Asteasu

Asteasu
Gipuzkoa, Euskal Herria
Elizmendiko San Pedro eliza.
Administrazioa
Estatua	Espainia
Erkidegoa	Euskal Autonomia Erkidegoa
Lurraldea	Gipuzkoa
Eskualdea	Tolosaldea
Izen ofiziala	Asteasu
Alkatea	Maria Pilar Legarra Cortajarena
Posta kodea	20159
INE kodea	20014
Herritarra	asteasuar
Kokapena
Koordenatuak	43° 11′ 34″ N, 2° 05′ 43″ W
Asteasu Asteasu (Gipuzkoa)
Ikusi OpenStreetMapen
Azalera	16,76 km2
Garaiera	142 metro
Distantzia	22 km Donostiara
Demografia
Biztanleria	1.493 biztanle (2016) ( -20)
% 52,85    % 47,15
Dentsitatea	89,08 biztanle/km²
Hazkundea (2003-2013)	% 14,88
Zahartze tasa	% 20,28
Ugalkortasun tasa	‰ 50
Ekonomia
Jarduera tasa	% 83,33 (2011)
Genero desoreka	% 2,35 (2011)
Langabezia erregistratua	% 9,31 (2013)
Kultura
Euskaldunak	% 77,98 (2010)
Euskararen erabilera	% 52,8 (2011)
Datu gehigarriak
Sorrera	1375. urtea
Webgunea	http://www.asteasu.eus/

Asteasu Gipuzkoako erdialdeko udalerri bat da, Tolosaldea eskualdekoa. 2016. urtean 1.493 biztanle zituen. Ekialderantz begira dagoen haran batean dago, Oria ibaiaren adar Asteasu errekaren haranean hain zuzen, eta irteera naturala Amasa-Villabonarantz du. Tolosatik 10,5 kilometrora eta Donostiatik 23 kilometrora dago errepidez.

Geografia

Ingurune naturala

Asteasu ekialdera begira dagoen haran batean kokaturik dago, Hernio (1.070 m) mendiaren magalean. Udalerriaren topografia oso malkartsua da, gorabehera askorekin. Punturik baxuena (70 metro inguru) ekialdeko muturrean dago, Asteasu Amasa-Villabonarekin lotzen duen errepidean; punturik altuena, berriz, hego-mendebaldeko muturrean dago (700 metro).

Hernion mendigunearen lepoetako batek udalerria zeharkatzen du erditik, hego-mendebaldetik ipar-ekialdera garaiera galduz. 400-600 metro inguruko garaieraraino iristen den lepo honetako muino nagusiak Mañaka, Aranburuko gaina, Irumuno, Bulanomendi (550 m), Saskarate-aitza, Upazaingaña (300 m), Santa Maiña (400 m) eta Aitzondo dira. Bere garaian Larrazkos eta Azkonobietako basoak famatuak izan ziren, bi baso-lur horiek luze-zabalean 5000 area izateraino iritsi baitziren. Herria bera udalerriaren ekialdean dago.

Oriaren adarra den Asteasu erreka udalerriaren hegoaldetik igarotzen da. Usarrabi errekak (Oriaren beste adarra) eta beste bi ibaixken urek ere (Opin-erreka eta Erreka Illuna) zeharkatzen dute haren lurraldea.

Asteasutik pasatzen da GI-2631 errepidea, Tolosaldea Zarautzekin lotzen duena, Andazarrate gainetik barrena.

Udalerri mugakideak

Asteasuk mugakide ditu Aia iparraldean, Zizurkil ekialdean, Larraul, Alkiza eta Anoeta hegoaldean, eta Errezil eta Aia mendebaldean.

Auzoak

• Asteasu (herrigunea), bertako hizkeran "Astiasu" edo "kalia" ere deitua.
• Bebailara, bertako hizkeran Beballa.
• Elizmendi, bertako hizkeran Elemendi.
• Errekaballea.
• Goiballea.
• Upazan.

Historia

Erdi Aroan sortutako herria da, jatorria erabat argi ez badago ere. Diotenez Alfonso VIII.a, 1203an, izan omen zen Asteasuri armarria eman ziona. Mendearen hasierako testu batek honela dio: "Zilarrezko atzealdean hiru makila gorri daude; hauetan, suge gorri bat kiribiltzen da; goialdean, alde banatan, gora begira dauden giltza beltzekin eratutako bi ikoroski daude, eta hauen erdian pontifize tiara bat dago. Kanpoaldeko ertzean inskripzio hau ageri da: Asteasu, Aiztondoko Alkatetza Nagusiko buru". Aiztondoko Alkatetza Nagusia osatzen zuen Larraul eta Sorabillarekin, Gipuzkoako hiru alkatetza handienetakoa, eta bertako hiriburua zen. 1397an Probintziako Ermandadetako Ordenantzetan espresuki aipatzen da Aiztondoko Alkatetza. Asteasu 1386an Tolosari itsatsi zitzaion Alkiza eta Adunarekin batera. Handik urte gutxira berriro bereizi zen. 1457an Gipuzkoako lurraldean gertatu ziren Ahaide Nagusien kontrako borrokan, haiei babesa ematen zien Asteasuko etxe nagusia suntsitua izan zen. 1760an udaletxea inauguratu zen. 1813an bere artxibategia erre zen soldadu frantziarrek sortutako sute baten ondorioz. Bitxikeria gisa aipa daiteke bigarren karlistaldian Santa Kruz apaiza azken aldiz Asteasun ikusia izan zela, erbestera joan aurretik.

Asteasuko herrigunea Elizmendi auzotik. Goian, hondoan, Larraul.

Ekonomia

Nekazaritzak pisua izan bazuen ere, gaur egun industriak garrantzi handiagoa du. Hainbat lantegi ditu 50 langiletik gorakoak ondoko lehen hirurak:

• Bost Machine Tools Company
• Gamesa
• Urbar Ingenieros
• Omicron

Euskara

Play media

Asteasuko Rufina Irazuren testigantza, aita gerran hil zuteneko kontakizuna. Euskal Herriko Ahotsak proiekturako egindako elkarrizketa, ahozko ondarea jaso eta zabaltzeko.

Asteasuko euskara gipuzkeraren aldaera bat da, Tolosaldekoa, Gipuzkoako erdiguneko euskararen barne dagoena, Beterrikoarekin batera.

Demografia

Asteasuko biztanleria

Politika

2003tik 2011ra Iñaki Amenabar izan zen alkatea. 2011ko maiatzaren 22ko hauteskundeetako emaitzen ondorioz, Asteasu Batuz plataformako Pili Legarra hautatu zuten alkate. 2015eko hauteskundeetan Asteasu Batuzek 7 zinegotzi atera ditu, Pili Legarra duela zerrenda-buru, eta EAJak 2.

Asteasuko udalbatza
Izena	Zinegotziak	Boto kopurua
Asteasu Batuz	6	495 (%62,82)
Bai Asteasuri	2	211 (%26,78)
Euzko Alderdi Jeltzalea (EAJ)	1	76 (%9,64)
Alderdi Popularra (PP)	-	6 (%0,76)

Ondasun nabarmenak

• Udaletxea, Jose Lizardi arkitektoak egina, herriko eraikuntza ikusgarrienetakoa da. Udaletxearen eraikuntza korapilatsua izan zen, izan ere, lurrak erosi eta 1752an, hiriko semea zen Jose Lizardiren traza baten arabera abiatu eraikin lanak abiatu zirenean, Jose Lizardi bera hil baitzen. Baina, Asteasun ez zen har­gin‑mai­su onik falta, eta zenbait enkanteren ondoren, Usandizaga maisuak eskuratu zuen egitekoa; baina lanen hasiera urte ba­tzuetara atzeratu zen. Eraikin lanak 1754an hasita ere, zenbait al­ditan eten beharra gertatu zen, arazo ba­tzuen kon­tsulta bidera­tzeko: aurreikusitako harlangai­tzaren ordez mu­txardaturiko harlandua hautatu zen, zenbait puntutako okerdurak zuzendu beharra izan zen eta abar. Bukatu­tzat eman zen eraikin lana 1760an, teilatuetako arotz‑lanak, eskailera eta zoladurakoak bar­ne.

Asteasuko Udale­txeak barroko ku­tsu handi­txoagoa du Lizardik trazaturiko beste kon­tzeju eraikun­tzek baino. Frontoi triangeluarra du, profil berezia duena. Frontoi triangeluarreko beste udaletxetan ez bezala, eu­tsi egingo zaio Asteasun hiru ar­ku besterik ez duen ar­kupeari, alboetan leiho soilak dituela, Legaz­piko udaletxearen antzera.

Eskubanden batasuna deigarria gerta­tzen da, lehenengo solairuan erdiko hiru bal­koiak eta goieneko solairuko bostak el­kar­tzen dituena. Baoak uztai­tzen dituzten plakak, zura taillatua duen teilatu‑hegal zabalaren az­piko erlaitz mol­duratuak eta hormapikoaren ardatz bertikala az­pimarra­tzen duen armarriaren erliebe handiak alai­tzen dute gainazala.

• Eizmendiko San Pedro eliza XVI. mendean eraikia da, gotiko euskaldun estilokoa; baina aurreko elizaren aztarnak ikusten dira. Balio berezikoak ditu ponte-harria eta jatorrian 1572 eta 1575 bitartean Juan Antxieta eskultoreak egindako errataulu nagusia, ondorengo urteetan Intxaurrandiagak eraldatua. Korua ere azken horrena da.
• Santa Krutz baseliza eta Santa Marina baseliza.
• Etxe ederren ondarea ugaria da: Goikostatu, Zumargain, Etxeberritxo, Illobate, Elkeita, Saskarate, Irarretxe, Albistegi, Etxenagusia, Aginazpe, Ugarte, Matxine, Ugarte baserria eta Erreitzu baserria XVI. mendekoa.
• Zortzi errota omen ziren Asteasun, dokumentuek diotenez: Urmategi-errota, Karien-errota, Urniti-errota, Gorue-errota, Betezasti-errota, Beko-errota edo Soro-errota, eta Konporta-errota; azken hori ezaguna zen Goiko-errota izenaz ere, eta Pello Errota bertsolariaren jaiotetxea izan zen. Gehienak desagertuak daude.

Asteasuar ospetsuak

Bernardo Atxaga, asteasuarrik ospetsuena.

• Domingo Goroa, XVII. mendeko eskultorea.
• Pedro Zaldua , XVII. mendeko arkitektoa. Eztabaida dabil, ea Zizurkilen edo Asteasun jaio zen.
• Juan de Legarrola Flandesko kapitaina, 1686an Hondarribian sarjentu nagusia
• Pedro Irarreta (1673–?), teniente koronela eta Asteasuko alkatea.
• Julian Lizardi (1696-1735), Paraguain misiolari ibilitako martiri jesulaguna. Elizan ehortzia dago.
• Juan Bautista Agirre (1742-1823), euskal idazlea.
• Jazinta Arruti (1827-1899) bertsolaria.
• Jose Inazio Etxaburua (1840-1900) bertsolaria, Asteasuko Itsua.
• Pello Errota (1840-1919), bertsolaria.
• Mikela Elizegi (1869-1967), bertsolaria.
• Antonio Arrue (1903-1976), abokatua, Comunion Tradicionalista alderdiko politikaria eta idazlea, Egan aldizkariaren sortzailea Koldo Mitxelenarekin eta Aingeru Irigarairekin batera.
• Juan Cabanas Erauskin (1907-1979), pintorea eta arte-kritikaria. Gu taldearen sortzailea, besteak beste, Aizpuruarekin. Falangekoa.
• Miren Uzkudun (1922–), aitzindaria pilotari emakumezkoetan. Ameriketako pilotalekuetan erraketarekin ibilia.
• Eleuterio Tapia (1926-1988), trikitilaria.
• Bernardo Atxaga (1951-), euskal idazle oparoa, Asteasun oinarritua den Obaba alegiazko herriarekin XX. mendearen bigarren erdialdeko herri-giroa aski modu literarioan islatu duena.
• Joxe Arregi Izagirre (1951-1981), kartzelan torturaz hila.
• Joxean Lopetegi Agerre (1961- ), pilotaria, hainbatetan erremonteko txapeldun izana.
• Julen Lopetegi (1966-), futbolari ohia.
• Xabier Usabiaga (1969-), txirrindulari ohia.

Kanpo loturak

Wikimedia Commonsen badira fitxategi gehiago, gai hau dutenak: Asteasu

Euskarazko Wikipedian bada atari bat, gai hau duena: Gipuzkoa

• Asteasuko Udalaren webgunea
• http://www.errezil.eus/eu/ficheros/1_4373eu.pdf