Roland Garros txapelketa
Roland Garros txapelketa edo Frantziako Irekia (frantsesez Internationaux de France edo Tournoi de Roland-Garros) munduko tenis norgehiagoka nagusietakoa da, lurrezko zelaian. 1925an sortu zen eta 1928tik urtero ospatzen da Parisen, Roland-Garros estadioan (16. barrutian). 1891ean sortutako Frantziako Txapelketaren ondorengoa da. Frantziako Tenis Federazioak (Fédération française de tennis) antolatua, maiatzeko azken astean eta ekaineko lehenegoan izaten da. Grand Slamgo lau txapelketako bat da, urteko bigarrena Australiako Irekiaren ondoren (urtarrilean) eta Wimbledonen aurretik.
Frantziako Irekia lurrezko zelaiko tenis txapelketa nagusia da, eta Grand Slamgo bakarra zoru mota horretan, AEBetako Irekiak 1978an zoru mota aldatu zuenetik. Munduko tenis txapelketa garrantzitsuenen artetik, Wimbledongoaren ostean bigarren dela jotzen da,[1] nahiz eta ikusle gehien dituena eta mediatikoena den.[2][3] Gainera, gehienbat lurrezko zelaietan jokatzen diren herrialdeetan, hala nola Latin Amerikan eta Hegoaldeko Europan, txapelketa hau urteko garrantzitsuentzat jotzen dute. Gainazal mantsoa eta 5 seteko partidak direla-eta, Roland-Garros tenis txapelketa zailena eta fisikoki zorrotzena dela esaten da.[4]
Txapeldun nagusiak
Buruz-burukoan, Max Decugis (8) eta Bjorn Borg (6) titulu gehien lortu duten gizonezko tenislariak izan dira, eta Chris Evert (7), Suzanne Lenglen eta Steffi Graf (6na) emakumezkoenean.
Sariak
2009an, diru sariak berdinak ziren gizonezko eta emakumezko banakakoentzat:[5]
| Irabazlea | 1.060.000 € |
| Finala | 530.000 € |
| Final erdia | 265.000 € |
| Final laurdena | 132.500 € |
| Laugarren jokaldia | 68.400 € |
| Hirugarren jokaldia | 40.600 € |
| Bigarren jokaldia | 24.500 € |
| Lehen jokaldia | 15.000 € |
Erreferentziak
- ↑ (Ingelesez) Clarey, Christopher. (2001-06-30). Change Seems Essential to Escape Extinction : Wimbledon: World's Most-Loved Dinosaur. .
- ↑ Conférence de presse d'après tournoi. 2007-06-10.
- ↑ Roland Garros FFT. .
- ↑ (Ingelesez) Clarey, Christopher. (2006-05-26). In a year of change at Roland Garros, the winners may stay the same. .
- ↑ Diru sariak
Kanpo loturak
 |
Wikimedia Commonsen badira fitxategi gehiago, gai hau dutenak: Roland Garros txapelketa |
- (Ingelesez) Roland Garroseko webgunea