Reicharen Segurtasuneko Bulego Nagusia

Reicharen Segurtasuneko Bulego Nagusia
Datuak
Mota	Inteligentzia zerbitzua, segurtasun agentzia eta polizia militarra
Herrialdea	Hirugarren Reicha
Eskumendekoak	State Police Office Braunschweig (en)
Agintea
Lehendakaria	Reinhard Heydrich, Heinrich Himmler eta Ernst Kaltenbrunner
Egoitza nagusi	Berlin; 52°30′26″N 13°22′57″E / 52.5072°N 13.3825°E;
Historia
Sorrera	1939ko irailaren 27a
Sortzailea	Heinrich Himmler
Ordezkatzen du	Sicherheitspolizei (en) eta Sicherheitsdienst
Desagerpena	1945eko maiatzaren 8a

Reicharen Segurtasuneko Bulego Nagusia^[1] (alemanez: Reichssicherheitshauptamt edo RSHA) Alemania Naziko erakundea izan zen, Reichsführer-SS eta poliziburu (alemanez: Chef der Deutschen Polizei) Heinrich Himmlerren mendean zegoena. Haren eginbeharra Hirugarren Reicharen etsai guztien aurka gudukatzea zen, hala Alemania barnean nola kanpoan.

RSHA 1939ko irailaren 27an sortu zen, Heinrich Himmlerrek sinatutako dekretu baten bitartez. Dekretu hark Alderdi Nazionalsozialistaren mendeko Segurtasun Zerbitzua (alemanez: Sicherheitsdienst edo SD) eta Estatuko Segurtasun Polizia erregularra (alemanez: Sicherheitspolizei) batu zituen. Sicherheitspolizeiren barnean Estatuko Polizia Sekretua edo Gestapo (alemanez: Geheime Staatspolizei) eta Polizia Kriminala (alemanez: Kriminalpolizei) zeuden. Reinhard Heydrich izan zen Reicharen Segurtasuneko Bulego Nagusiaren lehenbiziko burua. Hura 1942an eraila izan zenean, Ernst Kaltenbrunnerek ordeztu zuen, Bigarren Mundu Gerra amaitu arte.^[1]

RSHAk Hirugarren Reicharen eta Alderdi Nazionalsozialistaren segurtasun zerbitzuak kontrolatzen zituen. Bere gain zituen informazioa biltzea, krimenak ikertzea, atzerritarrak ikuskatzea, herri iritzia begiratzea eta doktrinatze nazia. Eginbehar nagusia "Reicharen etsaiak" aurkitu eta garbitzea zuen. Hala ere, "etsai" zerrendan juduak, ijitoak, komunistak, masoiak, bakezaleak eta ekintzaile kristauak zeuden. RSHAren beste egiteko bat Einsatzgruppen taldeen jarduera gainbegiratzea izan zen. Ekialdeko Europako inbasioan Alemaniar armadari jarraitu zioten heriotza eskuadroi hauek ehunka mila judu eta nazien aurkari hil zituzten.^[2]