Real Sociedad

Real Sociedad de Fútbol, S.A.D.

Ezizena(k)	Txuri-urdin
Sorrera	1909
Futbol zelaia	Anoeta (Edukiera: 32.000)
Presidentea	Jokin Aperribay
Entrenatzailea	Philippe Montanier
Liga	BBVA Liga
2010-11	15.a
Webgunea	www.realsociedad.com
Etxeko koloreak 　 Kanpoko koloreak

Real Sociedad de Fútbol (euskaraz, Reala eta Erreala izenez ezaguna) Donostiako eta Gipuzkoako futbol talde nagusia da. Gaur egun Espainiako futbol ligako lehen mailako taldea da. 2009. urtean bere mendeurrena ospatu zuen, eta denboraldi berean lehen mailara igo zen 3 urtez bigarren mailan egon ondoren. Zubietako kirol-instalakuntzetan entrenatu ohi da.

Historia

Sakontzeko, irakurri: Errealaren historia

• 1909an, "Club Ciclista de San Sebastián" izenarekin, Espainiako Txapelketa lortu zuen, Español de Madrid taldeari 3 eta 1 irabazita. Irailaren 7an jaio zen ofizialki, Adolfo Saenz presidente zela.

• 1910eko otsailaren 11n, Alfonso XIII.a Espainiako erregeak Errege titulua eman zion taldeari, "Real Sociedad" bihurtuz.

• 1913ko urriaren 5ean Atotxa estadioa inauguratu zuten, 80 urtez Errealaren zelaia izango zena.

• 1918ko apirilaren 25ean Gipuzkoako Federazioa sortu zuten, presidentea Salvador Diaz Iraola zela (Benito Diaz ospetsuaren anaia zena).

• 1923an Lippo Hertzka hungariarra hasi zen taldea entrenatzaile, modu profesionalean aritu zen lehena. Urte bereko martxoaren 18an Realak 2 eta 1 irabazi zion Irungo Real Union-i San Mames-en, Gipuzkoako Txapelketa erdietsiz. 1924-25, 1926-27 eta 1928-29 denboraldietan ere nagusitu zen Reala txapelketa hartan.

• 1928an galdu zuen Espainiako Txapelketaren finala, Santander-ren, FC Barcelonaren aurka.

• 1929an amaitu zen lehenengo Espainiako Liga, Reala laugarren postuan gelditu zela. Liga hartako golegile nagusia ("pichichi"), Paco Bienzobas jokalari txuri-urdina izan zen.

• 1931ko ekainaren 27an, Espainiako II. Errepublika garaian, "Donostia F.C." izena hartu zuen klubak. Erregearen koroaren ordez, Donostiako ezkutua paratu zuen.

• 1935ean lehenengo aldiz bigarren mailara jaitsi ziren.

• 1936an, Espainiako Gerra Zibila zela-eta, Liga bertan behera gelditu zen.

• 1941eko urtarrilaren 8an, Realak (ordurako "Real Sociedad" izena berreskuratuta) inoiz partida batean sartu duen gol kopuru handiena lortu zuen, Valladoliden kontra 14 eta 2 irabaziz. Urte hartatik 1948 arte jaitsi eta igo ibili zen Lehen eta Bigarren mailen artean.

• 1946-47 denboraldian Benito Diaz entrenatzaileak "WM" sistema ingelesa lehenengo aldiz erabili zuen, Espainiako Ligan ezagutu gabekoa zena.

• 1951ko maiatzaren 27an Kopako txapeldunorde gelditu ziren, finalean FC Barcelonaren aurka galduta (3 eta 0). Urte haietan Ligako Lehenengo Mailan sendotu zen taldea.

• 1957an San Sebastián C.F. taldea sortu zuten, aurrerantzean "Sanse" izenaz ezaguna izan dena, bigarren talde gisan. Helburua, lehenengo talderako jokalariak lantzea.

• 1961-62 denboraldian jaitsi zen berriro, eta azkeneko aldiz, Bigarren Mailara. Bost urte igaro zituzten bertan.

• 1967ko apirilaren 23an lortu zuten, azkenean, Maila nagusirako igoera, Andoni Elizondo entrenatzailea zela. Handik aurrera taldea maila honetan sendotu zen, 2007an berriz bigarren mailara jaitsi arte.

• 1974ko azaroaren 18an Europako txapelketa batean lehenengo aldiz jokatu zuten, Atotxan eta Banik Ostrava talde txekiarraren kontra (0 eta 1 galdu zuten).

• 1979-80 denboraldian Errealak, Alberto Ormaetxea entrenatzaile zuela, partidarik galdu gabeko errekorra lortu zuen Ligan: 32 norgehiagoka hain zuzen ere. Hala ere, hurrengo urte arte itxaron behar izan zuten lehenengo Liga txapelketa eskuratzeko. Urte hartan, aldiz, Europako lehendabiziko garaipena erdietsi zuten, Milango Inter-ren aurka (2 eta 0).

• 1981eko apirilaren 26an, Gijon-en, Ligako txapeldun izaten lortu zuten historian lehenengo aldiz, Sporting-en aurka berdindu ostean, Zamorak azken minutuan lortutako gol mitikoari esker. Taldean historiako jokalaririk garrantzitsuenetarikoak zebiltzan urte haietan: Arconada, Zamora, Lopez Ufarte eta Satrustegui tartean.

• 1982an bigarren Liga txapelketa eskuratu zuen taldeak, aurreko urtean lortutako arrakasta berrituz.

• 1982-83an Superkopa irabazi zuen, Real Madrid finalean gainditu ondoren (4-1). Urte hartan ere, Europako Kopan, final-erdietara iritsi zen taldea, inoizko urrunen. Alemaniako Hanburg-en aurka galdu zuten final handira sartzeko aukera.

• 1987an Errege Kopa lortu zuten Zaragozan, Atlético de Madrid partida ondoko (2-2) penaltien bidez garaitu ondoren. J. B. Toshack-en urte arrakastatsuak ziren hau eta ondokoak, Bakero, Begiristain edo López Rekarte jokalariak tartean zeudela.

• 1988an Errege Koparen finalera ailegatu ziren bigarren aldiz jarraian. Oraingo honetan FC Barcelonak (hirugarren aldiz txuri-urdinen historian) eragotzi zien trofeoa lortzea. Bestalde, Ligan ere azpitxapeldun gelditu ziren.

• 1989an UEFA-ko final-laurdenetaraino iritsi ziren, inoizko urrutien. Alemaniako beste talde batek, Stuttgart-ek oraingoan, blokeatu zieten aurrerako bidea.

• 2003an, aurreko urteetan Bigarren Mailara ez jaisteko lanak eduki ondoren, denboraldi bikaina burutu zuten eta Liga txapeldunorde izan ziren azkenean, Real Madrid-en atzetik. Denoueix zen orduko entrenatzailea, eta aipatzeko jokalarien artean Xabi Alonso, De Pedro, Kovacevic eta Nihat zeuden.

• 2004an, urte asko ondoren Champions Leaguean estreinatzen dira. Lehenengo fasea pasa ondoren(Olinpiacos,Galatasaray eta Juventus), hurrengo fasean Lyonen kontra galduko dute. Eta ligan gorriak pasako dituzte. Championseko hamaikakoa hauxe zen: Westerveld; Aranzabal, Schurrer, Kvarme, Rekarte; De Pedro, Xabi Alonso, Alkiza (edo Aranburu), Karpin; Nihat eta Kovacevic.

• 2006an, errealak aldaketa ugari jasan ditu. Hasteko 5 fitxaje berri egon dira, Gerardo, Malagako lateral ezkerra, Bravo, Colo Colo taldetik etorritako atezain gaztea, Diego Rivas, Getafeko erdilaria, Fabio Felicio erdilari portugaldarra eta Juanito, Alaveseko atzelaria. Gainera Gabilondo, Boris eta Barkero taldetik joan ziren.

• 2007ko ekainaren 17an, 40 urtez lehenengo mailan aritu ondoren, bigarren mailara jaitsi zen taldea.

• 2008an, Liga guztia igoera postuen atarian egon ondoren, azkenean laugarren geratuz ez zuen igotzea lortu; bigarren urtez jarraian Bigarrengo Mailan lehiatuz.

• 2009an Realak mendeurrena ospatu zuen Real100 zure historia ere bada 1909-2009 lelopean. Ekintza ugari burutu ziren eta Mendeurrenaren Partida jokatu zen Real Madrilen aurka.

• 2010eko ekainaren 13an lehen mailara igo zen 3 urtez bigarren mailan egon ondoren.

Taldearen sailkapena historian zehar

Ekipamendua

• Lehen ekipamendua: Taldea sortu zenetik jantzi berbera eraman du taldeak: kamiseta txuri-urdina eta galtza zuriak. Aldatu den gauza bakarra galtzerdiak izan dira; batzuetan txuri-urdinak izan dira, eta beste batzuetan guztiz urdinak.
• Bigarren ekipamendua: Taldeak behin baino gehiagotan aldatu du bere bigarren jantzia. Normalean guztiz urdina izan da, goitik behera, baina gorria, berdea eta zuria ere jantzi izan ditu. 2006/2007 denboraldian lerro horizontal beltz eta urdinez osatutako kamiseta jantzi zuen, galtza beltzak eta galtzeri urdin-beltzak zituela.

Ereserkia

1970eko hamarkadan Ricardo Sabadiek Txuri-urdin ereserkia konposatu zuen, honela dio: Txuri-urdin Txuri-urdin maitea Txuri-urdin Txuri-urdin Aurrera Beti, Beti maite maite, maitea Donostia, donostiarra (bis) Aurrera mutilak! Aurrera Gipuzkoa! Aurrera txuri-urdinak! (bis) Gazte, gazte, gazte, gazte, gaztedi, Gaztedi aupa! Aupa mutilak! Gazte, gazte, gazte, gazte, gaztedi, Gaztedi txuri-urdinak! (bis)

2009an Mendeurrena ospatzeko Egaña eta Erentxunek hau konposatu zuten: Ehun urtez aupa Reala, beti Reala bihotzean Ehun urtez aupa Reala, beti Reala ahotsetan Ehun urtez bizi izaten, badaki maitemina Oso harro daramatzagu, oh kolore txuri-urdinak Ehun urtez aupa Reala, beti Reala bihotzean Ehun urtez aupa Reala, beti Reala ahotsetan Hondartzan abiatu eta hasi ginen Ondarretan Garenera iritsi gara Atotxan eta Anoetan Ehun urtez aupa Reala, beti Reala bihotzean Ehun urtez aupa Reala, beti Reala ahotsetan Oroimenak gordetzen duen barreneko gogo poza, Puertollano edo Atotxa, El Molinón, Zaragoza, Irabaztean apaldu, galtzean galdu ongi Harrobia hor daukagu, balio hoien harrobi Ehun urtez aupa Reala, beti Reala bihotzean Ehun urtez aupa Reala, beti Reala ahotsetan Ehun urtez aupa Reala, beti Reala bihotzean Ehun urtez aupa Reala, beti Reala ametsetan

2010/2011 denboraldiko taldea

Zkia.	Jokalaria	Posizioa	Altuera (m.)	Adina	Jatorria	Klubean noiztik	Kontratua (urte)-rarte	Oharrak
Lehen taldea 2010/11
1	Claudio Bravo	Atezaina	1'84	(28 urte)	Colo-Colo	2006	2015	Txilerekin internazionala.
2	Carlos Martinez	Atzelaria	1'88	(25 urte)	Harrobia	2007	2014
3	Mikel Gonzalez	Atzelaria	1'88	(26 urte)	Harrobia	2005	2013	Euskal Herria-rekin internazionala.
4	Gorka Elustondo	Erdilaria	1'82	(24 urte)	Harrobia	2006	2013	Euskal Herria-rekin internazionala.
5	Markel Bergara	Erdilaria	1'80	(25 urte)	Harrobia	2007	2014	Euskal Herria-rekin internazionala.
6	Fitxa librea
7	Antoine Griezmann	Aurrelaria	1,74	(20 urte)	Harrobia	2009	2015
8	Joseba Llorente	Aurrelaria	1'84	(32 urte)	Harrobia	2010	2014	Euskal Herria-rekin internazionala.
9	Imanol Agirretxe	Aurrelaria	1'85	(24 urte)	Harrobia	2005	2013	Euskal Herria-rekin internazionala.
10	Xabi Prieto (3.)	Erdilaria	1'85	(28 urte)	Harrobia	2003	2013	Euskal Herria-rekin internazionala.
11	Mikel Aranburu (1.)	Erdilaria	1,80	(33 urte)	Harrobia	1997	2012	Euskal Herria-rekin internazionala.
12	Fitxa librea
13	Eñaut Zubikarai	Atezaina	1'85	(27 urte)	Harrobia	2008	2012
14	Jeffrey Sarpong	Erdilaria	1'76	(23 urte)	Ajax	2010	2013
15	Ion Ansotegi	Atzelaria	1'92	(29 urte)	Barakaldo CF	2006	2014	Euskal Herria-rekin internazionala.
16	Vadim Demidov	Atzelaria	1'85	(25 urte)	Rosenborg BK	2011	2013	Norvegiarekin internazionala.
17	David Zurutuza	Erdilaria	1'84	(25 urte)	Harrobia	2008	2013	Euskal Herria-rekin internazionala.
18	McDonald Mariga	Erdilaria	1'87	(24 urte)	Inter Milan	2011	2012	Kenia-rekin internazionala.
19	Liassine Cadamuro	Atzelaria	1'86	(23 urte)	Sochaux FC	2011	2014
20	Asier Illarramendi	Erdilaria	1'77	(21 urte)	Harrobia	2010	2015
21	Diego Ifrán	Aurrelaria	1'71	(24 urte)	Danubio	2010	2015
22	Dani Estrada	Erdilaria	1'77	(25 urte)	Harrobia	2007	2014
23	Carlos Vela	Aurrelaria	1'72	(22 urte)	Arsenal	2011	2012
24	Alberto De la Bella	Atzelaria	1'80	(26 urte)	Sevilla Atlético	2009	2011	Kataluniarekin internazionala.
25	Toño Ramírez	Atezaina	1'89	(25 urte)	Harrobia	2009	2012
26	Iñigo Martinez	Atzelaria	1'76	(20 urte)	Harrobia	2011
27	Ruben Pardo	Erdilaria	1'69	(19 urte)	Harrobia	2011

• = Kapitainak.
• = Epe luzeko lesioa.
• 25 baino handiagoa den dortsala duten joklariak Real Sociedad B taldeko jokalariak dira, eta beraz bigarren edo lehen taldearekin jokatu dezakete partidak. LFP-ko arauak diotenez, lehen taldeko jokalariek 1-etik 25-erako dortsalak eraman beharko dituzte.

Fitxaketa merkatua 2010/11

Fitxaketak
Jokalariak	Posizioa	Jatorria	Mota	Zenabtekoa
Asier Illarramendi	Aurrelaria	Real Sociedad B	Lehen taldera igo da.
Toño Ramírez	Atezaina	Real Sociedad B	Lehen taldera igo da.
Liassine Cadamuro	Atzelaria	Real Sociedad B	Lehen taldera igo da.
McDonald Mariga	Erdilaria	Inter Milan	Lagatua
Carlos Vela	Aurrelaria	Arsenal	Lagatua

Bajak
Jokalariak	Posizioa	Talde berria	Mota	Zenabtekoa
Diego Rivas	Erdilaria	Hercules FC	Librea
Paco Sutil	Erdilaria	Murtzia FC	Librea
Mikel Labaka	Atzelaria	Rayo Vallecano	Librea
Raul Tamudo	Aurrelaria	Rayo Vallecano	Librea
Borja Viguera	Aurrelaria	Gimnàstic de Tarragona	Lagatua

Presidenteak

Sakontzeko, irakurri: Errealeko presidenteen zerrenda

Futbol zelaia

Anoeta

Sakontzeko, irakurri: Anoetako estadioa

Anoetako Futbol Zelaia 1993ko abuztuaren 13an inauguratu zuten. 32.000 pertsonarentzako tokia du. Zelaiak 105 m. luzeran eta 70 m. zabaleran ditu. Futbolerako erabiltzeaz gain, atlestismorako ere prestatuta dago.

Errealak partida ofizialak bertan jokatzen ditu, baina entrenatzeko Zubietako zelaiak erabiltzen ditu (Lasarte ondoan). Bertan, saskibaloi kokalekuak ere badaude, bai eta errehabilitaziorako eremua, proiekzio aretoak eta gimnasioa ere. UEFAk kategoria goreneko estadio bezala izendatu zuen eta Champions Leagueko final bat antolatzeko gai da.

Antzinako estadioak

• Atotxa: Realeko jarraitzaileen zelairik maitatuena ziur aski eta 75 urtez Real Sociedaden estadioa izan zena.

• Ondarreta: Realak izandako lehen zelaia, Donostiako Antigua auzoan.

Jarraitzaileak

CIS erakundeak 2007an egindako inkesta baten arabera, (Osasuna taldearekin berdinduta) Espainiako 11. taldea jarraitzaile kopuruaren arabera. Inkestaren arabera estatuko biztanleria osoaren %1,3 realzalea da eta beste %1,5 Reala gustuko du, baina ez lehen talde bezala.

2008ko martxoan Realaren aldeko 108 peña existitzen ziren eta ondorengoa da banaketa:

• 19 Donostian.
• 46 Gipuzkoan.
• 4 Euskadiko beste lurraldeetan (3 Araba eta 1 Bizkaian).
• 4 Nafarroan.
• 33 Espainian.
• 2 Ipar Euskal Herrian.

Irabazitako txapelketak

Espainiako txapelketak

• Espainiako Lehen Maila (2) :
  • 1981, 1982
  • Txapeldunorde 1980, 1988 eta 2003an.
• Errege Kopa (2) :
  • 1909, 1987
  • Txapeldunorde 1910 (Vasconia izenarekin), 1913, 1928, 1951 eta 1988an.
• Espainiako Superkopa (1) :
  • 1982

Beste batzuk

• Pitxitxiak (ligako golegilerik onenak):
  • Paco Bienzobas, 1929an. Ligaren historiako lehen pitxitxia izan zen.
• Zamora (gol gutxien jasotako atezainak):
  • Luis Miguel Arconada, 1980, 1981 eta 1982an.

Markarik onenak

• Partida gehien jokatutakoak
  • Alberto "Bixio" Gorriz: 461 partida
  • Juan Antonio Larrañaga: 460 partida
  • Jesus Mari Zamora: 455 partida

• Gol gehien sartutakoak

1. Jesus Mari Satrustegi: 133 gol
2. Roberto Lopez Ufarte: 101 gol
3. Darko Kovacevic: 92 gol
4. Jose Mari Bakero: 91 gol
5. Meho Kodro: 81 gol.
6. Jesus Maria Zamora: 79 gol.

• Irabazirik handiena (lehen mailan)
  • 1933ko martxoaren 19an Racing de Santanderen aurka, 8-0.

• Porrotik handiena (lehen mailan)
  • 1967ko irailaren 16an Real Madrilen aurka, 9-1.

• Denbora gehien entrenatzaile bezala
  • John Benjamin Toshack: 322 partida
  • Alberto Ormaetxea: 238 partida
  • Andoni Elizondo: 169 partida

• Espainiako ligan jarraian galdu gabeko partiden errekorra: 38 partida (1978-79 denboraldiko 29. ihardunalditik 1979-80 denboraldiko 32. ihardunaldira bitartean).

• Partida ofizial batean lorturiko emaitzarik onena lortu zuen 1941ean: Real Sociedad 14 - Valladolid 2.

Taldetik pasatako jokalariak

Anoetako estadioa

 Zerrenda: Errealeko jokalarien zerrenda

• John Aldridge
• Periko Alonso
• Xabi Alonso
• Luis Miguel Arconada
• Mariano Arrate
• Jose Mari Bakero
• Txiki Begiristain
• Paco Bienzobas
• Gheorghe Craioveanu (Gica)
• Javier De Pedro
• Alberto Gorriz
• Meho Kodro
• Darko Kovacevic
• Roberto Lopez Ufarte
• Jesus Mari Satrustegi
• Jesus Mari Zamora
• Valery Karpin
• Nihat Kahveci
• Savio Bortolini

Entrenatzaile onenak

 Zerrenda: Errealeko entrenatzaileen zerrenda

Taldeko entrenatzaile garrantzitsuenen artean, hasierako urteetan Benito Diaz (1926-1930 eta 1942-1951) azpimarratzekoa da. 13 urtez Erreala zuzentzen egon zen, estatistika bikainarekin. Halaber, 1946an "WM" sistema lehen aldiz erabili zuen Espainiako Ligan.

Andoni Elizondo (1966-1970 eta 1974-1976) izan zen 1967an taldea Lehen mailara igo zuena, bigarren mailan 5 urtez egon ondoren. Denbora aurrera, Erreala mantenduko zen 40 urtez maila gorenean, Elizondok igo zuen urte hartatik 2007 arte.

Alberto Ormaetxeak 1978an hartu zuen taldea, eta zazpi urtez bertan lan egin zuen. Eibartarrak lortu ditu taldeko inoizko emaitzarik hoberenak, Espainiako futbol liga txapelketa bi aldiz jarraian eskuratuz, 1981 eta 1982an. Halaber, 1983an Europako Kopan final-erdietara iritsi zen, nazioarteko txapelketa batean taldeak daukan markarik onena izanda.

John Benjamin Toshack galestarrak ordezkatu zuen aulkian, bertan zortzi urtez egonda, tarteka. Berarekin, 1987an Errege Kopa irabazi zuen, eta hurrengo urtean Liga eta Kopako txapeldunordea izan zen. 1989an UEFA Kopa-ko final-laurdenetaraino iritsi ziren txuri-urdinak berarekin.

Urte batzuk geroago, Raynald Denoueix frantziarrak kargua hartu zuen, 2002an. Ez zen taldera iritsi momentu errazetan, aurreko urteetan bigarren mailara jaisteko zorian egon baitzen, baina 2003an Ligan txapeldunordea izatea lortu zuen.

Azkenik, onenen artean ere, Rafael Iriondo eta Jose Antonio Irulegi baditugu.

1918-23: Jose Angel Berraondo 1923-26: Lippo Hertzka 1926: Luis Ortiz de Urbina 1926-30: Benito Diaz 1930-35: Harry Lowe 1939-41: Gaspar Gurruchaga 1941-42: Sebastian Silveti eta Patxi Ganborena 1942-51: Benito Diaz 1951-55: José Ignacio Urbieta 1955-60: Salvador Artigas 1960: Joseba Elizondo 1960-62: Baltasar Albeniz 1962: Joseba Elizondo 1962-63: Perico Torres 1963-64: Antonio Barrios 1964-66: Roman Galarraga 1966-70: Andoni Elizondo 1970-71: Angel Segurola 1971-72: Andoni Elizondo 1972-74: Rafael Iriondo 1974-76: Andoni Elizondo

1976-78: Jose Antonio Irulegi 1978-85: Alberto Ormaetxea 1985-89: John Benjamin Toshack 1989-91: Marco Antonio Boronat 1991: Javier Exposito 1991-94: John Benjamin Toshack 1994-95: Salva Iriarte 1995-97: Javier Irureta 1997-99: Bernd Krauss 1999-00: Javier Clemente 2000: Periko Alonso 2000-02: John Benjamin Toshack 2002: Roberto Olabe 2002-04: Raynald Denoueix 2004-06: Jose Maria Amorrortu 2006: Gonzalo Arconada 2006: Jose Mari Bakero 2006-07: Miguel Angel Lotina 2007-08: Chris Coleman 2008: Jose Ramon Eizmendi 2008-09: Juan Manuel Lillo 2009-2011: Martin Lasarte 2011tik: Philippe Montanier

Beste sekzioak

• Emakumezkoen belar hockeya: 1932an sortua, sekzio hau izan da guztien artean arrakastatsuena historia osoan, nahiz eta hemen bazter batean agertu. 1992, 1996 eta 2000. urteetako Joko Olinpikoetan Errealeko hainbat jokalarik hartu zuten parte, eta Bartzelonako Olinpiadetan Urrezko Domina ere lortu zuten bost jokalarik Espainiako taldearekin.

Hiruna aldiz irabazi dituzte hala Liga txapelketa (1992/93, 1997/98 eta 1998/99an) nola Erreginaren Kopa (1986/87, 1993/94 eta 2001/02an). Aretoko hockeyan, aldiz, 4 aldiz izan dira txapeldunak (1976/77, 1980/81, 1991/92 eta 1997/98an).

Jokalari aipagarriak: Teresa Motos (Klubaren Urre eta Diamantezko Domina), Nagore Gabellanes, Maider Telleria, Silvia Manrique, Mari Carmen Barea, Arantza Urruzuno (Klubaren Urrezko domina), Mari Aiestaran (Klubaren Urrezko domina), Begoña Larzabal, Elena Urkizu eta Erdoitza Goikoetxea.

• Atletismoa: 1914tik dago martxan sekzioa. Aipatzeko atletak, historian zehar, ondokoak ditugu: Jose Luis Elosegi, Fernando Aguilar, Arantza Vega, Félix Mendizabal, Diego Ordóñez, Jose Luis Falcon, Ramon Cid, Juan Jose Prado eta Mikel Odriozola.

• Gizonezkoen belar hockeya: 1916 inguruan abiatua. Palmares oparoa dauka sekzioak, baina ez emakumezkoena bezain distiratsua: Gipuzkoako Txapelketa (1960/61, 1961/62, 1964, 1965, 1966/67, 1976/77, 1981/82, 1982/83, 1983/84 eta 1985/86), Euskal Kopa (1928, 1929/30), Errege Kopa (1919), Espainiako txapelketa (1929/30).

• Pilota: Besteak beste, Errealeko hurrengo pilotariek ospea lortu dute historian zehar: Jesus Gurrutxaga, Juan Cruz Artola, Lucio Unanue, Jose Eugenio Fernandez, Ramon Ezkurdia, Oscar Herrera eta Javier Letamendia.

• Urpeko jarduerak: 1968an abiatuak. "Itsaspeko Zinemaren Nazioarteko Zikloa" delako zinemaldia antolatzen dute urtero, Europa mailan ezaguna dena.

Ikus, gainera

• Errealeko presidenteen zerrenda
• Errealeko entrenatzaileen zerrenda

Kanpo loturak

• (Euskaraz) Errealaren webgune ofiziala
• (Gaztelaniaz) (Euskaraz) Errealaren 100 urteko historia erreportaia ikusgai. Eitb.