Zegama

Zegama
Gipuzkoa
Zegamako ikuspegi orokorra.
Izen ofiziala	Zegama
Estatua Erkidegoa Lurralde Historikoa Eskualdea	Espainia Euskal Autonomia Erkidegoa Gipuzkoa Goierri
Alkatea	Urko Gomez Ropon (Bildu)
Herritarra	zegamar
Koordenatuak	42°58′36″N 2°17′27″W
Eremua	35,07 km2
Garaiera	300 m
Distantzia	53 km Donostiara
Posta kodea	20215
Biztanleria	1.553 bizt (2011)
Dentsitatea	44,28 bizt/km²
Sorrera	1615
http://www.zegama.net

Zegama Gipuzkoako hegoaldean dagoen udalerria da, Goierri eskualdekoa. Arabako mugan eta Nafarroako mugatik hurbil dago, haran menditsu batean, mendiz inguraturik, Oria ibaiaren ertzean. 2008an 1.454 biztanle zituen.

Zegamak 296 metroko garaiera du, eta 35 km²-ko azalera.

Mugakideak

Mugakide ditu iparraldean Zerain eta Segura, ekialdean Segura berriro eta Idiazabal, mendebaldean Legazpi, eta hegoaldean Asparrena eta Zalduondo (biak Arabakoak).

Zegamako udaletxea.

Inguru naturala

Aizkorriko mendilerroak eta Altzaniako mendiek Arabatik banatzen dute udalerria. Zegama Aizkorriren barrenean dago, Gipuzkoa eta Araba arteko bidean. Era berean, Nafarroatik ere oso hurbil dago.

Zegama Gipuzkoa eta Arabako pasabide natural garrantzitsu batean dago: Otzaurtetik eta Lizarratetik barrena doana, hain zuzen. Bide hori Erdi Aroaz geroztik behintzat erabili izan da Arabarekin bat egiteko.

Ekonomia

Zegamako jarduera ekonomiko nagusia industria da. Papera eta papergintzako produktuak ekoizten ditu, tresneria, eraikuntzarako materialak, lixibak, kloroa eta automobilen piezak.

Nekazaritzak eta artzaintzak ere garrantzia dute herrian. Nekazaritza mota ozeanikokoa da: artoa, patatak, barazkiak eta belarra ekoizten da. Ardien abeltzaintza ere nabarmena da.

Euskara

Sakontzeko, irakurri: Goierriko hizkera

Klima

Zegamako elizaren ataria.

Zegamak klima atlantikoa dauka. Haren batez besteko tenperatura 12° C ingurukoa da. Toki euritsua da, egun euritsuak gutxi gorabehera urtearen erdiak dira, eta udazken haizetsuak ditu.

Garraiobideak

Zegama ingurutik, baina ez herritik bertatik, N-1 errepidea igarotzen da. Gipuzkoa eta Araba lotzen dituen errepide nagusi honetara iristeko bi modu daude, bata Etxegaratetik eskualde mailako GI-2637 errepidea jarraituz (Arabatik etorriz gero) eta bestea Beasaindik errepide bera baina iparraldetik hartuz (Donostiatik etorriz gero).

Irun-Madril trenbidea udalerritik igarotzen da eta bi geltoki ditu, Apeaderoa eta Otzaurte.

Garraio publikoari dagokionez, Goierrialdea autobus konpainiak Zegama-Beasain bidea eskaintzen du.

Kirolak

2004. urtetik aurrera, maiatzero, Mendi Lasterketako Munduko Koparako puntuagarria den Zegama-Aizkorri mendi maratoia egin ohi da.

Demografia

Zegamako biztanleria

1897	1900	1910	1920	1930	1940	1950	1960	1970	1981	1991	2001	2006
2.147	2.188	2.109	1.993	1.952	1.970	1.898	2.079	1.775	1.542	1.399	1.294	1.348

Iruditegia

• 

  Eraikina

• 

  Eraikina

Zegamar ezagunak

• Klaudio Otaegi (1836-1890), olerkaria.
• Anjel Goenaga (1915-1974), euskal idazlea.
• Pio Berasategi (1935-), euskal idazlea.
• Joxe Azurmendi (1941-), filosofoa.
• Joxantonio Ormazabal Berasategi (1948-2010), euskal idazlea.
• Aitor Pérez Arrieta (1977-), txirrindularia.

Kanpo loturak

• (Euskaraz)(Gaztelaniaz) Zegamako Udalaren webgunea