Entziklopediak beti izan dira ikasleek kontsultarako erabili duten materiala, eta hala izaten jarraitzen du. Gaur egun, ordea, aldaketa garrantzitsu bat dago: paperezko entziklopedien ordez sareko informazioa da ikasleek bilatzen dutena. Hortxe hartzen du garrantzia Wikipedia bezalako ekimen batek, hortxe hartzen du garrantzia Wikipedia euskaraz egoteak.
Euskal Wikilarien Kultura Elkarteak proiektua jarri du martxan Eusko Jaurlaritzaren laguntzarekin, kalitatezko 1.000 artikulu garatzeko Euskarazko Wikipedian, unibertsitate eta ikastetxeetako irakasle eta ikasleen laguntzarekin. Auzolan erraldoia izango da, bi urtez hedatuko dena. Atari honetan proiektu horren garapena azalduko dugu, hainbat baliabide eskuragarri jarrita.
Irakaslea bazara eta gurekin lan egin nahi baduzu, idatzi hezkuntza@wikimedia.eus helbidera eta plazer handiz zurekin batera egingo dugu bide hau.
