Genero gramatikal

Wikipedia, Entziklopedia askea
Genero (gramatika)» orritik birbideratua)
Jump to navigation Jump to search
Artikulu hau gramatika-generoari buruzkoa da; beste esanahietarako, ikus «Genero».
Herrialdeen generoa frantsesez. Berdez, genero maskulinoa dutenak; morez, femeninoa.

Genero gramatikala izenak zenbait motatan sailkatzen dituen gramatika-kategoria da. Sexu-bereizketan edo bestelako nolakotasun batean oinarritzen den gramatika-kategoria da, hain zuzen ere.

Genero motak[aldatu | aldatu iturburu kodea]

Sexua eta generoa[aldatu | aldatu iturburu kodea]

Europako hizkuntza askoren kasuan generoak sexuarekin (bizidunen generoarekin, hertsiki) zerikusia badu ere, gramatika-generoa arbitrarioa izan daiteke. Hau da, genero neutrorik ez duen baina maskulino/femeninoa dituen hizkuntza batean, marka maskulino edo femeninoak emango zaizkie sexurik gabeko objektu arruntei edo baita animaliei ere. Adibide batzuk gaztelaniaz: la ballena (balea, fem., ar ala eme izan), la puerta (atea, fem.), el puente (zubia, mask.). Frantsesez, herrialdeen izenek artikulua daramate eta ondorioz genero maskulino edo femeninoa, banaketa arbitrario samarrean.

Europako hizkuntzen artean, sexua agertzen delarik normalean generoaren bereizgarri, ñabardurak izan ohi dira:

Izen-klaseak[aldatu | aldatu iturburu kodea]

Hizkuntza batzuek —Afrikako zenbaitek, adibidez— sei generotik gora dituzte, sexuarekin zerikusirik ez dutenak, eta kasu horretan izen-klase kontzeptua erabiltzen da gehiago generoarena baino.

Generoaren markak eta komunztadura[aldatu | aldatu iturburu kodea]

Izenen sailkapenerako kategoriak dira generoak, eta agerpen morfemikoa batzuetan izenetan har dezakete, baina ez beti.

Gaztelaniaz, atzizki eran agertzen da normalean generoa izenetan. Ipar Amerikako kathlamet hizkuntzan, berriz, aurrizki gisa, baina bi kasuetan nahiko parekagarriak dira kasuak:

  • Gaztelaniaz: perro, perra (zakur ar eta emea); muchacho, muchacha (mutil eta neska)
  • Klathlamet: ikʔútkʔut, akʔútkʔut (zakur ar eta emea); ikásqax, akásqax (mutil eta neska)

Izenetan markarik ez den genero-sailkapenik ere bada hizkuntzetan, baina nolabait, kasu hauetan, komunztaduran agertu beharko da genero-bereizgarritasuna.

Generoaren komunztadura beste morfema batzuekin gerta daiteke: determinatzaileak, izenlagunak, numeralak, aditzak... Gaztelaniaz, komunztadura gertatzen den izenlagun edo adjektiboen amaierarekin eta artikuluekin:

  • Gato, el gato, el gato negro, los gatos negros
  • Gata, la gata, la gata negra, las gatas negras

Galesez, komunztadura zein izen-eraldaketa, parametro bitxietan gertatzen da, hitz hasierako aldaketa kontsonantikoekin.

Izena Artikuluarekin Izenlagunarekin
Maskulino singularra mab "seme" y mab "semea" y mab mawr "seme handia"
Femenimo singularra merch "neskato" y ferch "neskatoa" y ferch fawr "neskato handia"

Generoa eta euskara[aldatu | aldatu iturburu kodea]

Euskaraz, oro har, izenak generoa adierazten ez badu ere, aditzen, jokatuen zein laguntzaileen, bigarren pertsonak bereizten ditu maskulinoa eta femeninoa, marka desberdinak baitituzte (hik ikusi duk / hik ikusi dun; hiri eman diat / hiri eman dinat). Gainera, forma alokutiboak erabiltzean ere genero-markak beste pertsonetan ere agertzen dira (haiek etorri dituk / haiek etorri ditun; ez zagok eskubiderik / ez zagon eskubiderik).

Lexikoan ere generoa (eta sexua) bereizteko erarik bada (gizon / emakume, zaldi / behor...).

Bestalde, behe-nafarreraz eta zubereraz (eta erronkarieraz) bada -sa atzizkia, izen femeninoak eratzeko (artzain / artzaintsa; alargun / alarguntsa); beste euskalkietan, ordea, ez da atzizki emankorra. Hala ere, mailegu (oso) berrietan (Eliza Santa Katolikoa, emakume alta bat), eta baita ahozko erabilera arruntetan ere (gezurtero / gezurtera; maja / majua; guapa / guapo) badira adibideak euskalki guztietan.

Kanpo-loturak[aldatu | aldatu iturburu kodea]

Erreferentziak[aldatu | aldatu iturburu kodea]