Hornillos jauregia

Hornillos edo Las Fraguas jauregia Las Fraguasen dagoen eraikina da (Arenas de Iguña, Kantabria). Egiatan, Kantabriako handiena den 60 hektareadun orube bakar batean dauden bi jauregi dira. Hektarea guztietatik, 30ek lorategi eta basoak osatzen dute, hasiera batean familia berarenak zirenak.

Jauregiaren inguruan, lursail eta basoaren barnean, 3 solairuko almena motako zaintza-dorre bat dago. Handik hurbil, San Jorge eliza eta erdi aroko itxurako eraikin txiki bat aurkitzen da. Lorategi guztiak birdiseinatuak izan dira etxetzarra birgaitzearen ondorioz; edonola ere, ehunka urteetako zuhaitzak errespetatu egin dira.

Lehen jauregia

Jauregi hau Rafaela Ortiz Mioñok, Cillerueloko dukesak, aginduta eraiki zen, XVIII. mende amaieran. 1840 urtean zabaldu egin zen. XX. mendean hutsik izan zen bigarren jauregiaren eraikuntza zela eta, eta ez zen berreskuratu Alvaro Fernandez Villaverde Silvak, San Carlos-eko dukea bera, birgaitze garaikidea sustatu zuen arte. Duke hura, higiezinaren jabea zen eta leinuraren ondoregoetakoa zen; beronek Luis Castillo arkitektoari eta Luis Gonzalez Camino paisajistari eman zien lanaren ardura.

Gaur egun, 450 metro koadroko lokala du eta hainbat ekitalditarako alokatzen da.

Bigarren jauregia

Bigarren jauregia erdi aroko nekazal-estilo ingelesekoa da, Mariano Fernandez Henestrosa, Santo Mauroko dukearentzat eraikia. Ralph Selden Wornam arkitekto ingelesak burutu zuen lana 1897 eta 1904 urteen artean. Bere diseinuak Magdalena jauregian eragina izan zuen gerora. Estilo bera, Kantabrian zehar hedatu zen 1920 urtean.

Jauregian bertan, XVII. Mendeko bi eskultura aurkitzen dira, Gabriel de Pinedok egindakoak eta Juan Bautista eta Fernando Acevedo anaiak irudikatzen dituztenak. XX. mende hasieran Acebedo de Hoznayo jauregitik eramanak zituzten bertara. Alfonso XIII.aren egoitza izan zen (udaro bisitatzen zuen), Magdalena jauregia eraiki zen arte.

Xehetasun batzuk

Hesiaz inguratutako eremu baten goialdean aurkitzen da, urmael artifizial baten parean. Hainbat gorputzez osatzen da eta aldapa handiko teilatuak dituzte, dorre batez hornituak.

Bitxikeriak

• The Others filma grabatzeko kokagunea izan zen, baina baita bestelako filma eta telebista iragarkientzat ere.