Kapitalizazio sinple

Finantzetan, kapitalizazio sinplea edo kapitalizazio bakuna epe jakin batean kapital bati dagozkion interesak kalkulatzeko modu bat da, interesak kapitalera metatzen ez dituena, kapitalizazio konposatuan ez bezala.

Inbertitutako $C_{0}\,$ hasierako kapital bati dagozkion interesak, moneta-unitatetan, honela kalkulatzen dira, $t\,$ epe baterako, epeko aldi bakoitzeko interes-tasa $i\,$ izanik:

$I_{t}=C_{0}it\,$

Bukaerako kapitala, interesak jaso eta gero, hasierako kapitala gehi interesak izango da. Honela kalkulatzen da:

$C_{t}=C_{0}+C_{0}it=C_{0}(1+it)\,$

Adibidez, 1000 euro ezartzen badira %5eko urteko interes tasa sinplean, bi urteren buruan jaso beharreko interesak honela kalkulatzen dira:

$I_{2}=1000\times 0.05\times 2=100\ euro\,$

Guztira epemugan jaso beharreko zenbatekoa hasierako kapitala gehi interesak (50 euro urteko), hau da, guztira 1.100 euro izango dira. Formula erabiliz:

$C_{2}=1000\times (1+0.05\times 2)=1.100\ euro\,$

Jasotzen diren interesak konstante direnez alditik aldira, kapitalaren hazkundea lineala da kapitalizazio sinplean.