorkeko Whitney Museum of American Arten dago gaur. Ondoren, altzairuzko zati handiak lantzen hasi zen, aire zabalean, prentsa nahiz garabien laguntzaz. 1967an, altzairu margotuzko lehen eskultura egin zuen: Are Years What? (for Marianne Moore) [bilduma pribatua, New York]. Obra hori What are Years izeneko poemaren idazle Marianne Moore desagertuaren omenez dago egina. 1966an, Bakearen dorrea egin zuen, amerikarrek Vietnamen izandako parte-hartzea salatzeko. 1975ean, New Yorkeko Socrates Sculpture Park fundazioa sortu zuen. Beste lan batzuk: Nire aita, nire aita (1985, New York), Eguneko izarra (1985-1990, Paris) eta Galileo (1994-1997, Berlin).
Erreferentziak [aldatu]
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek Creative Commons Aitortu 3.0 Espainia lizentziarekin argitaratu ditu, Open Data Euskadi webgunean.
