Marisa Barrena

Marisa Barrena
Irudi gehiago
Bizitza
Jaiotza	Zornotza, 1951ko apirilaren 26a (72 urte)
Herrialdea	Bizkaia, Euskal Herria
Familia
Seme-alabak	ikusi Ainara Aroma Ixone Aroma
Hezkuntza
Heziketa	Mondragon Unibertsitatea
Hizkuntzak	euskara gaztelania
Jarduerak
Jarduerak	psikopedagogoa, irakaslea, wikilaria eta emakumeen eskubideen aldeko ekintzailea
Enplegatzailea(k)	IRALE HABE Ikastolen Elkartea  (1976 -  1990)
Kidetza	Mintzanet Wikiproiektu:WikiEmakumeok Euskal Wikilarien Kultura Elkartea Andereak Elkartea Gerediaga Elkartea
Sinesmenak eta ideologia
Alderdi politikoa	HASI Euskadiko Ezkerra Euskal Herriko Alderdi Sozialista

Marisa Barrena Larruzea (Zornotza, Bizkaia, 1951ko apirilaren 26a) euskal maistra, psikopedagogoa, euskaltzalea eta feminista da. Durangoko Andereak elkarteko kide sortzailea da, eta herriko Kriskitin dantza-taldean kulturartekotasuna eta parekidetasuna sustatzeko lanean dihardu.

Ibilbide profesionala

Marisa Barrena Zornotzan jaio zen, Aldekoena baserrian, bertan maizter zirela. 8 urte zituela, Eubako Erkoles baserrira joan ziren bizitzera. 1982an, berriz, Durangora aldatu zen, familiarekin batera.

Lehen ikasketak herri-eskolan egin zituen, eta oinarrizko batxilerrekoak, berriz, Zornotzako Karmengo Ama ikastetxean. 14 urterekin merkataritzaren alorreko ikasketak egin zituen, eta 15ekin hasi zen beharrean, administrari-lanetan, Zornotzako Ekin kooperatiba-fabrikan. 18 urterekin, borondatezko euskara-eskolak ematen ibili zen Durangoko Jesuitek utzitako geletan. Lehen alaba izan ostean ere, Ekinen jarraitu zuen. Garai hartan, ohikoa zen haurra izandako emakumeei dotea eskaintzea, soldatapeko lana utzi eta etxekoandre jardun zezaten; berak, ordea, uko egin zion diru hori hartu eta lantokitik alde egiteari.

Hamar urtez Ekinen jardun ostean, Ikastolen Elkartean hasi zen beharrean, Bizkaiko idazkari nagusiaren karguan. Ikastola publiko eta pribatuen arteko afera sortu zenean, beste bide bat hartzea erabaki zuen, eta betiko bokazioari heldu zion: magisteritza-ikasketak egin zituen. HABEko oposizioak gainditu ondoren, Bilboko euskaltegi pilotuan jardun zuen (gainerako euskaltegien eredu izateko sortu zituzten), proiektu hura bertan behera geratu zen arte. Ondoren, IRALEn ibili zen urte batzuetan, irakasleen irakasle. Hura utzita, psikopedagogia-ikasketak egin zituen, eta Durangaldeko ikasleen eta irakasleen motibazioak aztertu zituen. 2015ean erretiratu zen.

Militantzia

Frankismo garaian, haren kontrako mugimenduan jardun zuen. 1975ean Guardia Zibilak atxilotu zuen, propaganda ilegala izatea egotzita, eta hiru egunez jarraian torturatu zuten, Zornotzako kuartelean.

Alderdi politikoei dagokienez, HASIko militantea izan zen lehenik, eta Euskadiko Ezkerreko gero, harik eta alderdi hura utzi zuen arte (“ez dakit bota gintuzten, edo geure kabuz joan ginen”). Orduz geroztik, ez da berriro inon afiliatu.

2005ean, Andereak taldea sortu zuen, beste hainbat kiderekin batera. Urte hartan, Ofelia Hernández erail zuen haren bikotekideak Durangon, eta halako gertaerak salatzeko beharrak bultzatuta sortu zuten elkartea.

1990eko hamarkadatik aurrera, Durangoko Kriskitin dantza-taldeari zabalkundea ematen dihardu, helburu nagusi batekin: kulturartekotasuna eta parekidetasuna lantzea. Barne-hausnarketa egiteaz gain, sentsibilizazio- eta kontzientziazio-lana egin dute herrian eta inguruetan. 2015etik aurrera, emakumeak ere hasi dira parte hartzen lehen gizonezkoenak baino ez ziren hainbat dantzetan.

2015etik aurrera, euskara online eta doan praktikatzeko aukera ematen duen Mintzanet programan parte hartzen du; 2017an, Bidelagun Onenaren saria eman zioten.

2019az geroztik, Wikiemakumeak proiektuan parte hartzen du, Euskarazko Wikipedian emakumeen biografiak sortzen eta euskaratzen.

Kanpo estekak

Marisa Barrena Ahotsak.eus atarian

• Datuak: Q92054617
• Multimedia: Marisa Barrena / Q92054617