Timan mendilerroa

Wikipedia(e)tik
Hona jo: nabigazioa, Bilatu

Timan mendilerroa (errusieraz Тиманский кряж, tr.: Timansky Kryazh) Errusiako europar zatiaren iparraldeko muturrean dagoen gune menditsu bat da. Timan mendilerroaren zatirik handiena Komi Errepublikan kokatua dago, iparraldereneko zatiak Nenetsiako okrugean eta Arkhangelskeko oblastean kokatuta dauden arren. Timan mendilerroko tontorrik garaiena 463 metrotan dago.

Mendilerro hau Ural mendien mendebaldean dago, eta Europa Ekialdeko Ordokiaren zati da. Petxora ibaiaren mendebaldean dago, Errusia iparraldeko lautadak mendebaldekoetan eta ekialdekoetan banatzen dituelarik. Mendilerro hau iparraldean Barents itsasoan amaitzen da.

Mendi hauek, tundra eta taigako gerrikoen artean kokatuak daudenak, muino menditsuzko lurralde batek bereizten ditu. Izotz Aroan eratu eta moldatu zirenak. Zenbait ibaik mendilerro honetan dute euren iturria, horien artean Izhma ibaia (Petxoraren ibaiadarra), Vym ibaia, Mezen ibaia eta Vytchegda ibaia, azken hau Iparraldeko Dvina ibaiaren ibaiadrra.

Gune honetako herri edo hiririk handiena (biztanle askorik ere ez duena), Ujta da, 1930ean fundatu zena Timan mendilerroa lehengaiak ateratzeko irekitzeko asmoarekin. Naturgas, petrolio, bauxita eta titanio mea ugari daude.

Koordenatuak: 64°36′N 50°24′E / 64.600°N 50.400°E / 64.600; 50.400