Kirgiziako Sobietar Errepublika Sozialista

Kokapena

Kirgiziako Sobietar Errepublika Sozialistako bandera

Kirgiziako Sobietar Errepublika Sozialistako armarria

Kirgiziako Sobietar Errepublika Sozialista (errusieraz: Киргизская Советская Социалистическая Республика; kirgizeraz: Кыргыз Советтик Социалисттик Республикасы) Sobietar Batasuna osatzen zuten hamabost errepubliketako bat zen. Hiriburua Bishkek (Frunze) zen.

1989. urteko datuen arabera, herrialdearen azalera 198.500 km²-koa zen (Sobietar Batasuneko zazpigarren handiena) eta 4.257.800 biztanle zeuden (hamargarren herrialde handiena), 21,4 biztanle km²-ko dentsitatearekin. Sobietar errubloa erabiltzen zuten. Hizkuntza nagusiak kirgizera eta errusiera ziren.

Historia

Errusiar Inperioak Kirgiziako lurraldea XIX. mende amaieran bereganatu zuen. Errusiar Iraultzaren ostean, sobietarren esku geratu zen 1918. urtetik aurrera. 1924. urtean Kara-Kirgiziako oblast autonomoa sortu zuten, Errusiako Sobietar Errepublika Sozialista Federatiboaren barruan. 1925. urtean Kirgiziako Sobietar Errepublika Sozialista Autonomoa bihurtu zuten.

1936. urteko abenduaren 5ean Errusiatik bereizi eta Sobietar Batasuneko partaide izan zen handik aurrera: orduan izendatu zuten Kirgiziako Sobietar Errepublika Sozialista. 1990. urteko abenduan "Kirgiziako Errepublika" izena ipini zioten, eta 1991. urteko abuztuaren 31n independentzia aldarrikatu zuen.

Banaketa politiko-administratiboa

Kirgiziako Sobietar Errepublika Sozialista honela banatuta zegoen:

• Hiru oblast edo probintzia:
  • Issyk Kul oblasta; hiriburua: Przhevalsk
  • Naryn oblasta; hiriburua: Naryn
  • Ox oblasta; hiriburua: Ox
• Estatus bereziko eskualdea: Frunze
• Hiri bat, hiriburua: Frunze