Ekidna (mitologia)

Greziar mitologian, Ekidna (grezieraz Ἔχιδνα Ekhidna, "sugegorria", latinez Echidna) munstro-ninfa bat zen, Fortzis eta Zeto edo Tartaro eta Gearen alaba, iturriaren arabera. Batzuetan, Drakaina Delphyne (Δρακαινα Δελφυνη, "herensuge sabela") deituriko herensuge bat zen, Hesiodok, Teogonia izeneko bere lanean, munstro femenino bat bezala deskribatua, Tifonekin batera, greziar mito guztietako munstro garrantzitsuen ama. Aurpegia, begi ilun eta beldurgarrizko emakume eder batena zuen, baina, gorputza, suge edo herensuge batena.

Berak, eta bere bikote Tifonek Olinpo mendia eraso zutenean, Zeusek garaitu egin zituen, baina bizitzen jarraitzen utzi zien, baita euren seme-alabei ere, beranduago iritsiko ziren heroientzako erronka bezala. Ordutik aurrera, Arimoitarren herrialdeko kobazulo batean bizi izan zen, Asia Erdialdean, segur aski Sirian kokatutako urrutiko toki mortu bat (Hesiodo, Teogonia. 304).

Bikoteak eta seme-alabak

Tifon eta Ekidnak izan zituzten seme-alabak, honako hauek izan ziren:

• Zerbero zakurra
• Ortro
• Kimera
• Esfingea
• Lernako hidra
• Ladon Herensugea, Hesperideetako herensugea
• Nemeako lehoia
• Prometeoren arranoa
• Kolkidako herensugea
• Kromioko ahardia

Herodotoren arabera, Heraklesek, Ekidnarekin hiru seme izan zituen:

• Agatirso
• Gelono
• Eszites

Ikus, gainera

• Ekidna, Australia eta Ginea Berriko ugaztuna, munstro mitologikoa dela-eta izendatua.