Artzain Ona katedrala

Artzain Ona katedrala
Kostaldeko Donejakue bidea
Artzain Onaren katedralaren aurrealde eta dorrea. Irudi gehiago
Kokapena
Herrialdea	Euskal Herria
Probintzia	Gipuzkoa
Udalerria	Donostia
Koordenatuak	43°19′00″N 1°58′54″W
Historia eta erabilera
Irekiera	1897
Erlijioa	katolizismoa
Elizbarrutia	Donostiako elizbarrutia
Izena	Jesus Nazaretekoa
Edukiera	4.000
Arkitektura
Estiloa	arkitektura neogotikoa
Ondarea
745
Webgune ofiziala

Artzain Ona katedrala Donostiako katedrala da, 1897an Manuel Etxabe arkitektoak estilo neogotikoan eraikia. Hiriaren erdialdean dago, Artzain Onaren plazan. Donostiako elizbarrutiaren egoitza nagusia eta Iruñea eta Tuterako artxidiozesiaren barnean dago. Donostiako eliza nagusia eta handiena da.

Latindar gurutze itxurako oinplanoa du. Sarrerako atarian, tinpanoan, Eduardo Txillidaren alabastrozko gurutzea dago. Neogotiko estilokoa da eta 1953. urtea ezkeroztik katedral maila du.

Historia

1881ean Errege Aginduz, Donostiak elizbarruti berria izango zuela erabaki zen. Parrokia berri bat ere eraikitzekoa zen hiriko hegoaldean, biztanleen aspalditiko eskaria, gerora Amara‎ko zabalgunea deitu zen eremuan. 1887ko abuztuan Donostiako Udalak Urumea ibaiaren eta Kontxako hondartzaren arteko hondartza eta padura eremua laga zuen eliza berria eraiki zedin. Amaituta egon arte, elizkizunak eliza soil batean egin ziren, Loiola eta Printzearen kaleen artean zurez eraikia.

1887ko abenduan, Martin Lorenzo Urizar Zalduegi-Ariño buru zuen eraikuntza batzorde batek proiektuen lehiaketaren arauak ezarri eta aurrekontua 750.000 pezetatan ipini zuen. Halaber, elizaren edukierak eta arkitektura estiloak nolakoak izan beharko zuten zehaztu zen. Lehiaketara lau proiektu aurkeztu ziren, eta Manuel Etxabe donostiarrarena hautatu zen: eraikuntza lanen zuzendaritzaren ardura ere eman zitzaion. Eliza berria Artzain Onaren omenez sagaratu zen.

Eraikina

Dirudienez, Etxabe proiektua gauzatzerako unean Koloniako katedralean oinarritu omen zen. Donostiar tenpluaren neurriak honakoak dira: 1.915 metro koadroko azalera, nabeen 25 metroko garaiera, 75 metro garaierako dorre bat, 64 metro luzeko erdialdeko nabea eta gehienezko 36 metro zabaleko gurutzadura, eta denera, 4.000 pertsonarentzako edukiera.

Organoa

Sakontzeko, irakurri: «Artzain Onaren katedraleko organoa»

Katedraleko organoa tenpluaren koroaren goialdean 1954ko urtarrilaren 19an inauguratu zuten, Donostiako elizbarrutia sortu eta hiru urte pasa eta gero eta katedrala eraiki eta hilabete batzuk geroago. Cavaillé-Coll organoak Aquilino Ametzuak egindako organo bat ordezkatu zuen.

Zaharberritzea

Katedrala zaharberritua izan da behin baino gehiagotan, azken aldia 2019-2020 izanik. Elizaren jabetzako eraikina izanik ere, zaharberritze lanen finantzaketaren % 87 erakunde publikoek egin zuten, Donostiako EH Bilduk salatu zuenez. Salaketa horren arabera, Eneko Goia alkateak diru publikoko 400.000 euro eman zizkion Juan Ignacio Munilla apezpikuari, udal aurrekontuetan onartu gabe.

Erabilera

Egunero irekita dago eta mezak igandero eta larunbatero ematen dituzte. Kultuaz gain, musika arloa beste erabilera nagusietakoa da: besteak beste bertan Musika Hamabostaldia antolatzen denean.

Bestalde, haurrek elizaren kanpoaldea erabiltzen dute hainbat kirol egiteko.

Iruditegia

• 
  Aurrealdea.
• 
  Beiratea.
• 
  Nabea.
• 
  Atzealdea.
• 
  Eduardo Chillidaren Camino hacia la paz (1997) eskultura, Katedralaren fatxada nagusian.

Ikus, gainera

• Euskal Herriko basilikak

Kanpo estekak

• (Gaztelaniaz)(Frantsesez)Katedralari buruzko informazioa.

• Datuak: Q2942904
• Multimedia: Cathedral of San Sebastián / Q2942904