Paris

Artikulu hau Frantziako hiriburuari buruzkoa da; beste esanahietarako, ikus «Paris (argipena)».

Txantiloi:Frantziako udalerri infotaula Paris Frantziako hiriburua da, eta herrialdearen iparraldean dago, Sena ibaiaren ertzean. Hiriak 2.153.600 biztanle ditu, baina bere metropolitar gunea 12.067.000 milioi biztanlekoa da, Europar Batasuneko handiena, Frantziako Uhartea Île-de-France eskualdean dagoena.

Paris gaur egungo ekonomia-gunerik garrantzitsuenetarikoa da, eta bere eragina politikan, artean, komunikabideetan, aisialdian, zientzian eta modan izugarrizkoa da, munduko metropolirik garrantzitsuenetarikoa baita.

Parisko eskualdea, Frantziako Uhartea deritzona, Frantziako ekonomia-gunearen hiriburua da. 500,8 bilioi eurorekin, Frantziako Barne Produktu Gordinaren laurdena sortzen du. La Défense, Europako negozio-barrutirik handiena, Frantziako enpresen erdiaren egoitza nagusia da, eta munduko 100 enpresarik handietik 20rena ere. Era berean, UNESCO edota OCDE bezalako erakundeen egoitzagune ere bada hiriburu frantsesa.

Paris munduko turismo helmuga nagusia da, 30 milioi turistak bisitatzen baitute urtero. Intereseko leku asko daude hirian. Adibidez, Eiffel Dorrea, Notre-Dame katedrala, Garaipen Arkua, Sacré-Cœur basilika eta abar. Horrez gain, Louvre eta Orsay museoek nazioarteko onarpena ere badute, baita Disneyland Resort Paris parkeak ere.

Parisek Europako aireporturik modernoena edukiko du urte gutxi barru, Charles de Gaulle aireportuaren birmoldaketa burutu ostean.

Izena

Paris izena galiar herritik datorkio (sing. Parisius, pl. Parisii). Erromatarren garaian, hiriaren izena Lutetia zen, baina era berean Civitas Parisiorum (Parisii-en hiria) ere bazuen, gerora gailendu zena. Parisii izenaren jatorria, ordea, ezezaguna da, nahiz eta inguruetako hainbat lekuri izena eman: Paris, Villeparisis, Cormeilles-en-Parisis eta Fontenay-en-Parisis. Erromatarren garaian, Parisiiak Ingalaterran ere aurkitzen ziren, egungo Ekialdeko Yorkshire konderrian.

Geografia

Topografia

Parisko arroaren bihotzean kokatua, Paris Sena (Seine) ibaiertzetan dago, gune historikoa sortu zen bi uharteen inguruan: Île de la Cité mendebaldean eta île Saint-Louis ekialdean. Hortik hedatzen da hiria, ibaiaren bi aldeetan: Eskuinaldea (Rive droite) iparraldean eta Ezkerraldea (Rive gauche) hegoaldean.

Paris intra-muros edo harresiz barnekoa, 1860an finkatua inguruko udalerriak bereganatu ostean, boulevard périphérique izeneko ingurabideak mugatzen du, aldirietatik bananduz. Bide laster hau 35 km luze da eta egun hirigintza proiektuak daude zatika estaltzeko, hiriburua eta aldirien arteko lotura naturalagoak egin ahal izateko. Hirira sartzeko Parisko ateeak erabiliz egiten da, antzinako harresietan irekitako ateak, egun sarbide nagusiak autobidez edo kale arruntez.

Muga honen barnean, ibaiaren bi aldeetan, igeltsuzko muinoek hirian orografia markatzen dute. Eskuinaldean daude Montmartre muinoa (131 m), tontorrean Saint-Pierre de Montmartre eliza duela, Belleville muinoa (128,5 m), Ménilmontant (108 m), Buttes-Chaumont (103 m), Passy (71 m) eta Chaillot (67 m). Ezkerraldean daude Montparnasse (66 m), Butte-aux-Cailles (63 m) eta Sainte-Geneviève (61 m).

Ingurabidetik haraindira, Paris batez ere bi eremutan hedatzen da, Haussmann baroiak berrantolatutako basoak: Bois de Boulogne mendebaldean (846 ha, 16. barrutian) eta Bois de Vincennes ekialdean (995 ha, 12. barrutian). Horrela, hirian perimetroa 54,74 km da. 1864tik, Parisko Udala Sena ibaiaren iturbururen jabea ere bada, erdigunetik 231 kilometrora, Source-Seine (Côte-d'Or) herritik hurbil. Udalerriak 105 km² ditu guztira, metropolitar Frantziako udalerrietako 113. luze-zabalena.

Frantziako bideen zero puntua Notre-Dame katedralaren aurrean dago, lauza izardun batek irudikatua.

Hidrografia

Sena gauez: pont des Arts eta pont Neuf

Senak hiria zeharkatzen du arku bat eratuz, hego-ekialdetik sartuz eta hego-mendebaldetik irtenez. Hogeita hamar zubi baino gehiagok ahalbidetzen dute pasabidea, horien artean Pont Neuf ezaguna, hiriko zaharrena.

Beste bi ur-bidek zeharkatzen dute hiria: Bièvre ibaia, hegoaldetik iristen dena eta egun lurrazpikoa, eta Saint-Martin ubidea, 1825ean irekia eta 4,5 km luze dena. Ubidea La Villette urmaelean hasten da, lur azpitik igarotzen da Faubourg-du-Temple karrikatik Bastillaraino, eta Senan isurtzen da. Berez Ourcq ubidearen azken tartea da, baina Senaren saihesbide gisa erabiltzeko ere eraiki zen, Ile Saint-Louis inguruetatik Saint-Denis arteko bidezidorra baita.

Klima

Parisek klima ozeaniko degradatua du: eragin ozeanikoa kontinentala baino handiagoa da, nahiko uda freskoekin (batez beste 18 °C) eta negu leunekin (batez beste 6 °C). Euria maiz egiten du, urtaro guztietan, nahiz eta kostaldean baino gutxiago egin (641 mm).

Hila	Urt	Ots	Mar	Api	Mai	Eka	Uzt	Abu	Ira	Urr	Aza	Abe	Urtea
Batez besteko tenperatura (°C)	4,9	5,6	8,8	11,5	15,3	15,3	20,4	20,4	16,9	13,0	8,3	5,7	12,4

  Hilez hileko batez besteko tenperaturak (Paris-Montsouris).

Historia

Sakontzeko, irakurri: «Parisko historia»

Pariseko mapa historikoa

Parisii galiar herriak menperatzen zuen gaur egungo Parisko eremua Julio Zesarren tropak Paris bisitatu zutenean. Uste da Parisiik fundatu zutela hiria K. a. 250 eta 200 urteen bitartean, baina ezezaguna da hiriaren lehenengo kokapena.

K. a. 52. urtean, erromatarrek hiria bereganatzen dutenean, Lutetia izendatu eta Sena ibaiaren ezkerraldean berreraiki zuten I. mendean. Paris izena IV. mendean jaso zuen hiriak eta Klodoveok, frankoen buruzagiak, hiriburu bihurtu zuen 508. urtean, erromatarrak garaitu ostean. IX. mendean zehar harresiak eraiki zituzten eskuinaldeko ertzean, ezkerrekoa desagertu baitzen.

Filipe Augustoren erregealdian (1190-1220), Paris erreinuaren hiriburu bihurtu zen, eta harresi handiago bat eraiki zuten. XIV. mendean, Karlos V.ak (1371-1380) beste harresi handiago bat eraiki zuen hiriaren defentsarako.

XVI. mendearen amaiera eta XVII. mendearen hasiera bitartean, Henrike IV.ak lehenengo multzo arkitektonikoak eraikiarazi zituen, hala nola Place des Vosges. Bere oinordekoa Luis XIII.ak harresia luzatu zuen eta Luis XIV.ak aipatutako harresia bota eta bere ordez bulebar handiak eraiki zituen. XVIII. mendearen amaieran Frantziako Iraultzak gogotsu jo zuen Frantzia osoa baina batez ere bere hiriburua, Paris; eta bertan jazo ziren lehenengo mugimendu herrikoiak, Bastillako kartzelaren hartzea, esaterako.

Bastilla kartzelaren hartzea

Horren ondoren, Napoleon Bonaparte jeneralak bere burua enperadore izendatu ostean, Paris bihurtu zuen Inperioko hiriburu. Luis Filiperen agintaldian, hiria inoiz baino lasterrago hazi zen. Napoleon III.aren agintaldian hiriaren transformaziorik garrantzitsuena burutu zen. Enperadoreak Haussmann baroia bultzatu zuen Paris momentuko hiririk modernoena bihurtzeko. Hiri zaharra suntsitu eta bulebar handiak eta eraikin modernoak eraiki ziren, Garnier opera haien artean. Ur-hornikuntza berriak burutu ziren, baita beste lan publiko asko ere. Paris, XIX. mendearen bigarren erdialdean, hainbat eta hainbat Nazioarteko Erakusketaren egoitza izan zen. Haien artean garrantzitsuena 1889koa da, iraultzaren lehenengo mendeurrena ospatzeko burutu zena. Ekitaldi honetarako eraiki zen Eiffel Dorrea, hasiera baten denboraldi baterako eraiki zena eta oraindik ere zutik dirauena. XX. mendean Parisko metroaren lanak hasi ziren.

1940an, Wehrmacht-ak (Alemaniako armadak) konkistatu zuen hiria, Bigarren Mundu Gerran, hain zuzen ere. Okupazio-armadak administratu zuen Paris, eta lau urteren buruan abandonatu zuten hiria, hondamendi handirik sortu gabe (beste hiri europar sufritutako horrenbeste ez, behintzat). François Mitterrand presidentearen administraziopean, 80 eta 90ko hamarkadaren hasieran, hiriaren hirigintzak eta azpiegiturek berrikuntza handia jaso zuten. Hiriko gune zail berritu ziren (La Villette eta ezkerraldea, esaterako), eraikin esanguratsu ugari eraiki ziren (Liburutegia Handia, Arche de la Défense edota Orsay museoa), eta Louvreko Museoa guztiz eraberritu zen.

Banaketa administratiboa

Sakontzeko, irakurri: «Parisko barrutiak»

16.a 17.a 18.a 19.a 20.a 12.a 13.a 5.a 6.a 7.a 14.a 15.a 8.a 2.a 3.a 4.a 1.a 9.a 10.a 11.a

Parisko hirigunea 20 arrondissement edo barrutitan banatuta dago, erdigunetik hasita erlojuaren orratzen arabera kanporantz kiribiltzen direnak. Barruti hauek 1860an sortu zituen Napoleon III.ak. Antzinako barrutiak 1795eko urriaren 11n sortu ziren, baina 12 bakarrik ziren. 1859ko ekainaren 16ko legearekin , Thiers harresi barneko aldiriak bereganatu ziren. Horrela, hedadura aldatuta, 20 barruti sortu ziren, zenbaki sistema berriarekin. Horrela, kiribilean izendatu ziren, oraindik indarrean dirauena.

Barrutiaren zenbakia posta kodeko azken bi zenbakitan agertzen da (75001tik 75020ra).

Udal barruti hauek (arrondissements municipaux) ez dira departamendu barrutiekin (arrondissements départementaux) nahastu behar, Parisko barrutiak departamenduen kantonamenduen parekoak baitira. Frantzian, Lyon eta Marseilla dira udal barrutitan banatuak dauden bakarrak, Parisekin batera.

Bar.	Izena	Eremua (ha)	Biztanleak				Dentsitatea (bizt/km²)
			1872	1954	1999	2005	1872	1954	1999	2005
1	Louvre	183	74 286	38 926	16 888	(a)	40 593	21 271	9 228	(a)
2	Burtsa (Bourse)	99	73 578	43 857	19 585	(a)	74 321	44 300	19 783	(a)
3	Temple	117	89 687	65 312	34 248	(a)	76 656	55 822	29 272	(a)
4	Herriko Etxea (Hôtel-de-Ville)	160	95 003	66 621	30 675	(a)	59 377	41 638	19 172	(a)
5	Panteoia (Panthéon)	254	96 689	106 443	58 849	59 300	38 067	41 907	23 169	23 347
6	Luxenburgo (Luxembourg)	215	90 288	88 200	44 919	45 800	41 994	41 023	20 893	21 303
7	Borboi jauregia (Palais-Bourbon)	409	78 553	104 412	56 985	55 700	19 206	25 529	13 933	13 619
8	Eliseoa (Elysée)	388	75 796	80 827	39 314	39 200	19 535	20 832	10 132	10 103
9	Opera (Opéra)	218	103 767	102 287	55 838	58 800	47 600	46 921	25 614	26 973
10	Enclos-St-Laurent	289	135 392	129 179	89 612	89 600	46 848	44 699	31 008	31 004
11	Popincour)	367	167 393	200 440	149 102	150 500	45 611	54 616	40 627	41 008
12	Reuilly	637	87 678	158 437	136 591	139 100	13 764	24 872	21 443	21 837
13	Gobelins	715	69 431	165 620	171 533	177 900	9 711	23 164	23 991	24 882
14	Obserbatorioa (Observatoire)	564	69 611	181 414	132 844	134 200	12 342	32 166	23 554	23 794
15	Vaugirard	848	75 449	250 124	225 362	231 500	8 897	29 496	26 576	27 300
16	Passy	791	43 332	214 042	161 773	146 900	5 478	27 060	20 452	18 572
17	Batignolles-Monceau	567	101 804	231 987	160 860	160 300	17 955	40 915	28 370	28 271
18	Montmartre muinoa (Butte-Montmartre)	601	138 109	266 825	184 586	188 500	22 980	44 397	30 713	31 364
19	Buttes-Chaumont	679	93 174	155 028	172 730	185 400	13 722	22 832	25 439	27 305
20	Ménilmontant	598	92 772	200 208	182 952	188 600	15 514	33 480	30 594	31 538
Bois de Boulogne		846
Bois de Vincennes		995
Guztira		10 540	1 851 792	2 850 189	2 125 246	17 569	27 042	20 164

(a) 1, 2, 3 eta 4 barrutiak guztira: 102.300 biztanle (18.301 bizt/km²)

Biztanleria

Paris harresiz barnekoa

1150	1328	1365	1422	1500	1565	1600	1637	1680	1750	1789
50.000	200.000	275.000	100.000	150.000	294.000	300.000	415.000	515.000	576.000	650.000
1801	1811	1817	1831	1836	1841	1846	1851	1856	1861	1866
546.000	622.636	713.966	785.862	899.313	936.261	1.053.897	1.053.262	1.174.346	1.696.141	1.825.274
1872	1876	1881	1886	1891	1896	1901	1906	1911	1921	1926
1.851.792	1.988.806	2.269.023	2.344.550	2.447.957	2.536.834	2.714.068	2.763.393	2.888.110	2.906.472	2.871.429
1931	1936	1946	1954	1962	1968	1975	1982	1990	1999	2004
2.891.020	2.829.753	2.725.374	2.850.189	2.790.091	2.590.771	2.299.830	2.176.243	2.152.423	2.125.246	2.142.800
Datuak: estimaketa 1801 baino lehen; errolda 1801 ondoren - Iturria: Frantsesezko Wikipedia

Ekonomia

Fitxategi:La Défense.jpg

Pariseko La Défense auzo ekonomikoa

La Défense auzoko ikuspegi orokorra

Paris munduko ekonomiaren erdigune garrantzitsu bat da. 2006 urtean, Pariseko eskualdeko BPGa (Barne Produktu Gordina), 628,9 bilioi dolarretakoa izan zen. Beraz, eskualde honen ekonomia Holandako ekonomia bezain handia da.

Parisko BPGa munduko laugarren postuan kokatuta dago, Tokio, New York eta Los Angeles hirien ostean beti ere. Era berean, Parisko eskualdea munduko 20. metropolitar gunerik handiena da.

Parisko ekonomia oso anitza da eta oraindik ere espezializazio-eza handia du (Los Angeles, Londres edo New York ez bezala, lehenengo hiria zinema-industriari begira baitago, eta azkenengo biak zerbitzu finantzieroei). Batez ere zerbitzu-ekonomia bat da Parisena, eta Frantziako Uhartea eskualdeak sortzen duen BPGren erdia produzitzen da hiriburuan bertan. Goi-mailako teknologia da hiriaren ezaugarrietako bat.

Gaur egun, Parisko ekonomiaren ardatzak ez dira bakarrik hiriburuaren udalean garatzen, baizik eta inguratzen duten gune-periferiko guztietan. Hortaz, bulego eta enpresa-egoitza berri gehienak Senako Gainak deituriko eskualdean kokatuta daude, Opera, La Défense eta Val de Seine barrutiekin bat Parisko ekonomiagune delarik. Hauts-de-Seine eskualdea hiriburuaren zabalgune bat bihurtu da, eta bertan 873.775 pertsonek egiten zuten lan 2005ean. Urte berean, 1.653.551 pertsona ziharduten Parisen bertan.

Parisko eskualdean, Frantziako ekoizpen industrialaren laurden bat produzitzen da, eta mota guztietako makineriak ekoizten dira. Era berean, luxuzko-artikuluak ere ohikoak dira Parisen, goi-mailako moda, perfumeak edo bitxiak, esaterako. Le Havre portu atlantiarra ere Pariseri lotuta egon ohi da.

Azkenik, aipatu beharra dago Paris gune turistiko garrantzitsua dela, urtero-urtero 30 milioi turista baino gehiago jasotzen baititu.

Ondasun nabarmenak

• Eiffel Dorrea: 1889an inauguratuta, urte hartako Erakusketa Unibertsalerako.
• Sacré-Coeur basilika.
• Garaipen Arkua.
• Hôtel de Ville (Herriko Etxea).
• Hôtel des Invalides.
• La Madeleine Eliza.
• Notre Dame katedrala.
• Garnier Opera.
• Bastillako Opera.
• L'Opéra comique.
• Palais de Chaillot.
• Palais de Justice et Conciergerie, bertan dago Sainte-Chapelle.
• Palais Royal.
• Tour Montparnasse
• Louvre museoa

Kaleak eta plazak

Paris, Senaren ibaiertzak1 UNESCOren gizateriaren ondarea
Notre-Dame katedrala Senaren ertzean.
Mota	Kulturala
Irizpideak	i, ii, iv
Erreferentzia	600
Kokalekua	Txantiloi:FRA
Eskualdea2	Europa / Ipar Amerika
Izen ematea	1991 (XV. bilkura)
1 UNESCOk jarritako izen ofiziala (euskaratua) 2 UNESCOren sailkapena

• Champs-Élysées etorbidea (8. arrondissement): Ia 3 km luze da, La Concorde eta Charles de Gaulle plazak lotuz. "Ardatz historikoa" edo Axe historique izena hartzen du, hiriko leku enblematikoak konektatzen dituelako: Louvre-ko piramidea, Carrousel-eko Arc de Triomphe, Tuileries-eko lorategia, l'Obélisque, l'Arc de Triomphe eta l'Arche de la Défense modernoa. Zinema, jatetxe, taberna eta denda ugari daude etorbidearen alde bietan. 1975etik, Frantziako Tourra bertan amaitzen da.

• Place de la Bastille.
• Place Charles-de-Gaulle (lehenago, Place de l'Étoile deitua): Erdian, Garaipen Arkua dago.
• Place de la Concorde: Bertan, Obelisko famatua dago.
• Place de Grève edo place de l'Hôtel-de-Ville.
• Place du Parvis-Notre-Dame: Bertan dago Notre Dame katedrala.
• Place des Pyramides: Erdian Jeanne d'Arc-en brontzezko estatua dago. Tuileries-eko lorategia gertu dago.
• Place de la République.
• Place Saint-Michel: Quartier Latin-en dago (6. arrond.).
• Place Vendôme: Bertan dago Vendôme zutabea.
• Place des Victoires (1.-2. arrond.).
• Place des Vosges (3.-4. arrond; lehenago, Place Royale deitua).

Unibersitateak

• Sorbona Parisko Unibertsitatea (La Sorbonne).
• Université de Marne-la-Vallée (Paristik kanpo)
• Université de Cergy-Pontoise (Paristik kanpo)
• Université d'Evry-Val d'Essonne (Paristik kanpo)
• Université de Versailles Saint-Quentin-En-Yvelines (Paristik kanpo)

Parkeak

• Parc de Belleville.
• Parc de Bercy.
• Le bois de Boulogne.
• Parc Georges Brassens.
• Parc des Buttes-Chaumont.
• Parc André Citroën.
• Jardin du Luxembourg.
• Champ-de-Mars (7. arrond.): Eiffel Dorrea eta Eskola militarraren artean dago.
• Parc Monceau.
• Parc Montsouris.
• Jardin des Tuileries.
• Parc de la Villette.
• Le bois de Vincennes.

Garraioa

Parisko garraioa historian zehar eraikitako sistema konplexua da, oraindik ere hobetzean doana. Syndicat des transports d'Île-de-France delakoak (STIF), lehen Syndicat des transports parisiens (STP), eskualdeko garraio sistema ikuskatzen du.

Parisko metroa, Abbesses geltokiko sarrera (Hector Guimard).

Sindikatu honen kideak dira Île-de-France eskualdea eta bertako zortzi departamenduak. Sindikatu honek herri garraioa koordinatzen du: RATP (654 bus linea, Parisko metroa, hiru tranbia eta RER sarearen tarte batzuk darabiltzana), SNCF (Aldirietako trenak, tranbia linea bat eta RER sarearen beste tarteak darabiltzana) eta Optile izeneko operadore pribatuen elkargoa (1.070 bus linea darabiltzana)

Metroa da Parisko garraio sistema nagusia. 300 geltoki ditu (384 geraleku), 214 km errailek elkartuak. 16 linea ditu, 1 zenbakitik 14ra, gehi 3bis eta 7bis, hasieran jatorrizko lineen adar bat baino ez baitziren. Geltokien arteko distantzia txikia dela-eta, lineak mantsoegiak dira aldirietara hedatzeko, beste hiri batzuetan egin duten bezala. Horregatik, 1960ko hamarkadan RER sarea (Réseau Express Régional) sortu zen, urrutiko aldirietara iristeko. RER sareak bost linea ditu (A, B, C, D eta E), 257 geltoki eta 587km errail.

Vélib' geltokia Bastilla plazan.

Gainera, Parisen tranbia linea bat dago (T3), Pont de Garigliano eta Porte d'Ivry artean. Parisko inguruetan beste hiru linea ere badaude: T1 (Saint-Denis eta Noisy-le-Sec artean), T2 (La Défense eta Porte de Versailles artean) eta T4 (Bondy eta Aulnay-sous-Bois artean).

Hirian Vélib' izeneko txirrinduen partekatze sarea dago, 1.450 geltoki eta 20.000 txirrindu publiko baino gehiagorekin. Ferri zerbitzu berria ere bada (2008), Voguéo izenekoa, Sena eta Marne ibaietan.

Hiriburua, Frantziako burdinbide sareko erdigunea da. Sei tren geltoki nagusiak (Gare du Nord, Gare Montparnasse, Gare de l'Est, Gare de Lyon, Gare d'Austerlitz eta Gare Saint-Lazare) hiru trenbide-sarera konektatuak: TGV (abiadura handiko trena), Corail trenak (abiadura normalekoak) eta Transilien (aldirietakoak).

Parisek bi aireportu nagusi ditu: Paris-Orly aireportua, Paristik hegoaldera, eta Paris-Charles de Gaulle aireportua, iparraldean kokatua eta munduko erabilienetakoa. Eskualdean badira beste bi aireportu, Paris Beauvais Tillé aireportua eta Le Bourget aireportua, baina aurreko biak baino garrantzi txikiagoa dute.

Paristar ezagunak

• Charles Perrault (1628- 1703), idazlea.
• Jean-Baptiste Denys (1640?–1704), medikua.
• Étienne-Louis Boullée (1728− 1799), arkitekto neoklasikoa.
• Charles Gounod (1818-1883), musikagilea.
• Edouard Manet (1832-1883), margolaria.
• Auguste Rodin (1840-1917), eskultorea.
• Claude Monet (1840-1926), margolaria.
• Paul Gauguin (1848-1903), margolaria.
• Marcel Proust (1871-1922), idazlea.
• Louis Aragon (1897-1982), idazlea.
• Jacques Lacan (1901-1981), psikiatra.
• Jean-Paul Sartre (1905-1980), idazlea.
• "Rob-Vel" (1909-1991), komikigilea.
• Edith Piaf (1915-1963), abeslaria.
• Jon Mirande (1925-1972), euskal idazlea.
• Txomin Peillen (1932-), euskal idazle eta euskaltzaina.
• Rene Goscinny (1926-1977), komikigilea.
• Guy Debord (1931-1994), filosofo marxista, idazle eta zinema-zuzendaria.
• Brigitte Bardot (1934 - ), aktorea.
• Nicolas Sarkozy (1955 - ), Frantziako presidentea.

Hedabideak

Aujourd'hui en France, France Soir, La Croix, La Tribune, Les Echos, Le Figaro, Le Monde, Le Monde diplomatique, L'Humanite eta Liberation ditugu hiriko egunkari orokorrik garrantzitsuenak.

Kirol egunkari nagusia L'Equipe dugu.

Kirolak

Paris Saint-Germain FC hiriko futbol talde nagusia da, eta Racing Club de France ere historikoki garrantzitsua izan da.

Hiri senidetuak

• Txantiloi:ITA Erroma, 1956tik aurrera (Seule Paris est digne de Rome; seule Rome est digne de Paris / Solo Parigi è degna di Roma; Solo Roma è degna di Parigi / "Paris bezalakorik bakarrik Erroma; Erroma bezalakorik bakarrik Paris").

Ikus, gainera

• Frantziako hiri nagusien zerrenda

Kanpo loturak

Wikimedia Commonsen badira fitxategi gehiago, gai hau dutenak: Paris

• Parisko webgune ofiziala (Frantsesez)
• Parisko Euskal Etxea (Frantsesez)
• Le Monde egunkariko webgunea (Frantsesez)
• Le Figaro egunkariko webgunea (Frantsesez)
• Le Monde Diplomatique egunkariko webgunea (Frantsesez)
• Liberation egunkariko webgunea (Frantsesez)
• Régie Autonome des Transports Parisiens (RATP) (Frantsesez)
• SNCF-Ile de France (Frantsesez)