Rachel Weisz

Wikipedia(e)tik
Hona jo: nabigazioa, Bilatu
Rachel Weisz
Rachel Weisz
Datu pertsonalak
Izen osoa Rachel Hannah Weisz
Jaio 1970eko martxoaren 7a
(44 urte)
Londres, Ingalaterra
(Erresuma BatuaErresuma Batua)
Lan nabarmenenak The Mummy (1 eta 2)
The Constant Gardener
Agora
Sariak Oscar Saria eta Urrezko Globoa (2005)
IMDB IMDBko fitxa

Rachel Hannah Weisz (Londres, Ingalaterra, 1970eko martxoaren 7a - ), Rachel Weisz izenaz ezagunagoa, aktore ingelesa da.

Weisz 1990eko hamarkadan hasi zen aktore lanetan, antzerkian eta telebistan batez ere. Cambridgeko Unibertsitatean ikaskideekin sortu zuen antzerki taldearen antzezpen bati esker, Edinburgheko Festibaleko Guardian Student Drama saria irabazi zuen 1991. urtean. Lehenengo filma, Death Machine izan zen, 1994an, baina aurreneko paper garrantzitsua Keanu Reeves eta Morgan Freemanekin batera agertu zen 1996ko Chain Reaction pelikulan izan zen. Arrakasta, aldiz, The Mummy eta The Mummy Returns bigarren pelikularen eskutik iritsi zen, hala, Evelyn Carnahan britainiar liburuzain eta egitologoa pertsonaiari esker, nazioarteko ospea lortu zuen. Ordutik hona antzeztu dituen beste film garrantzitsu batzuen artean daude Enemy at the Gates, Constantine, The Whistleblower eta The Deep Blue Sea. Hala ere, pertsonaia nagusiak Darren Aronofsky senar ohiak zuzendutako The Fountain filmeko Izzi, Alejandro Amenábarren Agora-ko Hipatia Alexandriakoa, eta, batik bat, Fernando Meirelles zuzendariaren The Constant Gardener pelikulako Tessa Quayle dira. Azken film honetako antzezpenagatik, 2005. urtean, emakumezko bigarren aktore onenaren Oscar Saria, Urrezko Globoa, Zineko Aktore Sindikatuaren Saria, eta urteko britainiar artista onenari ematen zaion BAFTA Britannia Saria eskuratu zituen besteak beste.

Antzerkian ere sari ugari irabazi ditu lan ibilbide oparoan. 1994ko Noël Cowarden "Design For Living" obraren berrantzezpenari esker, Londresko Kritikarien Elkarteak banatzen duen Etorkizun Handieneko Aktorearen saria irabazi zuen; eta beranduago, 2009an, "A Streetcar Named Desire" obra ospetsuko Blanche DuBois protagnonistaren antzezpen bikainagatik, Londresko Antzerki Kritikarien Elkarteak 2009ko aktore onena izendatu zuen eta 2010ean, aldiz, emakumezko aktore onenaren Laurence Olivier Saria eskuratu zuen.

Biografia[aldatu | aldatu iturburu kodea]

Hastapenak[aldatu | aldatu iturburu kodea]

Rachel Weisz Londresko Westminster Hirian jaio zen 1970. urteko martxoaren 7an, baina Hampstead Garden auzoan hazi zen[1][2]. Gurasoak Edith Ruth Teich, Vienako irakasle eta psikoterapeuta, eta George Weisz Hungariako ingeniari eta asmatzailea dira[3][4][5]. Biek Ingalaterrara alde egin zuten Bigarren Mundu Gerrak eztanda egin baino lehen, naziengandik ihesi[6]. Hain zuzen ere, aita eta bere aldeko familia Askenazi juduak dira, eta amaren aldeko aitona, aldiz, Alexander Teich, Nazioarteko Ikasle Juduen idazkaria izan zen[7]. Dena den, ama fede katolikoan hazi zen eta austriar judu arbasoak izateaz gain, Vienako katoliko eta italiar jatorrikoa ere bada[8][9][10]. Gurasoek zenbaitetan alemanez hitz egiten zuten etxean. Bestetik, Rachel Weiszek ahizpa gazteagoa du, Minnie, argazkilaria dena[2].

Ikasketak Kenteko izen handiko hainbat ikastetxetan egin zituen, besteak beste, St. Paul's Girls' Schoolen eta North London Collegiaten, azken honetatik kanporatua izan zen arren[11]. Izan ere, Rachel Weiszek berak aitortu duenez, umetatik ikasle txarra izan zen, ez zuen irakasleen agintea errespetatzen, harik eta 16 urte zituela Ingeles Literaturako irakasle batek begiak irekiarazi zizkion arte[11]. Azken irakasle horren eraginari esker, Weisz literatura irakurtzen hasi zen eta, horrela, bere hitzetan, ikasle bikaina bihurtu eta Cambridgeko Unibertsitatean sartzea lortu zuen; bertan, Bachelor of Arts graduko titulua eskuratu zuen hiru urteren ostean[2][12].

Oinarrizko Hezkuntza bukatu zuenerako, Weiszek buruan zuen aktore bihurtzea. Dagoeneko, 14 urte baino ez zituela, modelo lanetan ibili zen Harpers And Queenen, bere amak aldizkarira bidalitako hainbat argazkiri esker. Gainera, 1985. urtean Richard Gerek parte hartzen zuen King David filmean paper luzetxo bat eskaini zioten; hala ere, gazteegia zelakoan gurasoek lan hori ukatu zuten[12].

Unibertsitate urteetan, ikasleek antolatutako antzezlanetan parte hartu zuen eta antzerki talde bat ere sortu zuen beste adiskide batzuekin batera, "Talking Tongues"[13]. Hala, taldearekin batera antzeztutako "Slight Possession" izeneko bat-bateko saioari esker, Edinburgheko Festibaleko Guardian Student Drama saria irabazi zuen 1991. urtean[12][14].

1992-1998: Lehen lanak[aldatu | aldatu iturburu kodea]

Oholtzatik telebistara jauzia 90eko hamarkadan eman zuen. Hain zuzen, 1992. urtean telebistarako hainbat lan egin zituen; hala nola, Advocates II tv movie-an agertu zen, Inspector Morse serieko saio batean parte hartu zuen, eta BBCren Scarlet and Black izeneko dramako protagonista izan zen Ewan McGregor aktorearekin batera[15].

Rachel Weiszen lehenbiziko filma ere 1992koa da, BBCko bigarren kateak finantzatu zuen ordubete luzeko Dirty Something. Bertan, Weiszek Becca izeneko pertsonaia antzeztu zuen, Dog (Paul Reynolds) bidaiariaz maitemintzen dena Glastonburyko Jaialdian[2]. Hala ere, aktoreak ez zuen antzerkia alde batera utzi eta Londresko West Endeko oholtzetan obra entzutetsuak antzezten jarraitu zuen. 1994. urtean, esate baterako, Rupert Everett aktorearekin batera Noël Cowarden "Design For Living" obraren berrantzezpenean parte hartu zuen Gielgud antzokian[16][17]. Bertan, Gilda protagonistaren papera jokatu zuen, eta emanaldi horri esker, Rachel Weiszek Londresko Kritikarien Elkarteak banatzen duen Etorkizun Handieneko Aktorearen saria irabazi zuen[18][19].

Hurrengo saltoa zinema aretoetara eman zuen Rachel Weiszek. 1995ean iritsi zen bere lehenengo filma pantaila handira, Death Machine izenekoa[15]. Bere agerpena txikia bazen ere, jauzia emana zuen, eta ez zuen luze joko aurreneko protagonista paper garrantzitsua lortu zuen arte. Hain zuzen, ondorengo urtean, 1996an, Chain Reaction estatubatuar filma grabatu zuen Keanu Reeves eta Morgan Freeman aktoreekin batera, eta, guztira, 60 milioi dolar baino gehiagoko irabaziak izan zituen filmak[20][21]. Bertan, Lily Sinclair doktorearen papera jokatu zuen. Dena den, Weiszek parte hartu zuen hurrengo filma, Bernardo Bertolucci italiar zuzendari ospetsuaren Stealing Beauty filma, garrantzitsuagoa izan zen aktorearen ibilbidean. Izan ere, pelikula arrakastatsuegia izan ez zen arren, Miranda Fox emakume erakargarriaren antzezpenak entzute handia ekarri zion Rachel Weiszi[12][22].

Rachel Weisz autografoak sinatzen The Brothers Bloom filmari buruzko prentsaurrekoaren ostean (2008).

Aurreneko film hauen ondotik, Estatu Batuetako eta Erresuma Batuko zenbait lanetan parte hartu zuen Weiszek. Besteak beste, Bent filmean agerraldi laburra egin zuen, Jeremy Davies eta Ben Affleckekin Sundanceko Zinemaldian saria lortu zuen Going All the Way pelikulako pertsonaia nagusia izan zen, Swept from the Sea dramako protagonista antzeztu zuen, Berlingo Zinemaldian aipamen berezia izan zuen Michael Winterbottom zuzendariaren I Want You filma egin zuen, eta 1998. urtean, azkenik, telebistarako My Summer with Des movie-a eta The Land Girls filmean parte hartu zuen[15].

1999-2004: Arrakasta[aldatu | aldatu iturburu kodea]

Rachel Weiszen nazioarteko ospea 1999. urtean heldu zen, Stephen Sommersek zuzendutako The Mummy zinema aretoetara iritsi zen urtean. Weiszek Evelyn "Evie" Carnahan britainiar liburuzain eta egiptologoaren papera jokatu zuen, protagonista papera Brendan Fraserrek antzeztu zuen Rick O'Connellekin batera. Bi pertsonaiek Antzinako Egiptoko fikziozko Hamunaptra hirira espedizio bat antolatzen dute antzinako liburu baten bila. Abentura eta akziozko pelikularen arrakasta azkarra izan zen. Estreineko asteburuan, esate baterako, 43 milioi dolarreko irabaziak izan zituen AEBetan bakarrik; eta, guztira, mundu osoan filmak 415 milioi dolar bildu ditu. Kritika onak eta txarrak jaso dituen arren, 1999. urtean gehien ikusi zen zortzigarren filma izan zen Estatu Batuetan. Ondorioz, The Mummy filmari esker, aktorea nazioarteko lehen planora iritsi zen[23][24].

Urte berean, 1999an, Weisz Tube Tales eta Sunshine filmetan ere agertu zen, azken honetan Ralph Fiennesekin batera[15]. Sunshine filma, gainera, bereziki garrantzitsua izan zen Rachel Weiszen ibilbidean; izan ere, bertan, Greta izeneko hungariar emakume judua antzeztu zuen aktoreak, Holokaustoa gertutik bizi duen pertsonaia. Eta hain zuzen ere, Weiszen aitak berak Hungariatik naziengandik ihesi alde egin zuen judua izan zen[6][25].

Hurrengo urtean, Beautiful Creatures filma estreinatu zuen[15]. Baina, aktorearen ospea 2001. urtean handitu eta egonkortu zen, Enemy at the Gates eta The Mummy Returns zineetara iritsi ziren urtean. Lehenengoa Bigarren Mundu Gerrako Stalingradeko guduaren fikziozko kronika bat da, eta Weiszek Tania Chernova stalingradar soldaduaren papera egin zuen, Jude Law eta Joseph Fiennesek antzeztu zituzten protagonistekin batera pelikulako maitasunezko hirukotea osatzen duen pertsonaia[26]. The Mummy Returns filma, aldiz, The Mummy aurreko pelikularen bigarren atala da. Bertan, Rachel Weiszen Evelyn pertsonaia eta Rick O'Connellek, zortzi urte ondoren, beste bidaia bat egiten dute Egiptora euren semea berreskuratu, eta Eskorpioi erregearekin eta Imhotep momiarekin akabatzeko[27][28]. Bigarren atalak lehenengoak bezainbesteko arrakasta izan zuen, eta, guztira, 433 milioi dolar inguruko irabaziak bildu ditu nazioartean[29].

Arrakasten bidea jarraituz, Rachel Weiszek About a Boy komedia eta drama nahasten dituen 2002ko filma estreinatu zuen. Pelikula horretan, Weiszek Hugh Grantek antzeztu zuen pertsonaiaren neska lagunaren papera jokatu zuen. Filma oso ikusia izan zen eta, orokorrean, kritika onak jaso zituen nazioartean[30][31]. Ondoren, entzute gutxiago izan zuten filmak iritsi ziren, Confidence eta komediazko Envy, baita The Shape of Things antzezlan aipagarria ere[15]. 2003. urtean, gainera, Weiszek Runaway Jury pelikulan parte hartu zuen John Cusack eta Dustin Hoffmanekin batera. Diru asko bildu ez zuen arren, kritikariek txalotu zuten thriller-a eta filmaren produkzioa[32].

2005-2009: Sarien izen ona[aldatu | aldatu iturburu kodea]

Hurrengo urtean, Constantine film berria estreinatu zuen, beste behin, Keanu Reeves aktorearekin batera. Weiszek Angela Dodson detektibea antzeztu zuen, John Constantine izeneko exorzistaren laguntzaz bere ahizparen heriotza ikertzen saiatzen dena, gizakien arimak lortzeko Jainkoa eta Deabruaren arteko gerrak dirauen bitartean[33][34]. Filmak zineetan nahiko arrakasta izan zuen, nahiz eta kritika gehienak ez ziren horren onak izan. Nazioartean 230 milioi dolar inguru bildu ditu pelikulak[35].

Hala ere, 2005. urtea zer edo zerengatik nabarmentzen bada Rachel Weiszen aktore ibilbidean, The Constant Gardener filmagatik da[36][37]. Fernando Meirellesek zuzendutako filmak entzute handia izan zuen, izan ere, pelikula Kenyan filmatu zen arren, Nigerian gertaturiko mediku-esperimentazio probetan eta John le Carré idazlearen obran oinarritua dago. Ralph Fiennesekin batera agertu zen berriro ere Weisz, eta bertan, hilda dagoen Tessa aktibista antzeztu zuen. Filmean Justin Quayle (Fiennes), Kenyan dagoen britainiar enbaxadore bat, emaztearen (Weisz) heriotza estalgabetzen saiatzen da, enbaxada propioaren eta erakunde farmazeutikoen eragozpenen gainetik[38][39]. Rachel Weiszek The Constant Gardener-en eginiko lanari esker, emakumezko bigarren aktore onenaren Oscar Saria[40], Urrezko Globoa[41] eta Zineko Aktore Sindikatuaren Saria[42], eta emakumezko aktore onenaren Britainiar Film Independenteen Saria[41] irabazi zituen besteak beste. Bere lana txalotua izan zen eta, hala nola, Erresuma Batuko The Guardian egunkariak "(Weiszen antzezpenak) britainiar aktore onenen sailkapenaren gorenera eraman du" adierazpenak egin zituen[43]. BBCko Andy Jacobs kritikariak, aldiz, "Weisz bikain dago: filmetako izarren karisma sentimendu gordinarekin batera. Maitemintzeko antzezpena" idatzi zuen[44]. Hurrengo urtean, 2006an, urteko britainiar artista onenari ematen zaion BAFTA Britannia Saria eskuratu zuen[45].

Aktorea The Whistleblower filmaren aurkezpenean. Torontoko Zinemaldia (2010).

2006a ere urte berezia izan zen Rachel Weiszentzat, Darren Aronofsky bikotearekin lehen haurra izan batzuen maiatzaren 31n, Henry Chance izenekoa[2]. Gainera, Aronofskyk berak zuzendutako The Fountain filmean agertu zen Hugh Jackmanekin batera[46]. Drama erromantikoan sailkatua izan den filmak fantasia, historia, erlijioa eta zientzia fikzioa uztartzen ditu, eta maitasuna eta, batik bat, heriotza eta gizakion hilkortasunari buruz dihardu[47][48]. Pelikula hiru istorioetan banatua dago, nahiz eta hiruak elkarrekin doazen; Tom/Tomás (Jackman) hilzorian dagoen Izzi/Elisabet Katolikoa (Weisz) salbatzen saiatzen da. Kritika oso on eta txarrak izan ditu The Fountain-ek, eta estreineko urtean filmak kritikariak banatu zituen[49]. Hala ere, 16 milioi euroko irabaziak baino izan ez dituen arren, azken urteotan zinezale askok gurtzen duten filma bihurtu da[48].

Urte honetan ere, Rachel Weiszek ahotsa jarri zion Eragon filmeko Saphira dragoiari eta Zinemako Arte eta Zientzien Akademian sartzeko gonbidapena jaso zuen[15][50]. Bestetik, 2007 eta 2008an grabatutako filmek ez zuten hasiera batean prentsak uste izandako oihartzuna izan, nahiko ikusiak izan ziren arren. Hala, Fred Claus pelikulan papel txiki bat izan zuen Vince Vaughnekin batera (filmak ia ehun milioi dolarreko irabaziak izan ditu), My Blueberry Nights-en parte hartu zuen Norah Jones, Jude Law eta Natalie Portmanekin, eta Ryan Reynolds protagonista duen Definitely, Maybe komedia erromantikoan agertu zen[15]. Komediazko The Brothers Bloom filmean ere antzeztu zuen, baina pelikula oso zine areto gutxitara iritsi zen[51]. Gainera, The Mummy filmaren hirugarren atalean agertzeari uko egin zion 2008. urtean, gidoian gorabeherak zirela-eta[52].

2009an bi lan aurkeztu zituen aktoreak zine aretoetan: Peter Jackson zuzendariaren The Lovely Bones eta Alejandro Amenábarren Agora. Lehenengoan, Weiszek hamalau urteko alaba desagertzen zaion amaren papera jokatu zuen. Filmak orokorrean kritika epelak jaso zituen eta, besteak beste, Mark Wahlberg, Susan Sarandon, Stanley Tucci eta Saoirse Ronan aktore entzutetsuek ere parte hartu zuten arren, produkzioaren irabaziak ez dira 100 milioi dolarretara iritsi[53]. Bestalde, Agora film historikoan Rachel Weiszek Hipatia Alexandriakoa pertsonaia antzeztu zuen. Inoiz egin den Espainiako film garestiena izan zen, guztira, 50 milioi euro, eta arrakasta handia izan zuen herrialdean[54]. Hala ere, zenbait kristau elkarteren salaketaren ondoren, pelikula ez zen nahi beste zabaldu nazioartean[55]. Zine kritikariek, baina, Weiszen lana goraipatu dute Amenábarren filmean, eta emakumezko aktore onenaren Goya Saria jasotzeko izendatua izan zen[56].

Azkenik, antzokiko oholtza gainean, Rachel Weiszek "A Streetcar Named Desire" obra ospetsua aurkeztu zuen 2009an[57]. Blanche DuBois protagnonistaren antzezpen bikainagatik, Londresko Antzerki Kritikarien Elkarteak 2009ko aktore onena izendatu zuen eta 2010ean, aldiz, emakumezko aktore onenaren Laurence Olivier Saria irabazi zuen[58].

2010-gaur egun[aldatu | aldatu iturburu kodea]

Hamarkada berria Bosniako gerraren ostean gertatutako benetako istorio batean oinarrituta dagoen The Whistleblower filmarekin hasi zuen Rachel Weiszek. Zehazki, 2010eko Torontoko Zinemaldian aurkeztu zen lehenbizikoz pelikula eta orokorrean kritika onak jaso zituen[59]. Aktoreak Kathryn Bolkovacen papera jokatu zuen, Bosnia-Herzegovinan lanean ibili zen polizia baten papera, gizakien trafiko, salerosketa, eta emakumezkoen sexu esplotazio kasu bat ikertzen saiatu zena[60][61]. Antzezpen honi esker, emakumezko aktore onenaren Genie Saria eta Vancouverko Zine Kritikarien Elkartearen Saria jasotzeko izendatua izan zen Weisz, nahiz eta azkenean ez zuen garaikurrik lortu[62].

2010. urtean ere, L'Oréal erakundeak aktorea nazioarteko urteko enbaxadore izendatu zuen[63]. Weisz aurretik ere modelo lanetan aritu zen; hala nola, Vogue eta Esquire aldizkarien azalean agertu zen, eta Narciso Rodriguez disenatzailearen musa ere izendatua izan zen[64].

Hurrengo urtea oparoa izan zen aktorearentzat eta, guztira, lau pelikulatan agertu zen. Denetan arrakastatsuena, Terence Rattigan autorearen izen bereko obraren The Deep Blue Sea adaptazioa izan zen[65]. Britainiar drama erromantiko honetan, Weiszek 1950eko hamarkadako Hester Collyer izeneko andrea antzeztu zuen, senarrarekin eta maitalearekin dituen harremanek nahigabetzen duten emakumea[65]. The Deep Blue Sea-n eginiko lanaren ondorioz, New Yorkeko eta Torontoko Zine Kritikarien Elkarteek emakumezko aktore onenari banatzen dizkioten sariak eskuratu zituen, eta drama bateko emakumezko aktore onenaren Urrezko Globoa eta Londresko Zine Kritikarien Elkarteak banatzen duen urteko emakumezko britainiar aktore onenaren saria jasotzeko izendatua ere izan zen[66].

Bestalde, 2011n, kritika eskasak izan dituen Fernando Meirellesen 360 filmean[15][67], egungo senarra den Daniel Craig ezagutu zuen beldurrezko Dream House pelikulan[68][69], eta Page Eight britainiar thriller politikoan parte hartu zuen Weiszek[15].

Azkenaldian, Weiszek The Bourne Legacy eta Oz the Great and Powerful filmak aurkeztu ditu, 2012 eta 2013 urteetan hurrenez hurren[15]. Bi superprodukzioek arrakasta handia izan dute zine aretoetan, 275 eta 490 milioi dolarreko irabaziak bildu dituzte[70][71]. Lehenengoa, Bourne pertsonaia protagonista duten filmeen jarraipena da, baina oraingo honetan, Matt Damonen ordez, Jeremy Renner da akziozko pelikulan nagusi[72]. Oz the Great and Powerful, aldiz, L. Frank Baum idazlearen fikziozko Oz munduari buruzko filma da. Bertan, Rachel Weiszek Evanora edo Ekialdeko Sorgina Gaiztoaren papera jokatu zuen eta James Franco, Michelle Williams eta Mila Kunisekin batera aritu zen[73]. Gainera, Daniel Craig senarrarekin batera, 2013ko urrian hasi eta hurrengo urteko urtarrilean amaitu zen "Betrayal" izeneko obra antzeztu zuen Broadwayn. Antzezlanak, guztira, 17,5 milioi dolar bildu zituen[74][75].

Etorkizunean Rachel Weiszek kaleratuko dituen proiektuen artean daude, besteak beste, zientzia fikziozko The Lobster filma Colin Farrellekin, La giovinezza, Idol's Eye eta Miss You Already filmak[2].

Filmografia[aldatu | aldatu iturburu kodea]

Urtea Izenburua Papera Oharrak (iturria: imdb.com)
1992 Advocates II Sarah Thompson TV movie-a
1993 Inspector Morse Arabella Baydon Telebistako seriea (Atala: "Twilight of the Gods")
Tropical Heat Joey Sweating Bullets; telebistako seriea (Atala: "His Pal Joey")
The Scarlet and the Black Mathilde Telebistako miniseriea
1994 White Goods Elaine
Seventeen TV short
Screen Two Becca Telebistako seriea (Atala: "Dirtysomething")
1995 Death Machine Junior Executive
1996 Chain Reaction Dr. Lily Sinclair
Stealing Beauty Miranda Fox
1997 Bent Prostitute
Going All the Way Marty Pilcher
Swept from the Sea Amy Foster
I Want You Helen
1998 My Summer with Des Rosie
The Land Girls Ag (Agapanthus)
1999 The Mummy Evelyn "Evie" Carnahan Nominatua — Emakumezko aktore onenaren Saturn Saria
Sunshine Greta
Tube Tales Angela
2000 Beautiful Creatures Petula
This Is Not an Exit: The Fictional World of Bret Easton Ellis Lauren Hynde
2001 Enemy at the Gates Tania Chernova
The Mummy Returns Evelyn Carnahan / Nefertiri Nominatua — Emakumezko britainiar aktore onenaren Empire Saria
2002 About a Boy Rachel
2003 Confidence Lily
The Shape of Things Evelyn Ann Thompson
Runaway Jury Marlee/Gabrielle Brant
2004 Envy Debbie Dingman
2005 Constantine Angela eta Isabel Dodson Nominatua — Teen Choice: Filmeko Garrasi Eszena
The Constant Gardener Tessa Quayle Emakumezko bigarren aktore onenaren Oscar Saria
Emakumezko aktore onenaren Britainiar Film Independenteen Saria
Emakumezko bigarren aktore onenaren Urrezko Globo Saria
Emakumezko bigarren aktore onenaren Iowako Zine Kritikarien Saria
Urteko emakumezko britainiar aktore onenaren Londresko Zine Kritikarien Elkartearen Saria
Emakumezko bigarren aktore onenaren San Diegoko Zine Kritikarien Elkartearen Saria
Emakumezko bigarren aktore onenaren Zineko Aktore Sindikatuaren Saria
Emakumezko bigarren aktore onenaren St. Louisko Gateway Zine Kritikarien Elkartearen Saria
Emakumezko bigarren aktore onenaren Utahko Zine Kritikarien Elkartearen Saria
Nominatua — Emakumezko protagonista aktore onenaren BAFTA Saria
Nominatua — Emakumezko bigarren aktore onenaren Broadcast Zine Kritikarien Elkartearen Saria
Nominatua — Emakumezko bigarren aktore onenaren Chicagoko Zine Kritikarien Elkartearen Saria
Nominatua — Emakumezko bigarren aktore onenaren Dallas-Fort Worth Zine Kritikarien Elkartearen Saria
Nominatua — Emakumezko bigarren aktore onenaren Online Zine Kritikarien Elkartearen Saria
Nominatua — Emakumezko bigarren aktore onenaren Vancouverko Zine Kritikarien Elkartearen Saria
2006 The Fountain Izzi / Elisabet Katolikoa
Eragon Saphira (ahotsa)
2007 Fred Claus Wanda
My Blueberry Nights Sue Lynne
2008 Definitely, Maybe Summer Hartley
The Brothers Bloom Penelope
2009 The Lovely Bones Abigail Salmon
Agora Hipatia Alexandriakoa Nominatua — Emakumezko aktore onenaren Goya Saria
2010 The Whistleblower Kathryn Bolkovac Nominatua — Emakumezko aktore protagonista onenaren Genie Saria
Nominatua — Emakumezko aktore onenaren Vancouverko Zine Kritikarien Elkartearen Saria
The Simpsons Dr. Thurmond Telebistako seriea (Atala: "How Munched Is That Birdie in the Window?")
2011 360 Rose
Page Eight Nancy Pierpan TV movie-a
Nominatua — Miniserie edo Telebistako Film bateko emakumezko aktore onenaren Satellite Saria
Dream House Libby Atenton
The Deep Blue Sea Hester Collyer Emakumezko aktore onenaren New Yorkeko Zine Kritikarien Elkartearen Saria
Emakumezko aktore onenaren Torontoko Zine Kritikarien Elkartearen Saria
Nominatua — Emakumezko aktore onenaren Evening Standard Britainiar Zineko Saria
Nominatua — Emakumezko dramako aktore onenaren Urrezko Globo Saria
Nominatua — Urteko emakumezko britainiar aktore onenaren Londresko Zine Kritikarien Elkartearen Saria
Nominatua — Emakumezko aktore onenaren Onlina Zine Kritikaren Elkartearen Saria
2012 The Bourne Legacy Dr. Marta Shearing Nominatua — Teen Choice: Emakumezko baten Akzio Eszena
2013 Oz the Great and Powerful Evanora
2015 The Lobster
La giovinezza Leda Ballinger
Miss You Already
2016 Idol's Eye

Erreferentziak[aldatu | aldatu iturburu kodea]

  1. There are conflicting sources for the year of Weisz' birth. In particular her detailed biography of Weisz at the British Film Institute (Alexander Larman: Weisz, Rachel (1971–)) states 1971 and so does a biographic article in The Guardian and several other British newspapers. In particular The Evening Standard of 6 March 2006 (Nick Curtis: A Taxing Issue for Partygoers; the Oscars Diary) claims that Weisz herself gives 1971 as her year of birth. Nevertheless according to official records her date of birth was registered in 1970 (see "Births from 1968 to 1972" at http://www.findmypast.co.uk or General Records Office Reference: Name: Rachel Hannah Weisz, mothers maiden name: Teich, District: Westminster, Vol: 5e, Page: 2432). In addition the database entry of the British Film Institute ("BFI Film & TV Database: WEISZ, Rachel". British Film Institute. Retrieved 7 March 2011.) and a more recent article in Time magazine (Mary Pols, 26 March 2012, "Rolling in The Deep") give 1970 as well.
  2. a b c d e f Rachel Weisz Biography IMDb. 2014.07.07
  3. "Rachel Weisz biography". filmreference.com. 2014.07.06
  4. Brown, Mick (2009ko abuztuaren 1a). "Rachel Weisz talks about starring in A Streetcar Named Desire". The Daily Telegraph. 2014.07.06
  5. "The virtues of Weisz". Evening Standard (Londres). 2006ko azaroaren 16a. 2014.07.06
  6. a b Lipworth, Elaine (2011ko azaroaren 20a). "Rachel Weisz: 'I'm still a blushing bride'" The Daily Telegraph. 2014.07.06
  7. Richmond, Colin; Antony Robin; Jeremy Kushner (2005). Campaigner against anti-Semitism: the Reverend James Parkes, 1896–1981. Vallentine Mitchell. p. 312. ISBN 978-0-85303-573-2. "In the 1970s, Edith Weisz, the mother of the actress, Rachel, wrote to Parkes about the rescue of her father, Alexander Teich. Parkes, along with Bentwich, had been responsible for bringing Teich out of imminent danger in Vienna."
  8. "Rachel Weisz thinks globally, and Italians win". Sarasota Herald-Tribune. 2001ko apirilaren 25a. pp. 2A. 2014.07.07
  9. Lane, Harriet (1999ko ekainaren 13a). "Toast of the tomb". The Guardian (London: Guardian Media Group). 2014.07.07
  10. Hobson, Louis B. "Rachel Weisz slays her demons". 2014.07.07
  11. a b "Rachel Weisz: I was a rebel". stylist.co.uk 2014.07.08
  12. a b c d Biography: Rachel Weisz lifetimetv.co.uk. 2014.07.08
  13. Foley, Jack. "IndieLondon: Definitely Maybe – Rachel Weisz interview". Indielondon. 2014.07.08
  14. Riggs, Thomas (2002). Contemporary Theatre, Film & Television: Volume 41 of Contemporary Theatre, Film and Television Series. Gale / Cengage Learning. p. 369. ISBN 0-7876-5113-3.
  15. a b c d e f g h i j k "Rachel Weisz Filmography". MSN Movies. 2000. 2014.07.09
  16. Shenton, Mark (2009ko apirilaren 17a). "London's Donmar warehouse season to feature Weisz, West, Molina". Playbill (Playbill, Inc). 2014.07.09
  17. Flint Marx, Rebecca (2010). "Rachel Weisz bio, movies and television". The New York Times. 2014.07.09
  18. "TV Guide – Rachel Weisz biography". TV Guide. TV Guide Online Holdings LLC. 2010. 2014.07.09
  19. "Stage productions: 'Design For Living'". Rupert Graves. 2014.07.09
  20. "Keanu Reeves and Morgan Freeman start a 'Chain Reaction' of excitement" examiner.com. 2014.07.11
  21. "Chain Reaction". Box Office Mojo. 2014.07.11
  22. "Rotten Tomatoes – Stealing Beauty (1996)". Rotten Tomatoes. 2014.07.11
  23. "The Mummy". Box Office Mojo. 2014.07.11
  24. "Top-US-Grossing Titles Released In 1999". IMDb. 2014.07.11
  25. "Rotten Tomatoes – Sunshine (1999)". Rotten Tomatoes. 2014.07.12
  26. "Enemy at the Gates". IMDb. 2014.07.13
  27. "The Mummy Returns". metacritic.com. 2014.07.13
  28. "The Mummy Returns". rottentomatoes.com. 2014.07.13
  29. "The Mummy Returns". Box Office Mojo. 2014.07.13
  30. Peter, Travers (2002ko ekainaren 6a). "Reviews: About A Boy". Rolling Stone (Rolling Stone Australia).2007.09.27
  31. Gleiberman, Owen (2002ko maiatzaren 15a). "Review: About A Boy". Entertainment Weekly. 2014.07.13
  32. "Runaway Jury". Roger Ebert. 2014.07.13
  33. Brooks, Xan. "Girl behaving sensibly". The Guardian (London: Guardian News and Media Limited). 2014.07.14
  34. Vonder Haar, Pete. "Constantine". Film Threat. 2014.07.14
  35. "Constantine (2005)". Box Office Mojo. IMDb. 2014.07.14
  36. Goodridge, Mike (2006ko azaroaren 16a). "The virtues of Weisz". Evening Standard (London: ES London Limited). 2014.07.15
  37. "The Constant Gardener – Metacritic". Metacritic. 2014.07.15
  38. "The Constant Gardener (2005)". Rotten Tomatoes. 2014.07.15
  39. Vulliamy, Ed (2006ko otsailaren 3a). "The Guardian profile: Rachel Weisz". The Guardian (London: Guardian News and Media Limited). 2014.07.15
  40. "The 78th Academy Awards (2006) Nominees and Winners". Academy of Motion Picture Arts and Sciences. 2006. 2014.07.15
  41. a b "Constant Gardener, The". IMDb. 2014.07.15
  42. "The 12th Annual Screen Actors Guild Awards". Screen Actors Guild. 2014.07.15
  43. "I'm a storyteller. I don't save lives". The Guardian (London: Guardian News and Media Limited). 2005eko azaroaren 8a. 2014.07.15
  44. Jacobs, Andy (2005eko azaroaren 11a). "The Constant Gardener (2005)". BBC News. 2014.07.15
  45. "Britannia Award Honorees - Awards & Events - Los Angeles - The BAFTA site". British Academy of Film and Television Arts (BAFTA). 2014.07.15
  46. "The Fountain – Cast". AllMovie. 2014.07.17
  47. Kolakowski, Nick (2006ko azaroaren 24a). "Director Darren Aronofsky: A 'Fountain' Quest Fulfilled". Washington Post. 2014.07.16
  48. a b Kiant, Jessica (2012ko abenduaren 11a). "Darren Aronofsky Says 'The Fountain' Was Too Expensive, Talks Connecting 'Noah' With Modern Audiences & More". blogs.indiewire.com. 2014.07.17
  49. Macnab, Geoffrey (2006ko irailaren 7a). "'I knew we were going to get attacked ... '". Guardian Unlimited. 2014.07.17
  50. "Academy of Motion Picture Arts, Sciences invites 120 new members". USA Today (Gannett Company, Inc). 2006ko uztailaren 5a. 2014.07.21
  51. "Funny Girl?". New York Guides. 2014.07.18
  52. "'Mummy 3' star Maria Bello talks about taking over for Rachel Weisz, fighting an invisible baddie". MTV. 2008. 2014.07.18
  53. "Box Office Mojo - The Lovely Bones (2009) Box Office Statistics". 2014.07.19
  54. "“Ágora”, de Amenábar, un fiasco de la taquilla fuera de España". El blog de Cine Español. 2014.07.19
  55. "Civil groups protest new anti-Christian film". Catholic News Agency. See also: Observatorio Antidifamación Religiosa
  56. Scott, A. O. (2010eko maiatzaren 28a). [movies.nytimes.com/2010/05/28/movies/28agora.html "New York Times – Agora review – love amid the togas and the intolerant"]. The New York Times. 2014.07.19
  57. [www.westendtheatre.com/2986/awards/the-critics-circle-theatre-awards-2009/ "The critics' circle theatre awards 2009"]. Westend Theatre. 2010. 2014.07.19
  58. "Rachel Weisz wins best actress at Laurence Olivier Awards". Telegraph. 2014.07.19
  59. "The Whistleblower". RottenTomatoes.com 2014.07.21
  60. Leong, Melissa (2010eko irailaren 17a). "Star Rachel Weisz and subject Kathryn Bolkovac on detaching themselves from the events of 'The Whistleblower'". National Post (Postmedia Network Inc). 2014.07.21
  61. "The Whistleblower: A tense, focused piece of storytelling with a powerful sense of empathy". Variety (Reed Business Information). 2010eko irailaren 15a. 2014.07.21
  62. [http://www.imdb.com/title/tt0896872/awards " The Whistleblower (2010) - Awards"]. IMDb. 2014.07.21
  63. "Rachel Weisz named as new face of L’Oreal Paris!". Rachel Weisz online. 2014.07.23
  64. "Designer focus: Narciso Rodriguez". Vogue. Condé Nast Publications. 2008ko maiatzaren 18a. 2014.07.23
  65. a b "Rachel Weisz set to suffer in 'The Deep Blue Sea'". Cinema Blend LLC. 2010eko uztailaren 31a. 2014.07.21
  66. "The Deep Blue Sea (2011) - Awards". IMDb. 2014.07.21
  67. French, Philip (2012ko abuztuaren 12a). "360 – review". The Observer (London). 2014.07.21
  68. "How Daniel Craig and Rachel Weisz fell in love filming Dream House". Mirror. 2014.07.21
  69. "Rachel Weisz stuns in fitted frock as she makes rare red carpet appearance with husband Daniel Craig at charity gala". Dailymail.co.uk 2014.07.21
  70. [http://boxofficemojo.com/movies/?id=bourne4.htm "The Bourne Legacy". Box Office Mojo.2014.07.21
  71. [http://www.boxofficemojo.com/movies/?id=oz.htm "Oz The Great and Powerful (2013)". Box Office Mojo. 2014.07.21
  72. "The Bourne Legacy". British Board of Film Classification. 2012ko uztailaren 23a. 2014.07.21
  73. Barnes, Brookes (2013ko martxoaren 3a). "One More Trip to Land of Oz". The New York Times. 2014.07.21
  74. "Daniel Craig Heads Back To Broadway With 'Betrayal'". npr.org. 2013ko irailaren 18a. 2014.07.21
  75. "Daniel Craig and Rachel Weisz claim huge success with Betrayal on Broadway". The Guardian. 2014ko urtarrilaren 7a. 2014.07.21

Kanpo loturak[aldatu | aldatu iturburu kodea]

Commons-logo.svg
Commonsen fitxategi gehiago dago honi buruz:
Rachel Weisz