Peiote

Peiotea loretan

Peiotea kaktazeoen familiako landarea da, 5 cm inguru luzea eta 8 bat cm zabala, zurtoin sendo mamitsua duena (Lophophora Williamsii). Zuzena eta sendoa du sustraia; zurtoina, berriz, kuia baten itxurakoa eta laranjaren antzeko 8-10 atalez osatua, kolorez gris berdexka eta distira urdinekoa. Lore bakarra izaten du, zurtoinaren buruan kokatua eta kolorez zuri-arrosa. Estatu Batuetako hegoaldean eta Mexikon hazten da berez. Haluzinazioak eragiten dituzten 20 bat alkaloide ditu. Alkaloide horietan ezagunena meskalina izeneko haluzinogenoa da. Hazten den lekuetako indiarrek jainkotzat eduki izan dute, eta hala gurtu ere. Errituetarako erabiltzen dute.