Nazio Batuen Merkataritza eta Garapenari buruzko Konferentzia

Wikipedia(e)tik
Hona jo: nabigazioa, Bilatu

Nazio Batuen Merkataritza eta Garapenari buruzko Konferentzia (ingelesez: UNCTAD United Nations Conference on Trade and Development) Nazio Batuen Erakundearen gobernuarteko organo iraunkor bat da, 1964an sortua. Nazio Batuen Batzar Nagusiaren merkataritzari, inbertsioei eta garapenari buruzko organo nagusia da.

Erakundearen helburua da garapen bidean dauden herrialdeen merkataritzarako, inbertsiorako eta garapenerako aukerak maximizatzea eta herrialdeoi laguntzea munduko ekonomian sartzeko egiten ari diren ahaleginean.

Nazio Batuen Erakundearen ekimenez sortu zen, garapen bideko herrialdeei laguntzearren esportazioen prezioak egonkortzen eta herrialde industrializatuetara sartzeko hesiak ezabatzen. Haren xedea ez da negoziazioen gunea izatea, baizik eta proposamenak egitea eta beste erakunde batzuetara bideratzea, hala nola GATTera eta Nazioarteko Diru Funtsara.

Gaur egun, 194 estatu kide ditu, eta Genevan du egoitza nagusia, Suitzan. 400 langile ditu, eta 138 milioi dolarreko bi urteko aurrekontua (2010-2011).

Lan-arlo hauetan dihardu:

  • Globalizazioa aztertzea eta globalizazioak garapen-estrategietan duen eragina aztertzea.
  • Ondasun, zerbitzu eta oinarrizko produktuen nazioarteko merkataritza sustatzea, eta garapen bidean dauden herrialdeei laguntzea globalizazioaren eta integrazio ekonomikoaren aldeko eraginak baliatzen.
  • Garapen bidean dauden herrialdeetara bideratutako inbertsioa eta teknologia-transferentzia sustatzea.
  • Laguntza ematea merkataritzaren garapen eta eraginkortasunerako zerbitzu-azpiegiturak sortzeko.
  • Arreta berezia eskaintzea aurrerapen-maila txikieneko herrialdeei, kostarik ez dutenei eta uharte direnei.

Egitura[aldatu | aldatu iturburu kodea]

Bost bilera-maila daude:

  • UNCTADen Konferentzia. Lau urtean behin egiten da. Lehena (UNCTAD I) Genevan egin zen 1964an, eta azkena (UNCTAD XIII) Dohan egin zen, Qatarren, 2012ko apirilaren 21etik 26ra.
  • UNCTADen Merkataritza eta Garapen Mahaia. UNCTADen konferentzien arteko lana kudeatzen du. Urtean hirutan biltzen da.
  • Lau UNCTAD batzorde eta lantalde bat. UNCTADen politikaren, programaren eta aurrekontuari buruzko gaiak lantzen dituzte.
  • Aditu-bilerak. Batzordeek aditu-bilerak antolatzen dituzte, batzordeen eztabaida politikoetarako informazio teknikoa lortzeko.

Kanpo-loturak[aldatu | aldatu iturburu kodea]

Erreferentziak[aldatu | aldatu iturburu kodea]

Commonsen badira fitxategi gehiago, gai hau dutenak: Nazio Batuen Merkataritza eta Garapenari buruzko Konferentzia Aldatu lotura Wikidatan