Poloniaren inbasioa

Wikipedia(e)tik
Hona jo: nabigazioa, Bilatu
Alemanak eta sobietarrak Poloniaren inbasioan

Poloniaren inbasioa 1939. urtean gertatu zen: batez ere Alemania naziak eta Sobietar Batasunak Polonia hartzeko egin zituzten ekintza militarrak, 1939. urteko irailaren 1etik urriaren 6ra bitartean, poloniar armada garaitu arte.

Bigarren Mundu Gerra leherrarazi zuen lehenengo gertakaria izan zen, Hitlerek, erasorik ez egitekotan Molotov-Ribbentrop Hitzarmena sobietarrekin sinatu eta astebetera, «Fall Weiss» operazioarekin antolatutako inbasioari ekin zionez: Poloniako iparraldetik, hegoaldetik eta mendebaldetik sartu ziren alemanak, Blitzkrieg zeritzon eraso azkar eta bortitzen teknika erabiliz poloniarrak erraz garaituz, batez ere Bzurako batailaren ostean. Frantziak eta Erresuma Batuak, itunak eginda izan arren, ez zuten parte handirik hartu Poloniari laguntzen, eta horrek bide eman zuen Poloniak hain 'erraz' etsi behar izatera.

Sobietarrek, euren aldetik, irailaren 17an hasi ziren Polonia inbaditzen: Armada Gorria Polonia ekialdetik sartzen hasi zen. Poloniarrek defentsarako zituzten indarrak nahiko ez zirelakoan, tropa guztiak Errumaniako lurralde neutralera bidaltzea erabaki zuten.

Urriaren 2-5 bitartean Kock-eko batailan poloniarrei garaituta, inbasio-kanpaina 1939. urteko urriaren 6an amaitu zen: Alemaniak eta Sobietar Batasunak Poloniako lur guztiak banatu eta eskuratu zituzten, Poloniako II. Errepublikari amaiera emanez, nahiz eta Polonia formalki sekula errenditu ez. Urriaren 8rako, Alemaniak Poloniako mendebaldea eta Danzig hiri askearen (gaur egungo Gdansk) administrazioa erabakita zeukan. Bestalde, Sobietar Batasunak poloniar lurrak Bielorrusiako eta Ukrainako Sobietar Errepublika Sozialistetan sartu zituen, sobietartze-kanpainari ekinez.

Poloniarrek, euren aldetik, erresistentzia-mugimenduak abiarazi zituzten. Biztanleriaren %20 hil zen inbasioan, batez ere juduak.

Kanpo-loturak[aldatu | aldatu iturburu kodea]

Commonsen badira fitxategi gehiago, gai hau dutenak: Poloniaren inbasioa Aldatu lotura Wikidatan

Erreferentziak[aldatu | aldatu iturburu kodea]