47 rōnin

Wikipedia, Entziklopedia askea
Jump to navigation Jump to search
47 rōnin gerlarien hilarriak, Sengaku-ji tenpluan, Tokio.

47 rōnin (japonieraz: 四十七士, Shi-ju Shichi-shi, Yon-ju Nana-shi), Akō gertakaria (赤穂事件 Akō jiken), Genroku Akoren ezbeharra (元禄赤穂事件, Genroku ako jikeno) edota 47 samuraien kondaira, Japoniako kontakizun bat da, aditu batzuen arabera herrialde horretako kondaira nazionala. Gertaera hau 1701-1703 artean jazo omen zen eta samuraien ohorezko kodea goraipatzen duen kondairarik ospetsuena da: Bushidō delakoa. Dena den, kode hori deskribatua dagoen Hagakure liburuan ez zen handik urte batzuetara baino idatzia izan.

Kondairak rōnin (浪人, "jaunik gabeko samuraia") bilakatzera derrigortuak izandako samurai talde baten istorioa azaltzen du, beren daimyōa (jauntxo feudala) seppukua egitera behartuarazia izan ondoren (erritual suizida), aurrez Shōgunaren Gaztelu Handian Kira Kozukenosuke izeneko gobernuaren goi funtzionari bati eraso egiteagatik. Menpekoak, behin beren jauna zendu ondoren, berau mendakatzeko plan bat gauzatu zuten, nagusiki Kira Yoshihisa hiltzean oinarritzen zena. Baina Kirak berau hiltzeko asmoa zutela susmatuta, zaindariak kontratatu zituen. Honela, Kira ustekabean harratzeko asmoz, samuraiek urte eta erdi itxaron zuten. Adostutako eguna eta ordua iristean, klaneko kide guztietatik 47 bakarrik elkartu ziren. Baina horrek ez zituen atzera bota, Kiraren etxea erasotu eta hil egin zuten. Haren burua Sengakuko tenplura eraman zuten, beren jauna lurperatua zegoen lekura. Eta haren hilobian burua aurkeztu eta otoi egin ostean, 47 samuraiek beren buruak agintarien menpe jarri zituzten, hauek seppuku egitera zigortu zituzten.

Kondaira hau ziztu bizian Sortaldeko Eguzkiaren herrialde osoko txoko guztietara hedatu zen, eta leku guztietan samuraiek beren jaunari erakutsitako leialtasuna, sakrifizioa eta menpeko leialen borondate irmoa mirestua izan zen, jada gerrak eta ekintza bortitzak iraganeko gertaerak bezala ikusten ziren garaian. Meiji Aroa eta herrialdearen modernizazio azkarraren garaian kondairak japoniarren artean oraindik eta ospe gehiago bereganatu zuen, beren jatorrizko kulturaren sustraietara itzultzeko gura baizuten.

Ikus gainera[aldatu | aldatu iturburu kodea]

Wikimedia Commonsen badira fitxategi gehiago, gai hau dutenak: 47 rōnin Aldatu lotura Wikidatan