Stephen Smale
Stephen Smale (Flint, Michigan, 1930eko uztailaren 15a) estatubatuar matematikaria da. Michiganeko Unibertsitatean ikasi zuen, eta doktoregoa Ann Arborren eta R. Botten zuzendaritzapean egin zuen. 1957an aurkeztu zuen tesia. 1956tik 1958ra, Chicagoko Unibertsitatean aritu zen, eta, hurrengo urteetan, Princetoneko Ikerketa Aurreratuetako Institutuan eta Rio de Janeiroko Matematika Huts eta Aplikatuetako Institutuan, beka bati esker. 1960an, Berkeleyko Kaliforniako Unibertsitateko irakasle laguntzaile izendatu zuten. 1995ean, postu hura utzita, Hong Kong Hiriko Unibertsitatera joan zen. Moskuko Matematikarien Nazioarteko Kongresuan (1966) Fields domina eman zioten. Poincaréren aieruan eta sistema dinamikoetan egin zituen Smalek ekarpenik garrantzitsuenak. Hala ere, 1970eko hamarkadan, ekonomia aztertzen hasi zen, topologia eta dinamika erabiliz. Gaur egun, ordenagailuen zientzia teorikoa aztertzen ari da. Horretarako, Turingen makinak eta zenbakizko analisia erabili ditu. Fields dominaz gainera, Geometriako Veblen saria jaso zuen 1966an Amerikako Elkarte Matematikoaren eskutik. 2007an, Matematikako Wolf saria eman zioten.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
| Autoritate kontrola |
|
|---|
Datuak: Q315394
Multimedia: Stephen Smale / Q315394