Willem de Kooning

Wikipedia(e)tik
Hona jo: nabigazioa, Bilatu
Emakume eseria, Rotterdam.

Willem de Kooning (Rotterdam, Herbehereak, 1904 - Long Island, Ameriketako Estatu Batuak, 1997) estatubatuar margolaria izan zen, sortzez herbeheretarra.

Estilo espresionista abstraktua landu zuen, eta eragin handia izan zuen ondorengo margolariengan eta estiloetan.

Biografia[aldatu | aldatu iturburu kodea]

Gaztetan, eskola utzita, aprendiz hasi zen artista komertzialen eta dekoratzaileen enpresa batean. Lan egiteaz gainera, baina, Rotterdameko Akademian arteko eskolak hartu zituen.

1926an Estatu Batuetara joan zen, eta artista komertzial gisa lan egin zuen. Hurrengo hamarraldian muralak egin zituen administrazio federalaren arte-programaren barruan, eta agerian utzi zuen oso ongi ezagutzen zuela Picassoren lana.

1948an, New Yorken, zuri-beltzeko obra abstraktuen erakusketa bat egin zuen, eta New Yorkeko eskolako espresionismo abstraktuaren buruzagietako bat bihurtu zen. Action painting esapidea Willem de Kooningen lana definitzeko erabili zen lehen aldiz, hark egiten zituenak bezalako marra indartsu, zabal eta oso markatuak adierazteko. Garai hartako obra onenetakoak dira bere bi margolan: Asheville (1948, Phillips Bilduma, Washington) eta Hondalana (1950, Chicagoko Arte Institutua).

1953an Emakumea izeneko sei obren erakusketa egin zuen; deabruak bezalako irudiak ziren, kolore bortitzez eta ore lodiz eginak. Irudi-sail berritzailea zen, pintura figuratiboa arte abstraktuarekin lotzen zuelako.

50eko hamarraldiaren bukaeran, estilo abstraktuagoa erabili zuen, paisaiak iradokitzen zituzten irudiak eginez, eta harrezkero, estilo figuratiboa eta abstraktua txandakatu zituen, edo nahastu, zenbaitetan. Aldi berean, litografiak egin zituen, eta 1969tik aurrera, brontzezko eskultura figuratiboak.

1980an, Andrew W. Hellon saria irabazi zuen, Pittsburgh Internationalen, Eduardo Txillida eskultorearekin batera.

Commonsen badira fitxategi gehiago, gai hau dutenak: Willem de Kooning Aldatu lotura Wikidatan


Erreferentziak[aldatu | aldatu iturburu kodea]